Luk 11

1Awola bɛl, dɛ Yeesu lɔ bobɛl dɛɛ soŋe Korowii. Waa tona la, o habɔteŋra la bɛl ŋɔ o be ŋɔ, "N Dɔɔ, bagle yaa Korowii soŋa, gɛ Jɔn aa bagle o habɔteŋra la." 2Anee Yeesu ŋɔ ba be ŋɔ, "Dɛ he dɛ soŋe Korowii aa, hé ŋɔ, 'Ya Mɛɛ haa lɔ nyundua, henee chɛ duura. Bagle he Kora dii harɛ nɔ ta. 3Tɛ yaa ya fini kondikwa, 4dɛ kpɔ ya wechɔga kɛ yaa, gɛ yaa kpɔ ya dɔŋa wechɔga dɛɛ kɛ ba la. Dɛɛ ke yaa wechɔga lugri ta.' " 5Asɛ Yeesu ŋɔ o habɔteŋra la be ŋɔ, "He kpɔ kɛŋɔ he bini bɛl dɔ o dam, dɛ la ka chumu harambaŋa, dɛ ŋɔ o be ŋɔ, 'N dam, kem mɛ pea atoro. 6N dam bɛl le bobɛl ba chog mɛ taraken, n ge ta komɛlbwa dɔe dɛ́ tɛo ó di.' 7Dɛ he soŋo gɛ naa, wɛɛ wonoo ŋɔ hé gelo, ŋɔ he bɛ o dom chɔg ŋɔ o karɛ o gbera o ne o bii chɔ, anomanta waa won ir dɛ tɛɛ komɛlbwa naa? Akai! Waa won ŋɔ gɛ. 8Kasinteŋ, dɛ a ka darame la gbo wa aa, o fe aa ir dɛ tɛɛ komɛlbwa. Kɛ haa wola kaalɛ, dɛ ta che dɛɛ soŋo la nomanta, wɛɛ tɛɛ komɛlbwa haa dɛ nyin laanee. 9"Anomanta gɛɛ a do hɛ́ɛ soŋe Korowii, wɛɛ tɛ heyaa. Hɛ́ɛ nyin he konnyina o be, hɛɛ dɔɔ. Hé swɛɛ siwi dɛɛ lɔ gbera, wɛɛ ya heyaa. 10Nomɛlbwa waa dɛ soŋo la dɛ dɔ, asɛ nomɛlbwa waa dɛ nyin o konnyina dɛɛ le o be la, o dɛ tɛo. Gɛɛ Korowii ɛɛ ba gbera yae dɛ tɛ nomɛlbwa waa dɛ lɔ la. 11"He bini umee o bie ɛɛ nyin pɛŋe, ó ka lawɛ harɛkon ba tɛo wɔ? 12Kɛɛ dɛ o dɛ nyin jahal aa, ó ka lawɛ nɔm ba tɛo wɔ? 13Dɛ he wechɔg-ɛɛra nɔ kwaraa jemɔ dɛ kpɔ kondɛɛga dɛɛ tɛ he bii aa, ɛrɛ waa he Mɛɛ waa lɔ nyundua la te aa wola nɛra baa dɛ soŋo o Domadɛɛge la tenee tɛo!" 14Dɛ Yeesu dɛ doŋi kwaa aa lɔ baa bɛl nɛɛ o berɛ amumu. Kwaa la aa le baa la nɛɛ la, o bol wa. Nɛnlaa la aa lɔ bela la nyoa kpoo. 15Bane te ŋɔ, "Kwaa aa dɛ ir nɛra nɛɛ bwa nomoa baa dɛ yerɔ Bɛlsebul la, onee tɛo kpegri wɛɛ doŋi kwaa la." 16Dɛ bane ge dɛ nyin dɛ daahno na dɛ ŋɔ o be ŋɔ ó ɛ we-ɛɛla ane asɛ dɛ bagle kɛ onee nɛwɛnyini Lɛɛ la. 17Yeesu aa jemɛ waa baa dɛ lii la, o ŋɔ ba be ŋɔ, "Dɛ harɛ bɛl ta tena bini pere anɛ ba gbo ɛɛ yo aa, harɛ la dɛ pagre. Gɛɛ dɛ waane ba lola bɛl bini asɛ ba pere anɛ dɛ gbo ɛɛ yo aa, lola la aa won ɛ lola. 18Anomanta dɛ Bɔnsam kora bini pero baa yo aa, o kora la aa won ɛ kora. Heyaa ŋɔa ŋɔ Bɛlsebulee tɛ mɛ kpegri n won kwaa aa dɛ ir nɛra nɛɛ doŋa. 19Dɛ Bɛlsebul nɛɛ n che dɛɛ doŋa aa, a wer. Aah dɛ he ge, umee tɛ he habɔteŋra nɔ kpegri ba won a doŋa ɔ? He gbagba habɔteŋra la we-ɛɛlaa dɛɛ bagle kɛŋɔ he kono kwara! 20Korowii kpegri nee mɛɛ doŋi kwaa aa dɛ ir nɛra nɛɛ la. Anomanta hé jemɛ kɛŋɔ Korowii Kora dii la telo tonɛ. 21"Dɛ bokpega te kpɔ o dɔmkwaa dɛɛ daah o dem kɛrɛdɛ naa, o komɛlbwa aa chɔg. 22Kɛ dɛ bɛl ge berɔ do kpegri gwaalo dɛ ka puu dɛ pɔ o nɛ aa, o dɛ kpɔ o dɔmkwaa waa kpɔ o sie dawɛ a ta la, dɛ kpɔ o kondɔɔh ja. 23"Nomɛlbwa waa wola n nɛɛ jae la aa n waa nyin. Nomɛlbwa waa wola men chae dɛɛ boa n nɛra nyoa dɛɛ pɛ la lɔ ba dɛɛ pegre. 24"Fini nɔ nɛra do kɛŋɔ nɛn Bɔnsam aa gela o torome bɛl do o nɛɛ dɛ chɔg o da. A habɔɔ la naate charɛ o liire, asɛ Bɔnsam torome la le o nɛɛ dɛ kaa ka nyin bofale dɛ́ so. O gaagaa, o ta wone dɔ bɔr dɛ́ so onɛ, dɛ berɛ ŋɔ, 'Mɛɛ kaa n bug ta bela maa lea ba laanee,' 25dɛ berɛ ka na kɛ baa la liire bini chaahnɔ kɛŋɔ dea baa chaaro dɛ kwaaro kɛrɛdɛ ba ta nɛn kpɔe do o ta dɛ gel o chɔ pɛɛ la. 26Gɛɛ o yon la ka kpɔ o bala anuanɛ aa gwaalo kwara. A bwa won ba so naate la nɛ, dɛ chɔg o da gwaa gɛ o faa doa wubwa la. Gɛɛ aa ba doe fini nɔ nɛra baa ɛ nɛnchɔga nɔ nɛ." 27Yeesu aa bol gɛ waa nɔ tonɛ la, haah bɛl bol waa o be takpeg ne nɛra la baah ta, dɛ ŋɔ, "Haah waa lolɛ dɛ dɛɛre la na som." 28Anee Yeesu ŋɔ, "Nɛra baa dɛ no Korowii Waa dɛɛ teŋɛ a ta laanee na som." 29Nɛra la aa bar Yeesu cheme pirim la, o ŋɔ ba be ŋɔ, "Ɛrɛɛ fini nɔ nɛra ɛ nɛnchɔga ken?" Ba dɛ nyin nyokpowaa dɛ na mɔɔ dɛ yarada kɛ Korowii bee n le, kɛ baa dɔ na. Waa aa pu Korowii keame Jona la dɔŋa gboo dɛɛ ba n ge pui ásɛ he che a ta dɛ jemɛ n nɛnsoo. 30Gɛ Korowii aa ɛ Jona dɛ bagle Niniwe tena kɛ on tomɔ la, gɛ tentenee wɛɛ ba men Nɛn Bie la ge ɛɛ dɛ bagle fini nɔ nɛra kɛ on tom mɛ. 31Awola nɛra bwa aa ir seo ta dɛ ba che Korowii sie asɛ o bol ba waa dɛ pa bole la, Seba kooro waa ɛ haah la ɛɛ bol waa bɔ fini nɔ tena, dɛkalkɛŋɔ o valɔ le o harɛ ta bojaŋ le dɛ́ ba no Kooro Solomɔn wejemwa. Kɛ kasinteŋ, naate waa gwaa Kooro Solomɔn lɔ bonɔ, asɛ he ŋɔ haa o bee no. 32Niniwe tena gba ɛɛ bol waa bɔ fini nɔ tena, dɛkalkɛ ba te no Korowii Waa Jona aa bola la mun dɛ charɛ ba liire le ba wechɔga ta. Kɛ kasinteŋ, naate waa gwaa Jona lɔ bonɔ, asɛ he ŋɔ haa o bee no. 33"Nomɛlbwa aa kandea choŋi asɛ dɛ kpɔ dɛɛ sɔh dea bini, bela nomɛlbwa aa wola on na, kɛɛ dɛ kpɔ kon pi o ta. Ba choŋi kandea aa, ba kpɔɔ dɛɛ chɔŋɛ kon ta asɛ wɛɛ chaah nomɛlbwa waa dɛ ba bela. 34Sibie do kɛ kandea dɛ tɛ nɛwɛnyini. He sibie wer aa, he dɛ na bɔr. Dɛ a chɔgɔ ge aa, amɔ dɛ he lɔ biro ta. Gɛɛ a do, dɛ he sie begre Korowii waa ta naa, dɛ he wobɛlbwa ta chaahnɔ. Kɛ dɛ he sie begre harɛ nɔ ta kwaa ta naa, he lɔ biro ta. 35Anomanta hé nyiŋi kɛrɛdɛ ásɛ he sie won chaah waa Korowii aa kpɔa tɛ heyaa la ta, he bɛ biro ta so. 36Dɛ he sie begre Korowii waa ta, asɛ he gel wetɔŋla ne dachɔge bɛlbwa dɛ lɛ Korowii wa aa, gɛɛ he sie ɛɛ ba chaahna kɛrɛdɛ Korowii waa la ta, kɛŋɔ baa choŋi kandea asɛ wɛɛ chaah bɔr kohona la." 37Yeesu aa bol waa tonɛ la, Farisii te bɛl yerɔ ŋɔ ó ba di kwaa o dem. Anee o la baa la dem dɛ ka so dɛɛ ba kwaa dii. 38A ɛ Farisii te la nyokpoa kɛ waa dɛ ba kwaa dii la, o ta nɔɔra samɛ gɛ ba nawee wa aa dɛ bagle la. 39Asɛ Yeesu ŋɔ o be ŋɔ, "He Farisii tena do kɛŋɔ baa loo numoli ne hɛne bwara dɛ gel a bini la. Nɛra sie ta waa gboo hɛɛ ɛ, kɛ he bambile bini te, wechɔga ne kwaa ta sibegra gboo he bwa. 40Gɛna! Korowii waa ta yaa nɔ, o laa ɛ ya bini ne ya baŋ bwa kɛɛ? 41Hé kpɔ kwaa haa nyina cheg la dɛɛ kɛ nyaara he bambile bwa ne ásɛ komɛlbwa do wer tɛ heya. 42"He Farisii tena, hé bwɛɛlɛ kɛ haa dɛ tɛ Korowii o bɔr he par nyoa kondikonjegre kwaraa ta, kɛ dɛ vɛh kasinteŋ ne Korowii nyina te la. Anɔ nɔɔ chɛ kɛ hɛɛ ɛ, kɛ he bɛ anɔ la aa jaa la gel. 43Farisii tena, hé bwɛɛlɛ kɛ haa dɛ nyin sobɔrdɛɛga cheremi deene bini, dɛɛ nyin kɛ baa duu heyaa nɛra baah ta nɔ. 44Hé bwɛɛlɛ! He do kɛŋɔ ŋwama nɛra aa wola a waa jemɛ dɛɛ valɛ a ta ken." 45Belaa Tɔn Jerema la bɛl ŋɔ Yeesu be ŋɔ, "Nomoa, dɛ he ŋɔ gɛ naa, dɛ he jo ya gba nɛ." 46Anee Yeesu chaŋo ŋɔ, "He Tɔn Jerema haa dɛ bagle Korowii Waa la ge, hé bwɛɛlɛ. He kpɔ wekpega aa do kɛŋɔ bone dɛ dawɛ nɛra nɛ, kɛ dɛ te berɛ laa nɔn kpɔ a ta. 47Hé bwɛɛlɛ. Heyaa ma kwaa chɔŋre Korowii keamere ŋwama ta la. Gɛ nɛra nɔ laa he naanar kpoo la aa? 48Kwaa haa maa chɔŋre Korowii keamere la ŋwama la ta la baglɔ kɛŋɔ he gbabir sɛh waa he naanar aa ɛa la ta. 49Anɔ waa Korowii bol o Tɔn la baa dɛ yerɔ Wejema la bini ŋɔ, 'Mɛɛ tomɛ n keamere ne toroma ba bee, baa kpoo banee dɛ fiigi bane' la. 50Anomanta Korowii ɛɛ pɛɛ fini nɔ nɛra o keamere nɛra aa kpoo ba le harɛ mumpar la bwa waa. 51Dɛ le Abɛl kpoe ta ka tel Sakaria baa kpoo bela baa dɛ fuh kwaa dɛɛ tɛ Korowii ne Korowii Dea la tenten baah ta la. Kasinteŋ, n dɛ ŋɔ he be, Korowii ɛɛ pɛɛ fini nɔ nɛra ba bwa waa. 52Hé Tɔn Jerema ge bwɛɛlɛ! He do kɛŋɔ nɛra baa laa dea Korowii wejema aa lɔ o bini karɛ, dɛ laa koŋkare la kpɔ haa wola o binii jo, he ge aa nɛra ŋwɛnɛɛ tɛ ba jo dɛ ka hweli." 53Yeesu aa le bela kaa la, Tɔn Jerema la ne Farisii tena la mugli o baah taeh, dɛ gel o bol waa kohona, 54dɛ hagro bela dɛ́ lawɛ o nyoa.

will be added

X\