Luk 3

1Gɛ saŋ Siisa Tibeereɔs aa di Room kora bene fi dɛ anue la, dɛ Pɔnteɔs Paelet ɛ Judia harɛ nomoa, asɛ Hɛrɔd ɛ Galilia harɛ kooro, asɛ o dɔɔ Felep ɛ Ituria ne Trakonaetes kooro. Dɛ Laiseenias ɛ Abilini kooro, 2asɛ Anas ne Kaefas ɛ Sɔfonomonome Jerusalam. Gɛ saŋee Korowii kpɔ o waa do Jɔn waa ɛ Sakaria bie la nyoa pua waa ɛ hɛŋle gbo harɛ ta la, 3asɛ o ir dɛ bol Korowii Waa la bwɛɛre aa bar Jɔɔdan Moo la bwa ta dɛɛ ŋɔ nómɛlbwa charɛ o liire dɛ le o wechɔga ta ásɛ ba sɔɔ Korowii nee ásɛ Korowii kpɔ o wechɔga kɛo. 4Gɛ waa nɔɔ Korowii keame Aesaya chwerɛ o tɔn bini ŋɔ, "Nomɛl dɛ bol waa takpeg ne pua waa ɛ hɛŋle gbo ta dɛ ŋɔ nɛ́ra gel ba we-ɛɛla togre, dɛ kpɔ ba te dɛɛ kpa ba Dɔɔ bala. 5Fɛlembɔɔ te bɛlbwa chɛ kɛŋɔ he tɔɔ, dɛ bur deŋgare ne bwe te bɛlbwa. Ŋwɛnɛ bɛlbwa waa gola la chɛ kɛŋɔ he togro, dɛ kwaa ŋwɛnɛ bɛlbwa bɔɔne bɔɔnere aa lɔ o ta ó chɔ kpantalaŋ. 6Nɛwɛnyina bwa ɛɛ nao gɛ lɛɛ Korowii aa dɛ ba yaa lɛɛ la aa doa." 7Belaa Jɔn ŋɔ nɛra baa lea ba o be ŋɔ ó sɔ ba nee la be ŋɔ, "Nɛnchɔga kɛŋɔ harɛkwaa baa do nii kpɔg ta asɛ a le dɛ chwa dɛɛ kaa! Umee ŋɔ he be ŋɔ hɛɛ wonoo chwa le Korowii bandia ta nɔ? 8Hɛ́ɛ ɛ waa aa dɛ chagle kɛŋɔ he charɛ he liire le he wechɔga ta kpela. He bɛ he hwɛga kpɔ do Abraham nɛɛ kɛ o ɛ he nabaa nomanta hɛɛ wonoo chwa Korowii bandia. Hé gel n ŋɔ he be ŋɔ, Korowii ɛɛ wonoo gel bwea nɔ begre Abraham naanar. 9He do kɛŋɔ daa. Daa bɛlbwa waa wola nɔndɛɛga nɔnɛ la, baa teŋo ta dɛ fuuh. Gɛɛ Korowii ge gɔɔ o kpanfɛ nɛra baa wola ba liire charɛ la nɛɛ dɛɛ ba ba teŋna ta, dɛ kpɔ ba do nii ta ba fuh." 10Anee nɛnlaa la aa baro cheme la bɔɔro ŋɔ, "Aah, ɛrɛɛ yá ɛɔ?" 11Asɛ o chaŋ ba ŋɔ, "Nomɛlbwa waa dɔ batakaani bele anɛ la, ó kpɔ bɛl tɛ nɛn waa wola bɛl dɔe kwaraa, asɛ nomɛlbwa o ge aa dɔ kondikwaa dɛ́ di la ge ɛ gɛ tenten." 12Belaa lampoo lɛɛra baa dɛ bɔ apoo bane ba ŋɔ ó sɔ ba Korowii ne, dɛ bɔɔro ŋɔ, "Nomoa, ɛrɛɛ chɛ kɛŋɔ ya ɛɔ?" 13Anee o chaŋ ba ŋɔ, "He bɛ suuga lɛ dɛɛ gwaa gɛ aa chɛ kɛŋɔ hɛɛ lɛ." 14Soojare bane ge ba o be dɛ ba bɔɔro ŋɔ, "Asɛ ya ge sɛh? Ɛrɛɛ chɛ kɛŋɔ ya gee ɛɔ?" Asɛ o ŋɔ ba ge be ŋɔ, "He bɛ nɛra ɛgre dɛɛ lɛ suuga ba be, dɛ bɛ nomɛlbwa ge suuga lɛ dɛ tɔ o wechɔga ta. Hé gel he kembɔa ɛɛ su he siwi." 15Nɛnlaa la hɛgra den ir waa aa dɛ ba bala la ta, baa lii ba nyu bini kɛŋɔ Jɔn kenii Kristo la Korowii aa bagɛ nyoa ŋɔ wɛɛ tomɔɔ ásɛ o ba lɛ yaa la. 16Anomanta Jɔn ŋɔ ba be ŋɔ, "Nee tenten nee mɛɛ sɔ heya. Kɛ nomɛl ta dɛ ba dɛ gwaa mɛ, maa wola o napaa teera kwaraa dɔ. O te, Korowii Domadɛɛge ne nii nee wɛɛ ba heyaa sɔe. 17O do kɛŋɔ paa waa chegɛ o pɛla ta dɛ kpɔ o te dɛɛ ba kwaa pala. Wɛɛ palɛ a bwaa kɛrɛdɛ ken, asɛ dɛ pa do kon ta ka cheg. Kɛ a pɛga la te, wɛɛ kpɔ nii aa wola dime bwaa fuah." 18Waa Jɔn aa bola dɛ kpɔ ja nɛra dɛ gel baa no Amanesoma la te ta nyoa dɔe. 19Jɔn ŋɔ Galilia kooro Hɛrɔd be ŋɔ moe waa mo o nime haah Hɛrɔdeas la, ne wechɔga bwa waa ɛa ja la ta magrɛ. 20Gɛ waa nɔ Jɔn aa bol o be la nomanta, o gelɔ ba lawɔ do dea dɛ den do anam kwara. 21Gɛ saŋ Jɔn faa dɛ sɔ nɛra la bwa Korowii nee la, o sɔ Yeesu ge. Yeesu nee sɔe ta, waa dɛ soŋe Korowii la, nyundua pilo, 22asɛ Korowii Domadɛɛge la tu ba o nɛɛ dɛ do kɛŋɔ brɔnoma, asɛ ba no taa bɛl nyundua kɛŋɔ, "Henee n bie maa dɛ nyin he wa, he waa ɛɛ su n siwi." 23Gɛ saŋ Yeesu aa pa mun dɛɛ ɛ o toma la, dɛ o di bene dɛ ɛ fifraatoro, dɛ nɛra dɛ lii kɛŋɔ Josef biee. Josef ge mɛɛɛ Heli, Heli ge mɛɛɛ Matat, Matat ge mɛɛɛ Lewi, Lewi ge mɛɛɛ Mɛlke, Mɛlke ge mɛɛɛ Janai, asɛ Janai la ge mɛɛɛ Josef. Josef ge mɛɛɛ Matateas, Matateas ge mɛɛɛ Emɔs, Emɔs ge mɛɛɛ Neehum, Neehum ge mɛɛɛ Esli, Esli ge mɛɛɛ Nagae, asɛ Nagae la ge mɛɛɛ Maat. Maat ge mɛɛɛ Matateas, Matateas ge mɛɛɛ Semein, Semein ge mɛɛɛ Josek, Josek ge mɛɛɛ Jɔda, Jɔda ge mɛɛɛ Jɔhanan, asɛ Jɔhanan la ge mɛɛɛ Risa. Risa ge mɛɛɛ Sɛrubabɛl, Sɛrubabɛl ge mɛɛɛ Sealteɛl, Sealteɛl ge mɛɛɛ Nɛre, Nɛre ge mɛɛɛ Mɛlke, Mɛlke ge mɛɛɛ Adi, asɛ Adi la ge mɛɛɛ Kosam. Kosam ge mɛɛɛ Elmadam, Elmadam ge mɛɛɛ Er, Er ge mɛɛɛ Josua, Josua ge mɛɛɛ Eliesa, Eliesa ge mɛɛɛ Jorim, asɛ Jorim la ge mɛɛɛ Matat. Matat ge mɛɛɛ Lewi, Lewi ge mɛɛɛ Semeɔn, Semeɔn ge mɛɛɛ Judas, Judas ge mɛɛɛ Josef, Josef ge mɛɛɛ Jonam, asɛ Jonam la ge mɛɛɛ Eliakim. Eliakim ge mɛɛɛ Mɛlea, Mɛlea ge mɛɛɛ Mɛna, Mɛna ge mɛɛɛ Matata, Matata ge mɛɛɛ Netan, Netan ge mɛɛɛ Devid, asɛ Devid la ge mɛɛɛ Jese. Jese ge mɛɛɛ Obɛd, Obɛd ge mɛɛɛ Boas, Boas ge mɛɛɛ Sala, Sala ge mɛɛɛ Naasɔn, Naasɔn ge mɛɛɛ Aminadab, asɛ Aminadab la ge mɛɛɛ Admin. Admin ge mɛɛɛ Aani, Aani ge mɛɛɛ Hɛsrɔn, Hɛsrɔn ge mɛɛɛ Pɛrɛs, Pɛrɛs ge mɛɛɛ Juda, Juda ge mɛɛɛ Jekɔb, asɛ Jekɔb la ge mɛɛɛ Aesek. Aesek ge mɛɛɛ Abraham, Abraham ge mɛɛɛ Tɛɛra, Tɛɛra ge mɛɛɛ Neehɔ, Neehɔ ge mɛɛɛ Sɛrɔg, Sɛrɔg ge mɛɛɛ Reu, asɛ Reu la ge mɛɛɛ Pɛlɛg. Pɛlɛg ge mɛɛɛ Iba, Iba ge mɛɛɛ Sala, Sala ge mɛɛɛ Keinan, Keinan ge mɛɛɛ Afaksad, Afaksad ge mɛɛɛ Sɛm, asɛ Sɛm la ge mɛɛɛ Nowa. Nowa ge mɛɛɛ Lamɛk, Lamɛk ge mɛɛɛ Mɛtusala, Mɛtusala ge mɛɛɛ Inɔk, Inɔk ge mɛɛɛ Jarɛd, Jarɛd ge mɛɛɛ Mahalalel, asɛ Mahalalel la ge mɛɛɛ Keinan. Keinan ge mɛɛɛ Enos, Enos ge mɛɛɛ Sɛt, Sɛt ge mɛɛɛ Adam, asɛ Korowiirii ge ta Adam.

will be added

X\