Luk 18

1Yeesu kpɔ sɛgla bol waa bagle o habɔteŋra la, dɛ ŋɔ a chɛ kɛ baa soŋe Korowii saŋ bɛlbwa, dɛ bɛ bɔhwaah dɛɛ ɛ. 2O ŋɔ ba be ŋɔ, "Nomoa bɛlee fa lole dɛɛ bol waa dɛɛ pa bole kɔɔto, dɛ do bwɛɛ bɛl ta. Dɛ waa Korowii ɔmɛ, waa nɛn ge heeh. 3Dɛ bwɛɛ la tenten ta la, dɛ luhaah bɛl ge lɔ bela, o yon dɛɛ la nomoa la be dɛ kaa ŋɔ o be ŋɔ, 'Cha mɛ asɛ dɛ lɛɛ mɛ le n dɔm nɔn ta.' 4Dɛ kɔɔto nomoa la aa sie do o be, dɛ gel a bigri. A habɔɔ la o lii o nyu bini ŋɔ, 'Maa Korowii ɔmɛ, maa nɛn ge heeh, 5kɛ luhaah nɔ mare nɔ waa dɛ ɛɛ mɛ nɔ nomanta, mɛɛ nyiŋuu, dɛ gel o di bole, ásɛ o laa o melee waane kpɔ n nɛ.' " 6Yeesu ŋɔ o habɔteŋra la be ŋɔ, "He no gɛ kɔɔto nomonchɔge la aa bola aa? 7Dɛ nɛn waa do ken wono lɛ nɛn aa, ɛrɛɛ Korowii aa wola won cha o nɛra baa wia dɛɛ noo chɔɔ ne jwaana la dɛ lɛɛ ba le ba dɔma nɔn ta nɔ? Aa bigruu mɔɔ o cha ba aa? 8N dɛ ŋɔ he be ŋɔ, Korowii ɛɛ wonoo cha ba. Wɛɛ ɛa warane gee. Dɛ n Nɛn Bie la balaa, mɛɛ ba pu nɛra baa dɔ yarada harɛ nɔ taa te naa?" 9Yeesu sɛgle nɛra baa dɛ lii ba te kɛŋɔ ba ɛ nɛndɛɛga gwaa nɛra bwa la ŋɔ, 10"Awola bɛl nɛra banɛ bane la Korowii Dea dɛ kaa soŋe Korowii. Dɛ bɛl ɛ Farisii te asɛ bɛl ge ɛ nɛnchɔga baa dɛ lɛ lampoo la bɛl. 11Belaa Farisii te la ir che dɛ soŋe Korowii o nyu bini ŋɔ, 'Korowii, n dɛ jaame kɛŋɔ maa wola doe kɛ n bala baa dɛ bɔ apoo, baa wola kasinteŋ bol, dɛɛ bɔ jwamane nɔ. N dɛ jaame kɛŋɔ maa wola doe kɛŋɔ banchɔge nɔ waa dɛ lɛ lampoo nɔ. 12N dɛ vɔwɛ nyoa tɔpera anɛ yawanyoa bɛlbwa ta, dɛɛ bɔne kwaa maa dɛ dɔ bwa bini bɔre fi dɛ kpɔ beŋkpoŋ dɛ baa tɛ hen Korowii.' 13"Lampoo lɛɛ la te chegɛ bojaŋ, o ta sie hae dɛ nyiŋi nyundua kwara, kɛ dɛ kpɔ nɔɔra dawɛ nyu dɛ ŋɔ, 'Oo, N Naa Korowii, wechɔg-ɛɛree men. Na n sum dɛ kpɔ n wechɔga kɛ mɛ.' " 14Anee Yeesu ŋɔ, "N dɛ ŋɔ he be ŋɔ, lampoo lɛɛ la bee Korowii no dɛ kpɔ o wechɔga kɛo dɛ doo nɛndɛɛga bini, asɛ o kaa o dem. Farisii te la te, o ta o be noɛ. Nomɛlbwa waa dɛ gɔɔ o te la, Korowii dɛ ba o ne harɛ, asɛ nomɛlbwa waa ɛ o te nɛŋgwɛgre la, Korowii dɛ gɔɔro." 15Nɛra bane kpɔ ba bii ba o be ŋɔ ó kpɔ o nɔɔra dawɛ ba nɛɛ dɛ swee andɛɛga tɛɛ ba. O habɔteŋra la aa na ba la, ba kɔr ba kɛŋɔ baa dɛ ɛ gɛ la. 16Belaa Yeesu yerɛ bechale la ba o be, asɛ dɛ ŋɔ, "He bɛ bechale la ŋwɛnɛ tɔ. Hé gel ba ba n be, dɛkalkɛŋɔ banɔ dɔŋa nɔɔ Korowii koobii la. 17Kasinteŋ, naate waa wola o te kpɔe tɛ Korowii dɛ yaradao kɛŋɔ bechale nɔ la, waa Korowii Kora la ta dɔe ba dɛ ja bwa." 18Asɛ Juda tena nomoa bɛl bɔɔ Yeesu ŋɔ, "Nomondɛɛge, ɛrɛɛ chɛ kɛŋɔ n ɛ dɛ dɔ Korowii mkpa waa wola jaga dɔe bwa nɔ?" 19Anee Yeesu bɔɔro ŋɔ, "Ɛrɛɛ he yer mɛ nɛndɛɛge nɔɔ? Nomɛlbwa toole dɛ ɛ nɛndɛɛge, nemenɛ Korowii gbo. 20Kɛ he jemɛ Korowii mmarare la aa dɛ bagle kɛ, 'Bɛ jwamane bɔ, bɛ nɛn kpo, bɛ ŋwɛ, bɛ nyosone teŋe dawɛ he dɔŋ nɛ, dɛɛ duu he nya ne he mɛɛ' laɔ?" 21Anee baa la ŋɔ, "Gɛ saŋ maa ɛ bechala la bwaa n le dɛ teŋɛ anɔ bwa ta." 22Yeesu aa no gɛ la, o ŋɔ o be ŋɔ, "A ta kae webeŋkpoŋ. Ka yog kwaa haa dɔa, asɛ dɛ kpɔ a suuga kɛ nyaara. He ɛ gɛ naa, hɛɛ dɔ kwaa cheg Korowii doa. Ka ɛ gɛ asɛ dɛ ba teŋɛ n nɛ." 23Baa la aa no gɛ waa nɔ la, o tea bini chɔgɔ, dɛkalkɛŋɔ dɛ o dɔ suuga taeh. 24Yeesu nyiŋu dɛ na kɛŋɔ o tea bini chɔgɔ, asɛ o ŋɔ, "A kpegri kɛŋɔ dɔɔh dɔ bɔr ja Korowii Kora la ta. 25Aa do pwɛree tɛ nyogma kɛŋɔ o won jo tɔɔge bɔɔ ta gwaa kɛŋɔ dɔɔh naa wona jo Korowii Kora ta." 26Nɛra baa no waa nɔ la ŋɔ, "Amɔ te umee dɛɛ ba o nyu dɔe yɔ?" 27Anee Yeesu ŋɔ, "Waa aa kpega tɛ nɛn, waa wola won ɛ la, aa kpege Korowii te be. Wɛɛ wonoo ɛ." 28Asɛ Pita ŋɔ, "Nyiŋi na, ya te, ya gel komɛlbwa yaa dɔa dɛ baa teŋɛ he nɛɛ la." 29Anee Yeesu ŋɔ ba be ŋɔ, "Kasinteŋ, nomɛlbwa waa koh Korowii Kora nɔ waa dɛ gel o dem, kɛɛ o haah ne bii, kɛɛ o nya ne mɛɛ, kɛɛ o dɔɔranar ne o nimanar la, 30wɛɛ dɔ banee dɛ gwaa gɛ harɛ ta bonɔ. A bwa habɔɔ la, wɛɛ dɔ Korowii mkpa aa wola jaga dɔe nyundua laanee ja." 31Yeesu kpɔ o habɔteŋra fi dɛ banɛ la le bokɛre asɛ dɛ ŋɔ ba be ŋɔ, "Hé no! Ya dɛ kaa Jerusalam. Belaa men Nɛn Bie wobɛlbwa Korowii keamere la aa chwera la ɛɛ ba kpela ɛɛ. 32Baa kpɔ mɛɛ do nɛnhɔɔhra baa wola Korowii tomɛ la nɔn ta, asɛ ba di n loro, dɛ chɛg mɛ, asɛ dɛ ta nentane ta n nɛ. 33Baa lɔɔ mɛɛ dɛ kpo mɛ, asɛ a tɔpetooro wee la, n ir seo ta." 34Yeesu aa bol gɛ waa la ba be la, ba ta a bɛlbwa mun noɛ, dɛkalkɛŋɔ dɛ Korowii kpɔ a mun noe sɔɔh ba. Ba ta gɛ waa dɛ bol la mun noɛ. 35Baa dɛ tel Jeriko la, dɛ baa bɛl waa nyoŋa soge ŋwɛnɛ nyoa dɛɛ soŋe kwa. 36Waa no nɛnlaa la gbɔga ba baa kaa la, o bɔɔ waa aa bala. 37Anee ba ŋɔ o be ŋɔ, "Yeesu waa le Nasarɛt laanee ba dɛɛ kaa." 38Belaa o kpɔ takpeg ŋɔ, "Devid Naa Yeesu, na n sum dɛ cha mɛ!" 39Asɛ nɛra baa tɔ sie la kaoh ŋɔ ó tɔ nyoa. Dɛ name tenee o taa bola kohona kwara, dɛɛ ŋɔ, "Devid Naa, na n sum dɛ cha mɛ!" 40Anee Yeesu jagɛ che, dɛ ŋɔ bá lawɛ baa la waa nyoŋa la ba tɛo. Baa ba o ne o be la, Yeesu bɔɔro ŋɔ, 41"Bɔkwaa hɛɛ nyin kɛ n ɛ tɛɛ nɔ?" Asɛ baa la ŋɔ, "N Dɔɔ, n poori, gel n berɛ dɛɛ na ja." 42Belaa Yeesu ŋɔ o be ŋɔ, "He yarada lɛɛ. N chaeh. Na bɔr." 43Ate bug la ta dɛ o dɛ na bɔr, dɛ teŋɛ Yeesu nɛ, dɛɛ jam Korowii. Asɛ nɛra la bwa aa naa la, ba kpɛɛ Korowii.

will be added

X\