Luk 13

1Gɛ saŋ la dɛ nɛra bane lɔ bela dɛ ŋɔ Yeesu be ŋɔ Galilia tena bane fa kpoo kwaa dɛɛ tɛ Korowii, asɛ Paelet kpoo ba, asɛ ba chal koo kwaa baa kpoa tɛ Korowii la chal ta. 2Asɛ Yeesu chaŋ ba ŋɔ, "He dɛ lii kɛŋɔ waa aa pu a gɛ Galilia tena nɔ dɛ bagle kɛ ba wechɔga gwaa Galilia tena baa kaa la kwaa kɛɛ? 3N dɛ ŋɔ he be ŋɔ, gɛ laa a do. Dɛ he ta he liire charɛ le he wechɔga ta naa, he bwa gee serewoo." 4Yeesu berɔ ŋɔ, "Asɛ nɛra fi dɛ banuatoro bane dejaŋ bɛl aa kua chole ba nɛɛ Siloam ba bwa serewe la geɔ? He liire dɛ ɛ heyaa kɛ ba wechɔga gwaa nɛra baa lɔ Jerusalam bwa kwaa kɛɛ? 5N dɛ ŋɔ he be ŋɔ, gɛ laa a do. Dɛ he ta he liire charɛ dɛ le wechɔga ta naa, he bwa gee serewoo." 6Yeesu sɛg ba ŋɔ, "Baa bɛlee fa lole dɛ du daa bɛl o koo ta. O laŋɔ ŋɔ ó ka nyin o nɔna togri, o ta nɔn beŋkpoŋ kwaraa dɔe o ta. 7Anee o ŋɔ nɛn waa kpɔɔ wɛɛ nyiŋi koo la ta la be ŋɔ, 'Na, bene atoroo nɔ maa dɛ ba bonɔ dɛ baa nyin daa nɔ nɔna, kɛ maa ane dɔ. Anomanta teŋo ta! Ɛrɛɛ o che bonɔ dɛ lɛ bɔr dɛɛ ɛɔ?' 8Asɛ nɛn waa dɛ nyiŋi koo la ta la ŋɔ, 'N Dɔɔ, gel o che benanyoa beŋkpoŋ ja yá na. Mɛɛ kwi o munii dɛ che nabena do o mun ta. 9Dɛ benanyoa chemo o nɔnaa, amɔ te dɛ anee. O ta wone nɔnɛ ge aa, asɛ hé teŋo ta.' " 10Awola Ona Tɔpere bɛl, dɛ Yeesu dɛ bagle waa ba cheremi dea bɛl ta. 11Dɛ haah bɛl kwa aa dɛ ir o nɛɛ dɛ kpɔ weela ta o nɛɛ bene fi dɛ anuatoro dɛ guro waa wola won pee o te kwaraa lɔ bela. 12Yeesu aa nao la, o yerɔ dɛ ŋɔ o be ŋɔ, "Haah, le fini dɛɛ kaa, he weela kaalɔ, aa ba kpa." 13Yeesu kpɔ nɔɔra dawɛ haah la nɛ, asɛ bug la ta o won pee o te, dɛ jam Korowii. 14Cheremi dea bela nomoa la baah diu kɛ Yeesu aa chah nɛn Ona Tɔpere ta la, dɛ ŋɔ nɛra la aa lɔ bela la be ŋɔ, "Tɔpera anumɛlee chɛ kɛŋɔ ya kpɔ dɛɛ ɛ toma. Anomanta a gɛ tɔpera la taa chɛ kɛ he baa chah he weela, kɛ Ona Tɔpere te ta laa!" 15Anee Yeesu ŋɔ, "Nɛra haa dɛ nyiŋi nɛn sie bɔr mɔɔ dɛɛ ɛ wa! Haa he nae ne keegore yae dɛɛ ta Ona Tɔpere dɛ tega la nee ta á kaa nyɔ ne aa? 16Haah nɔ, Abraham naa on. Bene fi dɛ anuatoroo la Bɔnsam aa soge o nɛɛ dɛ chɔgo, aah aa were kɛ ba doŋi Bɔnsam la le o nɛɛ Ona Tɔpere dɛ lɛo ta aa?" 17Yeesu aa bol gɛ la, sihiih kpo o dɔma la. Kɛ nɛnlaa baa kaa la te sie lɛ nyokpowaa waa ɛa la ta. 18Anee Yeesu berɛ ŋɔ, "Ɛrɛ tenee Korowii Kora waa la doɔ? Bɔkwa konee mɛɛ ba o kpɔe dɛ magɔɔ? 19O waa tamaa bɛlbwa won yɛɛra kɛŋɔ baa bɛl aa ira dɛ kpɔ mastad bii waa do jegaa gwaa daa bɛlbwa bi, dɛ kpɔ ka du, asɛ o le dɛ ɛ da, jumbii sɔh kɔne do o kpala ta." 20Yeesu berɔ ŋɔ, "Bɔkwa konee ń berɛ kpɔ Korowii Kora waa la magɛ jaɔ? 21A won komɛlbwa begra kɛŋɔ haah bɛl aa ira dɛ kpɔ iisi tama ka koo men logbaa del ta, asɛ a won gel men la bwa uge." 22Yeesu chig ŋwɛnɛ ta dɛɛ kaa Jerusalam. Waa dɛ kaa la, o kpɔ bwɛjena ne bwɛjegre ta dɛɛ bagle nɛra wa. 23Anee nomɛl bɔɔro ŋɔ, "N Dɔɔ, nɛra tama kenii Korowii ɛɛ ba lɛɛ yaa?" Asɛ Yeesu ŋɔ ba be ŋɔ, 24"Hé takapɔ dɛ kpɔ doonyoa waa do feelɔɔ o ta joe do kpegri la ta dɛ jo ka ja Korowii Kora la ta, dɛkalkɛŋɔ nɛra ɛɛ warɔɔ dɛɛ nyin dɛ jo bela, kɛ baa won dɔ bɔr jo. 25Dem te la ɛɛ iruu dɛ ba laa gbera la tɔ, a ka heyaa che baŋ, asɛ hɛɛ lɔ gbera dɛɛ soŋo ŋɔ, 'N poori, nomoa! Laa gbera ya yaa ásɛ ya jo.' Asɛ o ŋɔ he be ŋɔ, 'Maa heyaa jemɛ bobɛlbwa.' 26Belaa hɛɛ ba ŋɔe ŋɔ, 'Ya ne he fa pɛ nɔn di kwa, asɛ he bol waa bagle yaa ya bwɛɛ ka.' 27Asɛ o berɛ ŋɔ he be ja ŋɔ, 'N ŋɔ maa heyaa jemɛ bobɛlbwa. Hé le n nɛɛ kaa, nɛnchɔga bane!' 28"Bela la, hɛɛ na Abraham ne Aesek ne Jekɔb ne Korowii keamere la bwa Korowii Kora la taa, asɛ Korowii doŋi he te ta. Belaa aa ba he nɛɛ wee, asɛ hɛɛ wi. 29Nɛra ɛɛ le wee leebɔr ne wee cholibɔr ne harɛ nɔ ta bobɛlbwaa dɛ ba ja Korowii Kora la ta, asɛ dɛ pɛ nɔn di kwaa dɛ lɛ sie. 30Hé jemɛ kɛŋɔ nɛra baa ka mun taraken ɛɛ ba tɔ siee, asɛ nɛra baa tɔ sie la ge ba kaa mun ta." 31Yeesu taa chegɛ bug la ta la, Farisii tena bane ba o be dɛ ba ŋɔ o be ŋɔ, "A chɛ kɛ he le bonɔ dɛ kaa bobɛl, dɛkalkɛŋɔ Kooro Hɛrɔd dɛ nyini dɛ́ kpoe." 32Anee Yeesu ŋɔ ba be ŋɔ, "Hé ka ŋɔ baradeɛre te la be ŋɔ, 'Mɛɛ so lee dɛɛ doŋi kwaa aa dɛ ir nɛra nɛ, dɛɛ chah weela tena tɔpera anɛ mɔɔ dɛ tonɛ n toma.' 33Mɛɛ sewɔɔ te, kɛ a chɛ kɛ n valɛ ŋwɛnɛ tɔpera anɛ dɛ kaa Jerusalam. Bela laa baa kpoo Korowii keamere aa? 34"Oo, Jerusalam tena! Korowii tomɛ o keamere he be naa, gɛɛ he kpoo ba, o tomɛ toroma he be naa, gɛɛ he fog ba bwea. Saŋ bɛlbwaa mɛɛ nyin kɛ n kpɔ nɔn tɔ he nɛɛ kɛ jal aa lawɛ o bii dɛɛ do o kena lɔgre la, kɛ haa nyin kɛ n lawɛ heyaa pɛ. 35Taraken te, Korowii ta he waa tɛ heya. Kasinteŋ, n dɛ ŋɔ he be, haa men na kpa ka tel gɛ saŋ maa ba ja, asɛ he ŋɔ, 'Woowo! Korowii Biee chegɛ o sɔn ta dɛɛ ba la!' "

will be added

X\