Luk 7

1Yeesu aa bol a gɛ waa nɔ bwa bagle nɛra la tonɛ la, o le bela dɛ kaa Kapeeneɔm. 2Dɛ Room sooja nomoa bɛl lɔ bela dɛ dɔ bonɔɔ bɛl dɛɛ nyin o waa kɛrɛdɛ. Dɛ bonɔɔ la bwara dɛ weo, a ka jɛɛ ken o sewɛ. 3Sooja nomoa la aa no Yeesu waa la, o tomɛ Juda tena nomonome bane ŋɔ bá ka soŋo o ba chah o bonɔɔ la tɛo. 4Baa la Yeesu be la, ba soŋo kohona ŋɔ ó ba chah nomoa la bonɔɔ la tɛo, dɛ ŋɔ o be ŋɔ, "A wer kɛŋɔ he cha nomoa nɔ, 5dɛkalkɛ o dɛ nyin ya Juda tena wa, hale o do cheremi dea tɛ yaa kwara." 6Baa ŋɔ gɛ la, Yeesu iro, o ne baa kaa. Aa ka tama o tel dem bela la, sooja nomoa la tomɛ o daamanar o be ŋɔ bá ba ŋɔ o be ŋɔ o ta chɛɛ kɛ Yeesu ba o dem, anomanta o bɛ o te koh, 7dɛ ŋɔ o gbagba ge ta chɛɛ kɛŋɔ o ba Yeesu be. Kɛ Yéesu bol waa waa ba o dem dɛ ba bol la ásɛ o bonɔɔ la gbaŋre. 8O bolɔ ŋɔ, "N ɛ nɛn maa lɔ nomonome bane lɔga, dɛ dɔ soojare ba do n ge lɔga. Mɛɛ wonoo ŋɔ bɛl be ŋɔ, 'Ba,' o ba, dɛ berɛ ŋɔ onfale be, 'Kaa,' o ge kaa. Mɛɛ wonoo ŋɔ n bonɔɔ be ŋɔ, 'Ɛ ken tɛ mɛ,' asɛ o ɛ." 9Yeesu aa no waa nɔ la, o nyoa kpoo yarada waa yaradao la wa, asɛ o berɛ habɔɔ dɛ ŋɔ nɛnlaa baa teŋɛ o nɛɛ la be ŋɔ, "Kasinteŋ, n ta nɛn waa yarada mɛ ken nae bwa. N ta o yarada dɔŋ nae Israel tena kwaraa bini." 10Belaa nɛra sooja nomoa la aa tom ba la berɛ kaa o be. Baa tel o dem la, ba nao kɛŋɔ o bonɔɔ la gbaŋrɔ. 11Aa ɛ tama la, Yeesu leɔ dɛɛ kaa bwɛɛ bɛl baa dɛ yerɔ Neen la ta. Waa dɛ kaa la, dɛ o habɔteŋra ne nɛnlaa bane ja o nɛ. 12Waa dena dɛɛ tel bwɛɛ la ta la, dɛ ba chegɛ baa bɛl waa sewa dɛɛ kaa ka huge. Dɛ gɛ nɛn waa sewa la ɛ luhaah bɛl bibeŋkpoŋ waa dɔa. Dɛ bwɛɛ la tena bane teŋɛ luhaah la nɛɛ pirim. 13Belaa Yeesu aa na haah la la, o waa do o sum, asɛ o ŋɔ o be ŋɔ, "Dɛɛ berɛ wii." 14Waa ŋɔ gɛ la, o kaa lege lale la baa fɔrɔwo la, asɛ nɛra baa chegɔɔ la jagɛ che bobeŋkpoŋ, asɛ o ŋɔ, "Bonɔɔ, n ŋɔ hé ir!" 15Belaa bonɔɔ la fugri ir so, dɛ den dɛɛ bol wa. Asɛ Yeesu ŋɔ haah la be ŋɔ, "He biee la." 16Ɔmee lawɛ nɛra baa lɔ bela la bwa, asɛ baa kpɛɛ Korowii dɛɛ ŋɔ, "Korowii keamejen bɛl ba ya bini bonɔ! Korowii balɔ dɛ́ ba lɛ o nɛra!" 17Yeesu waa waa ɛa la perɛ Judia harɛ ne harɛre aa baro cheme la bwa ta. 18Anee Jɔn waa dɛ sɔ nɛra Korowii nee la habɔteŋra ba Jɔn be dɛ ka bol a gɛ waa nɔ bwa baglo. 19Asɛ o yerɛ ba bini banɛ, dɛ tom ba Yeesu be ŋɔ bá ka bɔɔro ŋɔ onee nɛn Korowii aa bagɛ nyoa ŋɔ wɛɛ geloo o ba la aa, kɛɛ o laa ɔ, asɛ báa nyiŋi naate habɔɔ? 20Jɔn habɔteŋra la aa ba Yeesu be la, ba ŋɔ o be ŋɔ, "Jɔn waa dɛ sɔ nɛra Korowii nee laanee tomɛ yaa he be dɛ ŋɔ yá ba bɔɔre ŋɔ, henee naate Korowii aa bagɛ nyoa ŋɔ wɛɛ geloo o ba la aa, kɛɛ he laa ɔ, asɛ yáa nyiŋi naate habɔɔ?" 21A gɛ saŋ la dɛ Yeesu chah weela tena taeh, dɛ doŋi kwaa aa dɛ ir nɛra nɛ a le ba nɛ, asɛ dɛ gel nyoŋa gee na bɔr. 22Anee Yeesu ŋɔ Jɔn toroma la be ŋɔ, "Hé ka bagle Jɔn be waa haa baa na ne anɔ la haa baa no. Hé ŋɔ o be ŋɔ nyoŋa dɛ na bɔr, boobie ɛɛ valɛ, asɛ nɛra weechɔga aa chɔg ba bwadabii la ge bwara kwaa. Hé ŋɔ o be ŋɔ amumure dɛ no wa, lala ir seo ta, asɛ nyaara ge dɔ Amanesoma la dɛɛ no. 23He naate haa wola men tɔŋle la, he na som." 24Jɔn toroma la aa kaala la, Yeesu bol Jɔn waa nɛnlaa la be ŋɔ, "Haa la pua waa ɛ hɛŋle gbo la ta bela la, bɔkwaa he fe ɛɛ nyin kɛ he na laɔ? Kpɔg bɛl peu aa dɛ ta wɛɛ yiigi waa he la bela kɛɛ? 25Dɛ gɛ laa ge aa, dɛ bɔkwa tenee he la ŋɔ he ka nyiŋi ɔ? Nɛn waa do laaladɛɛgaa he la ka nyiŋi kɛɛ? Nɛra baa dɛ do laaladɛɛga dɛɛ di ba tetookondikwaa la, koodemii ba do. 26Hé den bag mɛ, bɔkwa tenee he la bela ka nyiŋi ɔ? Korowii keamee kɛɛ? Kasinteŋ, Korowii keamee he na la, kɛ o gwaa Korowii keame kwara. 27Jɔn nɔ waa ba chwerɛ Korowii Tɔn bini ŋɔ, 'Korowii ŋɔ, "Mɛɛ tomɛ n toromee ó tɔ he sie dɛ kwaa ŋwɛnɛ tɛɛ" ' la. 28N dɛ ŋɔ he be, ba lolɛ nɛnjena harɛ nɔ ta, kɛ Jɔn gwaa ba bwa. Kɛ nomɛlbwa waa ɛ bechala Korowii Kora la ta te berɔ gwaalo." 29Nɛmpɛɛne la ne lampoo lɛɛra la kwaraa baa dɛ bɔ nɛra apoo aa no Yeesu waa la, ba sɛoh ŋɔ Korowii waa dɔ kasinteŋ. Gɛ nɛra nɔɔ Jɔn faa sɔ Korowii nee la. 30Kɛ ba nomonome ne Farisii tena la ne Tɔn Jerema la te vɛh Korowii waa aa wera tɛɛ ba la. Dɛ ba te fa ta gelɛ Jɔn sɔ ba Korowii ne. 31Yeesu berɔ ŋɔ, "Bɔkwa konee mɛɛ ba fini nɛra nɔ kpɔe dɛ magɔɔ? Bɔkwa nɛraa ban ɔ? 32Ba do kɛŋɔ bechale bane aa dɛ hɛlɛ fɔgbaah, asɛ bane ŋɔ ba bala be ŋɔ, 'Ɛrɛɛ ya go silɛɛ yela asɛ he sie ta lɛɛ hé sa, ya berɛ ta wiile ge, he loo ta kui hé wi nɔɔ?' 33Jɔn waa dɛ sɔ nɛra Korowii nee la aa bala la, dɛ waa sen nyɔ, dɛ yon lawɛ o nyoa vɔwɛ, asɛ he ŋɔ kwaa dɛ ir o nɛ! 34Asɛ n Nɛn Bie ge aa bala nɔ, n dɛ di kwaa dɛɛ nyɔ sen, asɛ he ŋɔ, 'Hé na baa nɔ! Kondikondidii ne sennyɔɔree on. Lampoo lɛɛra baa dɛ bɔ nɛra apoo ne wechɔg-ɛɛraa o daamanar.' " Yeesu aa bol gɛ tonɛ la, o ŋɔ, 35"Wejereme bɛlbwa we-ɛɛla taa a che baa jemɛ kɛ o ɛ wejereme." 36Farisii te bɛl yerɛ Yeesu ŋɔ ó ba ó ne o di kwa, asɛ Yeesu la o dem ba ka so tig ta, dɛɛ ba kwaa dii. 37Bwɛɛ la ta la, dɛ haah bɛl dɛ bɔ jwamane dɛ do bela. Waa noa kɛ Yeesu lɔ Farisii te la dem dɛɛ di kwaa la, anee o ka kpɔ nosɔɔhsoma loŋjega bɛl del 38dɛ ba guŋi Yeesu jwɛh dɛ wi ta o napaala ta, dɛ kpɔ o nyumpona fee o sinii la waa wia ta Yeesu napaala ta la, dɛ mo o napaala, dɛ fuge nosɔɔhsoma la fɔgla. 39Belaa Farisii te la waa yerɛ Yeesu ŋɔ ó ba di kwaa la aa na a gɛ waa nɔ la, o lii o nyu bini ŋɔ, "Baa nɔ fe ɛ Korowii keame tenten naa, o fe jemɛ haah nɔ hahsoo waa dɛ lego nɔ. O fe jemɛ o wechɔga waa lɔ a ta bwɛɛ nɔ ta." 40Anee Yeesu ŋɔ o be ŋɔ, "Seemɔn, n dɔ waane dɛ́ bol he be." Asɛ baa la ŋɔ, "Nomoa, bol." 41Belaa Yeesu ŋɔ, "Nɛra banɛ banee di baa bɛl kem. Ba bwa di o kem te, kɛ bɛl kwaa gwaa o dɔŋ kwaa kera fi. 42A gɛ kema la nɛra banɛ la aa dia la, ba bɛlbwa ta wone bɔ, asɛ o kpɔ kɛ ba. A gɛ waa nɔ aa do gɛ nɔ, ba bini umee hɛɛ lii kɛŋɔ wɛɛ nyin baa la waa kohonaa yɔ?" 43Anee Seemɔn chaŋo ŋɔ, "N dɛ lii kɛ naate o kem aa kana la, onee dɛ nyin baa la waa kohona." Asɛ Yeesu ŋɔ, "Kpelaa he ŋɔ." 44Yeesu aa ŋɔ gɛ la, o berɛ sie ta haah la be, dɛ ŋɔ Seemɔn be ŋɔ, "Kɛ he na haah nɔ kenɛ? Maa ba he dem bonɔ la, he ta men nee tɛɛ ń sarame n nakpale. Kɛ haah nɔ te wio ta n nakpale ta dɛ kpɔ o nyumpona feera kɛrɛdɛ ken. 45He ta men lɛɛ silɛɛ ne dɛ mo n lwɛɛma. Kɛ maa baa so nɔ bwa, o ta n napaala moe gelɛ bwa. 46He ta men nee tɛɛ ń sarame n nakpale gɛɛ mɛɛ bol noo maa kpɔ fɔgle n nyu wa aa? Kɛ o te fuge nosɔɔhsoma fɔgle n nakpale. 47Anomanta mɛɛ dii kasinteŋii. Nyina haah nɔ aa nyin n waa kohona nɔ baglɔ kɛ Korowii kpɔ o wechɔga damanta waa ɛa la bwa kɛo. Naate waa wola wechɔga ɛɛ kohona a ɛ kɛŋɔ he kpɔa kɛo la, nyina waa dɛ nyin he waa la aa kan do. Waa Korowii jam kohona kɛ nɛn waa ɛ anjena la." 48Belaa Yeesu ŋɔ haah la be ŋɔ, "Korowii kpɔ he wechɔga kɛɛ." 49Waa ŋɔ gɛ la, anee nɛra baa soge tig ta bela dɛ ja o nɛɛ la ɛɛ lii ba nyu bini ŋɔ, "Nɛn besoo baa nɔ o kpɔ wechɔga dɛɛ kɛ nɛra nɔɔ?" 50Asɛ Yeesu ŋɔ haah la be ŋɔ, "He yarada haa yarada mɛ nɔ lɛɛ. Ir dɛɛ la. Kórowii tɛɛ bosɔɔhna."

will be added

X\