Luk 17

1Yeesu ŋɔ o habɔteŋra la be ŋɔ, "A ɛ wobɛlbwa, waa aa dɛ ba gela nɛn ɛ wechɔga la ɛɛ bao. Kɛ naate aa che o nɛɛ dɛ ba la, bwɛɛlɛ. 2Dɛ ba vɔwɛ nambwe do naate baŋa dɛ kpɔɔ ka ta moo vil ta kwara naa, a fe bɔ kɛŋɔ waa gela bechajegre nɔ dɔŋ bɛlbwa ɛ wechɔga. 3Anomanta hé nyiŋi he te kɛrɛdɛ! "Dɛ he dɔŋ ɛɛ wechɔga aa, ŋɔ o be. Dɛ o no a mun dɛ charɛ o liire aa, kpɔ o wechɔga kɛo. 4Dɛ tɔpere bɛlbwa o ɛɛ wechɔga kera anuanɛ, asɛ dɛ ba he be dɛ ba ŋɔ waa waa ɛɛ la, o kon chɔgaa, kpɔ kɛo." 5Yeesu habɔteŋra la ŋɔ o be ŋɔ, "Ya Dɔɔ, cha yaa dɛ gel ya dɔ yarada kohona." 6Asɛ Yeesu chaŋe ŋɔ, "Dɛ he yarada fe kan kɛŋɔ sipon gba aa, he fe ɛɛ wonoo ŋɔ dajen nɔ aa chega nɔ be ŋɔ ó chugri ka che moo ta, asɛ o no dɛ ɛ gɛ." 7Yeesu berɔ bɔɔ ba ŋɔ, "He bini umee dɛ dɔ bonɔɔ wɛɛ parɛ he koo kɛɛ wɛɛ nyiŋi he peera ta, asɛ waa le toma ta ba dem la, he den ŋɔ o be ó ba di kwaɔ? 8Akai! Haa o be gɛɛ ŋɔ. Hɛɛ ŋɔ o bee ŋɔ, 'Ɛ n kondikwaa ka cheg mɛ, asɛ dɛ kpɔ he te ba che n be tig ta dɛ ɛ n wobɛlbwa tɛ mɛ ń di kwaa tonɛ mɔɔ he ge ka di he kwa.' 9Bonɔɔ la ɛɛ dɔ jaamee waa o dɔɔ la aa doo a ta laanee yaa? Akai. 10Gɛ tentenee he waa do. Dɛ he ɛ waa Korowii aa do heyaa a ta ŋɔ hé ɛ aa, he bɛ he te kpɛɛ. Hé ŋɔ, 'Ya ɛ bonɔɔna yaa wola tɔnɔ dɔe. Toma aa chɛ kɛŋɔ ya ɛ la gboo ya ɛ la.' " 11Yeesu aa dɛ kaa Jerusalam la, o kpɔ Samaria harɛ ne Galilia harɛ jwɛh ta. 12Asɛ waa dɛ jo bwɛjega bɛl ta la, baala fi bane bwadabii weechɔga ane aa lɔ ba nɛɛ pa sie o be dɛɛ ba dɛ ba chemo. Ba chegɛ bojaŋ, 13dɛ ha nyoa ŋɔ, "Ya Dɔɔ Yeesu, na ya sum!" 14Belaa Yeesu aa na ba la, o ŋɔ ba be ŋɔ, "Hé kpɔ he te ka bagle Sɔfore la ásɛ ba nyiŋi heyaa na." Baa chig ŋwɛnɛ ta dɛɛ kaa la, ba weela la kaalɔ, ba bwara kwaa. 15Ba bini beŋkpoŋ aa naa kɛŋɔ o weela la kaalɔ o bwara kwaa la, o laa berɛ dɛ baa jam Korowii takpeg ne, 16dɛ ba guŋi Yeesu sie dɛ jaamo. Dɛ gɛ baa la ɛ Samaria tee. 17Anee Yeesu bɔɔro ŋɔ, "He lɔ nɛra fi n chah heya, leperaa banuanaarɛ la te dɔɔ? 18Ɛrɛɛ baa nɔ waa wola Juda te ɛɛ nɔ gbo won kpɔ jam ba tɛ Korowii nɔɔ?" 19Yeesu ŋɔ o be ŋɔ, "Ir kaa, yarada haa yarada mɛ nɔɔ gela he dɔ he te." 20Awola bɛl Farisii tena bane bɔɔ Yeesu ŋɔ, "Bɛweeree Korowii Kora la ɛɛ ba bala ɔ?" Anee o ŋɔ, "Korowii Kora la ta komɛl haa dɛ ba o nae ɛɛ. 21O ta komɛl yaa dɛ ba ŋɔe ŋɔ, 'Onee nɔ, kɛɛ onee ka lɔ le nɔ' ɛɛ. Bambile binii o do." 22Asɛ Yeesu ŋɔ o habɔteŋra la be ŋɔ, "Aa ba tel saŋ bɛlee asɛ hɛɛ nyin dɛ fe dɔ n Nɛn Bie la kɛŋɔ n ne haa soga tɔpebeŋkpoŋ gbo gba, kɛ haa gɛɛ dɔ. 23Nɛra bane ɛɛ ba ŋɔ he bee ŋɔ n lɔ bonɔ kɛɛ le nɔ. He bɛ ka nyiŋi. 24Gɛ bwaala yon nyɛgle nyundua bwa chaah la, gɛɛ n Nɛn Bie la bala ɛɛ ba doe, nomɛlbwa na mɛ. 25Kɛ a chɛ kɛŋɔ n na wahala kohona asɛ fini nɔ nɛra vɛɛh mɛ, mɔɔ anɔ bɛlbwa ba ɛ. 26"Gɛ aa ɛa Nowa bere saŋ la, gɛɛ n Nɛn Bie la ge bala saŋ ɛɛ ba ɛɛ. 27Nowa bere saŋ la, dɛ ba dɛ di kwa, dɛɛ nyɔ sene, dɛɛ mo haahna, dɛ lawɛ haahna tɛ baala baa mo, dɛ ka tel kɛŋɔ awola Nowa aa jo o gberjen la bini, asɛ bwaala nɛ aaa, mpo ne neerare bwa su tɔ harɛ bwa, asɛ ba bwa serewe kwaraa. 28"Gɛ tenten aa ɛa Lɔt bere saŋ ge asɛ Sodom tena ɛɛ di kwa, dɛɛ nyɔ sene, dɛɛ di bona, dɛɛ parɛ, dɛɛ ma deene la, gɛɛ aa ba ɛɛ. 29Awola Lɔt aa le Sodom dɛɛ kaa la, Korowii gelɔ nii ne jebɔrɔwe aa dɛ fuh le nyundua dɛ ba fuh Sodom tena bwa kwaraa. 30"Gɛ tentenee aa ba ɛɛ awola n Nɛn Bie la aa ba ja la. 31Awola tɔpere la, nomɛlbwa waa lɔ sal dea doa o laala do dea la, o bɛ tu ba kpɔ kpa. Gɛ tentenee nomɛlbwa ge waa do koo ta la, o ge bɛ dem ba dɛ́ ba kpɔ komɛlbwa kpa. 32Hé lii waa aa pu Lɔt haah la. 33Nomɛlbwa o siwi aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Asɛ nomɛlbwa ge o siwi aa wola harɛ nɔ ta silɛɛ kwaa ta lɛ la, wɛɛ dɔ o nyuu. 34Kasinteŋ, awola jwaana la, nɛra banɛ ɛɛ pɛo dɛ chɔ kalaŋ beŋkpoŋ ta, asɛ Korowii ba kpɔ beŋkpoŋ kaa dɛ gel bɛl. 35Haahna banɛ ɛɛ pɛo dɛɛ tuge kwa, asɛ Korowii ba kpɔ bɛl kaa, dɛ gel bɛl. 36Baala banɛ ɛɛ do koo taa, asɛ o ba kpɔ bɛl kaa dɛ gel bɛl." 37Anee o habɔteŋra la bɔɔro ŋɔ, "Ya Dɔɔ, leperaa aa ba chiga ɔ?" Asɛ o ŋɔ ba be ŋɔ, "Bela konlale aa lole la, belaa kokosakiri ɛɛ cheme."

will be added

X\