Luk 14

1Awola Ona Tɔpere bɛl, Yeesu la Farisii tena nomonome la bɛl dem dɛɛ la ka di kwa, asɛ nɛra baa lɔ bela la ɛɛ nyiŋu dɛɛ kari waa waa dɛ ɛ bwa. 2Dɛ baa bɛl waa suuga soge Yeesu sie bela, 3anee Yeesu bɔɔ Tɔn Jerema la ne Farisii tena la ŋɔ, "Ya mmarare la dɛ tɛ ŋwɛnɛ kɛ ba chah nɛn Ona Tɔpere aa?" 4Asɛ ba bwa hel. Anee o lawɛ baa la dɛ chaoh dɛ kpɔɔ ta o kaa. 5Asɛ o bɔɔ ba ŋɔ, "He bini umee o bie kɛɛ o nao le kɔlɔŋ bini Ona Tɔpere, waa wola on lawɛ le kɔlɔŋ la bini warane Ona Tɔpere la tenten ta nɔ?" 6Ba ta wone dɔ waane chaŋo a gɛ waa la ta. 7Nɛra baa yer ba ŋɔ bá ba di kwaa la aa bala la, dɛ ba dɛ pɛne sobɔrdɛɛga dɛ́ so. Anee Yeesu aa na ba gɛ la, o kpɔ sɛgla bol waa bag ba ŋɔ, 8"Dɛ nomɛl baa yerɛ heyaa hanfale kondikwaa mun ŋɔ hé ba di kwaa aa, he bɛ nomonsobɔra ka pɛne dɛɛ so. Aa bao kɛ o ken ka yerɛ nomɛl o nomonome aa gwaale. 9Dɛ o balaa, naate waa yerɛ he bwa la ɛɛ ba ŋɔ he bee ŋɔ hé ir dɛ kpɔ nomombɔr la tɛ nomoa la. Belaa hɛɛ ba sihiih kpɔe dɛ ir ka so bechasobɔr nɛra la bwa habɔɔ. 10Dɛ ba yerɛ a gɛ yer nɔ dɔŋ bɔr aa, ka so bechasobɔr, asɛ dɛ naate waa yerɛ la balaa, ó ba ŋɔ he be ŋɔ, 'N dam, ir kaa sie nomombɔr bela ka so.' An dɛ tɛɛ jirima nɛra baa yerɛ he ne ba bwa la siwi ta. 11Nomɛlbwa waa dɛ maŋkura o te la, Korowii ɛɛ ba o ne harɛɛ, asɛ nomɛlbwa waa dɛ pwɛr o te la, Korowii ɛɛ ɛo nɛnjenii." 12Yeesu aa bol gɛ waa nɔ tonɛ la, o ŋɔ baa la waa yer ba ŋɔ bá ba di kwaa la be ŋɔ, "Dɛ he ɛ kondikonjena webaŋa kɛɛ jwaana dɛɛ yerɛ nɛra ŋɔ bá ba di aa, bɛ he daamanar, he nimanar, he lola, kɛɛ he dɔŋa kondɔɔhna gbo yerɛ, dɛkalkɛŋɔ ba gee ɛ anee dɛ yerɛ, amɔ dɛ he kwaa la kemee ba bɔe la. 13Dɛ he ɛ gɛ kondikwaa nɔ soosiwi aa, yerɛ nyaara ne boobie ne nɛra ba nakpale aa teŋna, ne nyoŋa bá ba di, 14ásɛ Korowii ɛɛ andɛɛga, dɛkalkɛ ba ta komɛlbwa dɔe dɛ́ kpɔ bɔe kem. Awola nɛndɛɛga aa ir seo ta la, Korowii ɛɛ bɔe a kemee." 15Belaa nɛra Yeesu ne baa soge kondibɔr la bɛl no gɛ waa la, dɛ ŋɔ Yeesu be ŋɔ, "Nɛra baa ba ja Korowii Kora la ta dɛ di kwaa la, ba sie ɛɛ lɛo kɛrɛdɛ!" 16Anee Yeesu sɛg ba ŋɔ, "Baa bɛlee fa lole dɛ ɛ kondikonjena, dɛ yerɛ nɛra pirim ŋɔ bá ba di. 17Bɔr magrɔ kɛ bá ba kondikwaa la dibɔr, asɛ o tomɛ bonɔɔ ŋɔ ó ka yerɛ nɛra waa yer ba la ŋɔ bá ba, kɛ o tonɛ komɛlbwa. 18Bonɔɔ la aa la ba be la, ba bwa ŋɔ ba ta bɔr dɔe, dɛ vɛh. Sitɔte la ŋɔ bonɔɔ la be ŋɔ o yawɛ harɛ bɛl a chɛ kɛ o la dɛ ka nao, anomanta bónɔɔ la ka ŋɔ o dɔɔ be ŋɔ o bɛ gel a ɛ waane kɛ waa wola bɔr dɔe dɛ ba la. 19Bɛl ge ŋɔ o yawɛ nae fi dɛ vɔrɔwe kwaa doa dɛɛ kaa a ne koo dɛ́ ka parɛ a ne dɛ na, kɛ tórome la ka ŋɔ o dɔɔ be ŋɔ o bɛ gel a ɛ waane kɛ waa wola bɔr dɔe dɛ ba la. 20Bɛl ge ŋɔ waa mo haah ta bigre, anomanta waa won ba. 21"Asɛ bonɔɔ la la dɛ ka ŋɔ o dɔɔ la be gɛ baa bola la. Anee o dɔɔ la baah di, o ŋɔ o bonɔɔ la be ŋɔ, 'Ɛ warane kaa fɔgbaah ne lomoola ta dɛ ka yerɛ nyaara ne boobie ne nyoŋa ne nɛra ba nakpale aa teŋna ásɛ ba ba di kwaa la.' 22A ta bigre bɛlbwa bonɔɔ la ba dɛ ba ŋɔ o dɔɔ la be ŋɔ, 'N la he tom la, kɛ sobɔra ane ta chɔ le pɛɛpɛɛ.' 23Anee o berɛ ŋɔ bonɔɔ la be ŋɔ, 'La ŋwɛnɛre ta ne dahare, nomɛlbwa haa nao la, lawɔ ba ásɛ n dem bonɔ su. 24Kasinteŋ, n dɛ ŋɔ he be, nɛra n faa yer ba la bini bɛlbwa aa n kondikwaa nɔɔ di kpa!' " 25Awola bɛl, nɛnlaa bane ja Yeesu nɛɛ o ne baa kaa, asɛ o ka berɛ o te dɛ ŋɔ ba be ŋɔ, 26"Dɛ nomɛlbwa ba n be o ta men nyine gwaa o mɛɛ ne o nya, ne o haah ne bii, o dɔɔranar ne nimanar ne nimambii dɛ o gbagba aa, waa won ɛ n habɔteŋre. 27Nomɛlbwa waa wola won kpɔ o te tɛ, dɛ sɛh wahala nae ne seo bwa, dɛ teŋɛ n nɛɛ kɛŋɔ nɛn waa kpɔ dagagre che bá ka kpaaro pɛl o ta la waa won ɛ n habɔteŋre. 28Dɛ he bini bɛl dɛ nyin kɛ o do abrɔsane aa, waa nyiŋi na kɛŋɔ o dɔ suuga aa dɛ ba wona tel la aa? 29O ta nyiŋe kɛrɛdɛ mɔɔ dɛ pa dea la mun, dɛ o ta ba wone tonɛ dea la doe yaa, nɛra ɛɛ mamɔɔ, 30dɛ ŋɔ, 'Baa nɔ laa fe dɛ do dem la aa? O laa hora naa?' 31"Dɛ kooro ne o koodɔŋ bɛl dɔ yoi, o dɔ nɛra kagboŋa fi o dɔŋ la ge dɔ nɛra kagboŋa fifraanɛ naa, waa so dɛ lii kɛ wɛɛ wonoo kpɔ o nɛra la ka pu o dɔŋ la waa dɔ nɛra gwaalo la mɔɔ dɛ le ka puu wa? 32O ne o dɔŋ la baah taa jaŋa o na kɛŋɔ waa won puu yo la, wɛɛ do toromaa bá ka larawo ásɛ ba pɛ. 33Gɛ tentenee a chɛ kɛ he so lii mɔɔ. Nomɛlbwa ta o komɛlbwa gelaa, waa won ɛ n habɔteŋre. 34"Yar wer, kɛ dɛ aa somɛ kpa a, ɛrɛɛ bá berɛ dɛɛ ba a ɛɛ á do som jaɔ? 35A ta wejema bɛlbwa dɔe kpa. Aa harɛ gba kwaa. Fugaa a den chɛ kɛŋɔ ba fuga ta. He naate haa no la, no."

will be added

X\