Luk 15

1Awola bɛl lampoo lɛɛra baa dɛ bɔ apoo ne wechɔg-ɛɛra teŋɔ dɛ ba bar Yeesu cheme dɛ́ no o wa. 2Anee Farisii tena ne Tɔn Jerema bane ŋwalɔ dɛ ŋɔ, "Gɛ baa nɔ dɛ lɛ wechɔg-ɛɛra o ne ba yon pɛ nɔn dɛɛ di kwa." 3Belaa Yeesu sɛg ba ŋɔ, 4"He bini umee dɛ dɔ peera lafa, asɛ beŋkpoŋ nyograa, waa wola o bɔree gaage ɔ? Wɛɛ gel fifraanuanaarɛ dɛ anuanaarɛ laanee a dibɔr tama dɛ ka gaage beŋkpoŋ waa nyogra la bɔr ka tel kɛŋɔ waa nao. 5Dɛ naate na a gɛ pee nɔ naa, silɛɛ kohona nomanta, wɛɛ kpɔɔ dawɛ vam ba dem. 6O ba dem aa, wɛɛ ŋɔ o daamanar ne nɛra o ne baa soga bwa bee ŋɔ, 'N sie lɛo kohona kɛŋɔ maa na n pee waa nyogra nɔ. Anomanta hé ba yá lɛ ya sie.' 7Kasinteŋ, gɛɛ aa ba Korowii doa ge doe. Wechɔg-ɛɛ beŋkpoŋ charɛ o liire dɛ le o wechɔga ta naa, Korowii ne o nyundua toroma sie ɛɛ lɛ o nɛɛ dɛ gwaa nɛra fifraanuanaarɛ dɛ banuanaarɛ baa dɛ lii kɛ ba ɛ nɛndɛɛga baa wola chɛɛ kɛŋɔ ba charɛ ba liire dɛ le ba wechɔga ta. 8"Gɛ laa ge aa, haah besoo lole dɛ dɔ suugapoŋa fi, asɛ dɛ beŋkpoŋ nyograa, waa wola niinii choŋi dɛ chaa o dea dɛ gaage o bɔr sibegra ne ka tel kɛŋɔ waa nao wɔ? 9O nao waa, wɛɛ yerɛ o daamanar ne nɛra o ne baa soga laanee dɛ ŋɔ, 'N sie lɛo kohona kɛŋɔ maa na n suugapoŋ waa nyogra nɔ. Anomanta hé ba yá lɛ ya sie.' 10Kasinteŋ, gɛɛ aa ba Korowii doa ge doe. Wechɔg-ɛɛ beŋkpoŋ charɛ o liire dɛ le o wechɔga ta naa, Korowii ne o nyundua toroma sie ɛɛ lɛ o nɛɛ taeh." 11Yeesu berɔ sɛg ba ŋɔ, "Baa bɛl fa dɔ bibaala banɛ. 12O bii la bini ombechala la ŋɔ o be ŋɔ ó bɔne o kpanjogo bini, asɛ dɛ tɛo o bɔr. Asɛ baa la bɔne o kpanjogo la bini tɛ o bii la, dɛ kpɔ o bie bechala la bɔr tɛo. 13A ta tɔpere bɛl dii, o bie bechala la yog o te kwaa la bwa, dɛ kpɔ o suuga jo pua bojaŋ kaa. Waa laŋa la, o kaa ɛ suuga la sagasaga ken. 14Waa baa di suuga la bwa la, a ta tɔpere bɛl dii, asɛ lɔrjen bɛl chole harɛ la ta bela waa lole la, dɛ o ta suuga dɔe, o ta kondikwaa ge dɔe dɛ́ di. 15Aa do gɛ la, o kpɔ o te ka pɛl bela te bɛl, asɛ o gel o kaa nyiŋi o prakooni nɛ. 16Lɔr la nyoa baa do kpegri kohona, asɛ o baa pɛlɛ prakooni la kondikwaa kwaraa nɛ, kɛ nomɛlbwa ge ta on komɛlbwa tɛɛ. 17"Asɛ o sie aa baa ba harɛ la, o sogo dɛ lii o mɛɛ waa dɛ ŋɔ, 'N mɛɛ bonɔɔna kwaraa baa lɔ o sie la di kwaa dɛɛ ka, asɛ n do bonɔ lɔr ɛɛ kpo mɛ la. 18Mɛɛ iruu dɛ la n mɛɛ be dɛ ka ŋɔ, "N mɛɛ, n ɛ wechɔga dɛ jo he ne Korowii bwa nɛ. 19N ta chɛɛ kɛŋɔ he yer mɛ he bie kpa. Kɛ n poori, lɛɛ mɛ dɛ kpɔ mɛ ɛ he bonɔɔna la bɛl." ' 20Bie la aa lii gɛ la, o iro chig ŋwɛnɛ ta dɛɛ kaa o mɛɛ be. Waa dɛ kaa o mɛɛ be la, o mɛɛ lɔ dem dɛ nao bojaŋ, asɛ o tea domɔ, o chwa dɛɛ chemo dɛ ka gbaaro pɛl o bambile. 21Belaa bie la ŋɔ, 'N mɛɛ, n jo he ne Korowii nɛ. N ta chɛɛ kɛŋɔ he yer mɛ he bie kpa.' 22Bie la nyoa ta lee mɔɔ dɛ o mɛɛ yerɛ o bonɔɔna ŋɔ, 'Hé chwa ka nyiŋi n yale la bwa bini ondɛɛge ba tɛo ó tɔ, dɛ kpɔ nonisegdɛɛge ba doo, dɛ nyin naŋgawa ba tɛo ó do. 23He tonaa, hé ka lawɛ nabie la bwa bini ondɛɛge dɛ ba kpo, ásɛ ya di kwa dɛ lɛ ya sie, 24dɛkalkɛŋɔ n fa liiro kɛŋɔ n bie nɔ sewɔ, asɛ o berɛ ba nɔ. O faa nyogra la, taraken te n nao.' Ate ba ɛ kondikwaare dɛɛ di dɛɛ lɛ ba sie tenten. 25"Waa nɔ bwa aa dɛ ɛ la, dɛ binomoa la le koo dɛɛ ba. Waa dɛ tel ba dem la, o no gboŋri ne yela ne sae gbɔga dem bela. 26Anee o yerɛ o mɛɛ bonɔɔna la bɛl dɛ bɔɔro ŋɔ, 'Bɔkwa waa chig deemɔ?' 27Anee o ŋɔ, 'He nime la waa joa kaa la, onee bala, asɛ he mɛɛ gel ya kpo nabie la bwa bini ondɛɛge la dɛ ɛ kondikwaa dɛ di dɛɛ lɛ ya sie, dɛkalkɛŋɔ wobɛlbwa ta on ɛɛ.' 28Asɛ binomoa la baah di, o kire ŋɔ waa deemii jo. Asɛ o mɛɛ ba larawo ŋɔ ó ba dem. 29Belaa bie la ŋɔ o mɛɛ be ŋɔ, 'N mɛɛ, n ge aa dena dɛɛ tomɛ saŋ la bwa, n ta he toma vɛɛh bwa, bɔkwa konee he tɛ mɛ nɔ? He ta bombie kwaraa lawɛ tɛ mɛ ŋɔ ń kpo, n ge ne n daamanar kpɔ lɛ sie bwa. 30Kɛ he bie nɔ waa kaa chɔg o suuga haahna nɛɛ dɛ ba nɔ, he berɔ garɛ kpo nabidɛɛge tɛo.' 31Anee baa la ŋɔ, 'N bidɛɛge, n ne haa lole nɔ, n komɛlbwa maa dɔa la, hen dɔa. 32He nime nɔ aa nyogra dɛ berɛ ba nɔ, a chɛ kɛŋɔ ya gel ya sie lɛ, dɛkalkɛŋɔ ya ŋɔ o sewɔ, o berɛ ba nɔ, ya ŋɔ o nyogrɔ, kɛ taraken ya nao.' "

will be added

X\