Luk 24

1Tɔɔ aa pera Kwasie tomun aa dɛ kpɔ la, haahna la kpɔ kwaa a sɔɔh aa soma la la bwe bɔɔ la ta, 2dɛ ka na kɛŋɔ nomɛl gbili bwe baa kpɔa tɔ bɔɔ la le o nyoa, 3asɛ ba jo dɛ na kɛŋɔ ba Dɔɔ Yeesu lale la toole. 4Ba nyoa aa kpoa ba che bela la, dɛ baala banɛ bane baa do laalapoŋa aa nyɛgle al-al ken denɔ ba che ba jwɛh. 5Ɔmee lag ba taeh, asɛ ba gure nyuune suugi harɛ. Anee baala la ŋɔ ba be ŋɔ, "Ɛrɛɛ he baa nyin nɛnwee lala bɔr ɔ? 6Waa o faa bol he be Galilia harɛ la, he soɔh kɛɛ? O toole bonɔ, o iro. 7O fa ta ŋɔe ŋɔ a chɛ kɛŋɔ ba le o Nɛn Bie tɛ nɛnchɔga, ba kpaaro pɛl dagagre ta asɛ a tɔpetooro wee la o ir seo ta naa?" 8Belaa haahna la ta lii gɛ waa la, 9dɛ laa berɛ kaa dem dɛ ka taa bagle Yeesu habɔteŋra fi dɛ beŋkpoŋ la ne nɛra baa ja ba nɛɛ la. 10Mɛɛre waa le Magdala la ne Joana ne Jems nya Mɛɛre ne haahna bane baa jaa laanee bol waa la bagle o habɔteŋra la. 11Yeesu habɔteŋra la kpɔ waa la ɛ mola, ba ta kpɔe ɛ wobɛlbwa. 12Belaa Pita te kpɔ chwae dɛ la bwe bɔɔ la ta, dɛ ka boŋɛ dɛ haah o bini dɛ na yapoŋ baa kpɔa baage lale la gbo chɔe. Dɛ kpɔ nyokpoa kaa dem. 13Awola tenten la, Yeesu habɔɔ nɛra la bini banɛ bane chig ŋwɛnɛ ta dɛ le Jerusalam dɛɛ kaa Emɛyas. Bela ne Jerusalam ɛɛ ɛ kwansini anuanɛɛ. 14Dɛ ba dɛ bol waa dɔŋa be, dɛɛ bagle dɔŋa waa aa chiga. 15Baa dɛ bol waa sibegra ne dɛ bɔɔ dɔŋa dɛɛ kaa la, Yeesu gbagba kaa puu ba, ba ne wɛɛ kaa. 16Ba nao, kɛ ba ta wone jemɔ. 17Belaa Yeesu bɔɔ ba ŋɔ, "Bɔkwa waa he valɛ dɛɛ ba dɛɛ bol dɔŋa be nɔɔ?" Asɛ ba jagɛ che sum ne surumm ken. 18Asɛ ba nɛra banɛ la bini bɛl baa dɛ yerɔ Kliopas la chaŋo ŋɔ, "He te ta waa aa chig bonɔ tɔperaanɛ nɔ noɛ kɛɛ? Jerusalam nɛnhɔɔhree hen kɛɛ?" 19Anee Yeesu bɔɔ ba ŋɔ, "Bɔkwa waa yɔ?" Asɛ ba ŋɔ, "Waa aa pu Yeesu waa le Nasarɛt la waa yaa bol. O ɛ Korowii keame dɛ dɔ kpegri wobol ne we-ɛɛla ta, Korowii ne nɛra bwa jemɛ o wa. 20Ya Sɔfonomonome ne ya bela nomonome kpɔɔ tɛ ŋɔ bá di o wa, dɛ kpaaro pɛl dagagre ta dɛ kpoo. 21Kɛ ya te, ya fa dɔ hwɛga kɛ onee naate o fe aa dɛ ba dɛ́ ba lɛ Israel tena la. Waa nɔ aa chiga tɔpera atoroo la. 22Anɔ la ge aa jaa, haahna bane baa ɛ ya bini bane la gelɔ ya nyoa kpo. Ba felo dɛ la bela baa hugo, 23kɛ ba ta o lale nae. Asɛ ba ba dɛ ba ŋɔ ba na nyundua toroma bela, ba chagle kɛŋɔ Yeesu ir seo ta. 24Belaa yabala la bane baa ɛ o habɔteŋra la bane la bela baa hugo la, dɛ ka na a gɛ waa la tenten, dɛ a ɛ kpela gɛ haahna la aa bola la. Kɛ Yeesu gbagba te, ba ta on nae." 25Anee Yeesu ŋɔ ba be ŋɔ, "Nfɛrɛ nyaara! Ɛrɛɛ haa wola Korowii keamere waa baa bola la yarada nɔɔ? 26A ta chɛɛ kɛŋɔ Kristo la Korowii aa ŋɔa ŋɔ wɛɛ tomɔɔ ó ba lɛ yaa la na gɛ wahala nɔ bwa mɔɔ asɛ dɛ dɔ Korowii Kora la di kɛɛ?" 27Asɛ Yeesu bag ba o bwara waa aa lɔ Korowii Tɔn la bwa bini. O pa mun le anɔ la aa lɔ Mosis Tɔne la bini dɛ bagle kaa anɔ la aa lɔ Korowii keamere kwaa la ta. 28Baa tel bwɛɛ la baa dɛ kaa o ta la, Yeesu ɛo kɛŋɔ waa dɛ kaa sie, 29kɛ ba ta on ŋwɛnɛ tɛɛ, dɛ soŋo ŋɔ, "Wee joɔ, bɔr dɛ bir, anomanta ba yá chɔ." Asɛ o sɛh o ne ba ka so. 30Kondiiga saŋ aa tela ba ka cheme tig ta la, o kpɔ paanoo dɛ jam Korowii dɛ kuugi do ba nɔɔra ta. 31Belaa ba sie ta chole o nɛɛ kɛŋɔ Yeesuu. Bug la ta o den nyogre ba siwi ta. 32Asɛ ba ŋɔ, "A waa laa wɛɛ bagle Korowii Tɔn la waa ŋwɛnɛ ta asɛ a jo ya bini gɛ la aa?" 33Bug la taa ba ir dɛ berɛ kaa Jerusalam a wola jɔmɔra la ne, dɛ ka na Yeesu habɔteŋra fi dɛ beŋkpoŋ la. 34Dɛ ba ne nɛra baa jaa la pɛo so dɛɛ bol ŋɔ, "Ya Dɔɔ la iro kpela! O kpɔ o te bagle Seemɔn!" 35Gɛ nɛra banɛ la bagle waa aa chig Emɛyas ŋwɛnɛ ta gɛ saŋ baa dɛ kaa asɛ Yeesu ka puu ba la bini chag ba, dɛ bagle gɛ aa ɛa o kuugi paanoo tɛɛ ba mɔɔ ba ta jemɔ. 36A gɛ saŋ nɛra banɛ la aa bol gɛ waa la dɛɛ bag ba la, bug la ta dɛ Yeesu denɔ ba che ba baah ta dɛ ŋɔ, "Kórowii tɛ heyaa bosɔɔhna." 37Ba jarɔ, ɔmee lag ba, ba lii kɛŋɔ lalee ba ken na. 38Asɛ o bɔɔ ba ŋɔ, "Bɔkwaa gela he bambile chɔg nɔɔ? Bɔkwa waa hɛɛ ɛ aahna-aahna nɔɔ? 39Hé nyiŋi n nɔɔra ne n napaala, asɛ dɛ jemɛ kɛŋɔ menee. Hé lag mɛ dɛ na, dɛkalkɛŋɔ lale ta bwadabii ne hoga dɔe gɛ haa na mɛ n che nɔ." 40Yeesu bol gɛ waa nɔ dɛ kpɔ o nɔɔra ne o napaala bag ba. 41Ba sie lɛo, kɛ dɛ ba bwara hwaoh, asɛ ba taa tɔŋle. O bɔɔ ba ŋɔ, "He dɔ kondikwaa ane bonɔ naa?" 42Asɛ ba tɛo pɛŋe baa ŋwiiro pera, 43asɛ o lɛ dɛ chwe ba siwi ta, 44dɛ ŋɔ ba be ŋɔ, "Anɔ waa gɛ saŋ n ne haa lole la, n yon dɛɛ bol he be ŋɔ a chɛ kɛ n bwara wobɛlbwa baa chwera Mosis Mmara la bini ne Korowii keamere tɔne la bini ne Korowii Kpɛɛra Tɔn bini la ɛ kpela la." 45Anee o kpɔ lii ba, ba no Korowii Tɔn la mun. 46Dɛ berɛ ŋɔ ba be ŋɔ, "Ba chwerɔ ŋɔ Kristo la chɛ kɛŋɔ o na wahala nɛra nɔn ta ba kpoo, asɛ o seo habɔɔ tɔpera atoro la, o ir seo ta, 47ásɛ ba che o sɔn ta dɛ bol Amanesoma la dɛ ŋɔ nɛ́ra charɛ ba liire dɛ le wechɔga ta ásɛ Korowii kpɔ ba wechɔga kɛ ba, dɛ pa mun le Jerusalam dɛ bagle gɛ waa nɔ harɛ bobɛlbwa. 48Heyaa waa nɔ danseɛ tena. 49Kɛ hé no, n gbabir ɛɛ tomɛ kon n Mɛɛ aa bagɛ heyaa nyoa laanee he be. Anomanta hé so bwɛɛ nɔ ta ka tel kɛŋɔ kpegri la aa le nyundua ba he be." 50Belaa o kpɔ ba le Jerusalam kaa Bɛtani dahare dɛ ka laa o nɔɔra ir dɛ soŋe Korowii tɛɛ ba. 51O Korowii soŋa dɛ tɛɛ ba ta la, o le ba jwɛh, asɛ Korowii kpɔɔ kaa nyundua. 52Ba berɛ kpɔ silɛɛ kaa Jerusalam, 53dɛ yon ka jo Korowii Dea dɛɛ jam Korowii tɔpere bɛlbwa.

will be added

X\