Luk 21

1Yeesu aa lɔ Korowii Dea la, o nao kɛŋɔ dɔɔhna ta ba suugare dɛɛ do suuga log bini. 2Belaa luhaah nyaa bɛl ge ba do suuga bwejegre anɛ. 3Asɛ Yeesu ŋɔ, "Kasinteŋ, n dɛ ŋɔ he be, luhaah nyaa nɔ do suugajena dɛ gwaa nɛra nɔ bwa, 4dɛkalkɛŋɔ o dea suuga bwaa o kpɔ ba do log nɔ bini la. Kɛ dɔɔhna nɔ te suuga bini tama baa naa kɛŋɔ a waa aa ba nɛɛ we la, anee ba kpɔ ba do la." 5Belaa Yeesu habɔteŋra la bane ɛɛ bol Korowii Dea la waa o be, gɛ bwea baa kpɔa mao, ne kondɛɛga nɛra aa ɛa tɛ Korowii ba kpɔ kwaa o danjwɛɛ la wer aa doa. Anee Yeesu ŋɔ, 6"Tɔpere bɛl ɛɛ bao asɛ anɔ haa naa nɔ, ba ta ɛɛ pagre a bwaa asɛ bwe beŋkpoŋ bɛlbwa aa wola lee do dɛ chɔŋɛ o dɔŋ nɛɛ kpa." 7Anee ba bɔɔro ŋɔ, "Nomoa, saŋ besoo aa ba chiga ɔ? Bɔkwaa dɛɛ ba bagla kɛ gɛ waa nɔ dɛ ba chiga ɔ?" 8Anee Yeesu ŋɔ ba be ŋɔ, "Hé nyiŋi kɛrɛdɛ asɛ nomɛlbwa bɛ heyaa negre. Nɛra pirim ɛɛ kpɔ n sɔnee ba dɛ ba ŋɔ banee men, dɛ ŋɔ tɔpere la telo. He bɛ ba nɛɛ teŋɛ. 9Dɛ he baa no laa yoi waa ne harɛ vuuga waa bobɛlbwa naa, he bɛ ɔmɛ. A chɛ kɛ gɛ waa nɔ bwa chig. Kɛ dɛ wobɛlbwa jaga la ta tele mɔɔ." 10Yeesu berɔ ŋɔ, "Harɛre ne ba dɔŋa harɛre ɛɛ yo laalee, asɛ koranar ne ba dɔŋa koranar ge yo dɔŋa laa. 11Harɛ ɛɛ jigri bobɛlaa taeh, asɛ lɔr ne weela bwa soosiwi ba bobɛla. Hɛɛ na ɔmewaa aa wola balɛ bwa nyunduaa. 12"Mɔɔ gɛ waa nɔ bwa chig la, baa tɔ sie larawe heya, dɛ ɛ heyaa hɔhɔrɔwa, dɛ lawɛ heyaa la cheremi deene bini dɛ ka bol he waa dɛ do heyaa dea. Baa koh n waa dɛ lawɛ heyaa ka che nomonome ne koranar siini. 13Belaa hɛɛ ba ŋwɛnɛ dɔe dɛ bol Amanesoma la bag ba. 14Ba baa lawɛ heya aa, he bɛ gel waa haa ka bol la hiah heya. 15Menee dɛɛ ba n tɛ heyaa waa haa ka bol la, dɛ tɛ heyaa wejema asɛ he dɔma bɛ won di bɔ heyaa kɛɛ dɛ tɔŋle heya. 16He mɛɛnanar ne nyare, ne he dɔɔranar ne nimanar, ne he lolanar ne daamanar ɛɛ le heyaa tɛ ásɛ ba kpoo he bane. 17N nomanta nɛra ɛɛ hah heyaa. 18Mɛɛ cha heyaa asɛ he nyumpon beŋkpoŋ kwara aa harɛɛ le. 19He lawɛ bambile aa, hɛɛ dɔ he nyuu. 20"He baa na kɛŋɔ soojare bar Jerusalam cheme aa, amɔ te hé jemɛ kɛŋɔ o pagra telo. 21Amɔ a chɛ kɛŋɔ nɛra baa lɔ Judia harɛ gɛ saŋ la chwa kaa bwea dor dɛ ka sɔh. Nɛra baa lɔ Jerusalam la chɛ kɛŋɔ ba le warane, asɛ bɛlbwa waa wola toole bwɛɛ la bini a gɛ saŋ la bɛ o bini jo. 22A gɛ saŋee Korowii ɛɛ ba o nɛra deŋne tɛra, asɛ waa Korowii Tɔn la aa bagla la bwa ɛ kpela. 23Tekpoŋra ne haahna baa dɔ bii baa ɔr la, bwɛɛlɛ! Dɛkalkɛŋɔ nɛra ɛɛ na wahala harɛ nɔ ta kohonaa, asɛ Korowii baah di ba nɛɛ o tɛr ba deŋne. 24Baa kpɔ kerii kpoo bane, asɛ dɛ larawe bane dɛ kpɔ ba kaa harɛ nɔ ta bobɛlbwa, asɛ nɛra baa wola Juda tena ɛɛ ɛ Jerusalam bwa posaposa ken ka tel kɛŋɔ ba ge saŋ aa ba kaa. 25"Hɛɛ na nyokpowaa wee ne korobie ne weweela taa. Harɛ ta ge, mpo ɛɛ jigruu dɛɛ lɔ nehaŋma kohona, asɛ nɛra bwa ɔmɛ, ba bwara yɔr. 26Nɛra bambile ee teŋoo kohona, ba lii waa aa dɛ ba bala la wa, ba hwaahge, dɛkalkɛ Korowii doa bwa ɛɛ yiiguu dɛ chɔg. 27Belaa baa ba n Nɛn Bie nae kɛŋɔ maa lɔ baama ta dɛɛ ba kpegri ne jirima a dɔŋ aa wola toole ne. 28Dɛ gɛ waa nɔ baa pa mun dɛɛ ɛ aa, hé kpɔ he te dɛɛ kpa, dɛkalkɛ he lɛɛ tɔpere la telo." 29Yeesu berɔ kpɔ sɛgla bol waa ba be ŋɔ, "Hé ta sie nyiŋi pur daa ne daa aa kaa nɔ dɛ na. 30O ba dɛ fogre aa, hé jemɛ kɛŋɔ bɔwɔb saŋ telo. 31Gɛ tentenee dɛ he ba dɛ na a gɛ waa nɔ naa, hé jemɛ kɛŋɔ Korowii Kora la dii telo. 32"Hé jemɛ kɛŋɔ fini nɔ nɛra bwa laa dɛɛ ba serewa mɔɔ waa nɔ bwa chig. 33Nyundua ne harɛ ɛɛ chɔgoo, kɛ n waa la te aa begre bwa. Aa che gɛɛ saŋ bɛlbwa. 34"Hé nyiŋi he te kɛrɛdɛ! He bɛ gel bodia kondikwaa dii ne sen nyɔe ne he weliira gwaa he nɛ, asɛ tɔpere la bɛ heyaa ba pigri kɛŋɔ nɛn yon gbarɛ bel la, 35dɛkalkɛ o bala tɔpere la ɛɛ pigri nɛra baa lɔ harɛ nɔ ta bobɛlbwaa. 36Hé gel he sie chɔ harɛ hɛɛ kpa dɛɛ soŋe Korowii tɔpere bɛlbwa dɛ́ dɔ bokpega dɛ le a gɛ waa aa chig la nyoa, asɛ dɛ won che n Nɛn Bie sie." 37Dɛ tɔpere bɛlbwaa Yeesu bol waa dɛɛ bag ba Korowii Dea, asɛ bɔr baa jo aa, o yon kaa bwe bɛl baa dɛ yerɔ Ɔlevere Bwe la doa dɛ ka chɔ. 38Asɛ tɔɔ perɔ chɔmbibi aa, o yon fel ba Korowii Dea bela, asɛ nɛra yon la o be dɛ́ ka no o waa la.

will be added

X\