Jn 9

1Yeesu ne o habɔteŋra aa dɛ valɛ la, o na baa bɛl baa lolɔ nyoŋe. 2Belaa o habɔteŋra la bɔɔro ŋɔ, "Nomoa, baa nɔ ne o nya ne o mɛɛ, ba bini ume wechɔgaa ba nyoŋa nɔ ne nɔɔ?" 3Anee Yeesu ŋɔ, "Baa nɔ ne o lolanar bini bɛlbwa wechɔga be laa a le. Gɛ Korowii aa chagle o kpegri o nɛɛ waa a ba gɛ la. 4A wer kɛŋɔ bɔr aa chaahna nɔ, ya swɛɛ siwi dɛɛ ɛ Naate waa tom mɛ la toma, dɛkalkɛ bɔr dɛ ba bira nomɛlbwa aa wola won ɛ toma bɛlbwa kpa. 5N taa lɔ harɛ nɔ ta bonɔ nɔ, menee kandea dɛɛ chaah nɛra bwa." 6Waa bol gɛ tonɛ la, o ta nentane ta harɛ dɛ tegɛ a ne teera, dɛ kpɔ fɔgɛ baa la sie. 7Asɛ dɛ ŋɔ, "La tam la baa dɛ yerɔ Siloam la ta dɛ ka samɛ he sie." Gɛ sɔn Siloam la munii kɛŋɔ "Ba tomɔ." Waa laŋa dɛ ka samɛ o sie la tonɛ la, dɛ o dɛ na, dɛ berɛ ba buse. 8Belaa o bala ne nɛra ba faa nao ka kɛ o fa nyoŋɔ dɛɛ soŋe kwaa la ŋɔ, "Baa nɔ laa fa yon so dɛɛ soŋe kwaa la aa?" 9Bane ŋɔ, "Onee," asɛ bane ge ŋɔ, "Akai, o laa, lee wɛɛ leo." Asɛ baa la ge gbagba ŋɔ, "Menee!" 10Anee ba bɔɔro ŋɔ, "Ɛrɛɛ a ɛ he berɛ ɛɛ na nɔɔ?" 11Belaa o ŋɔ, "Baa la baa dɛ yerɔ Yeesu laanee ta nentane dɛ tegɛ a ne teera pɛ dɛ kpɔ fɔgɛ n sie, dɛ ŋɔ ń la Siloam ta dɛ́ ka samɛ ta. Asɛ maa laŋa dɛ ka samɛ la, bug la ta mɛɛ na la." 12Anee ba pɛɛro ja ŋɔ, "Leperaa o dɔɔ?" Asɛ o ŋɔ, "Maa jemɛ bela waa lole." 13Belaa ba lawɛ baa la o faa nyoŋa la dɛ kaa o ne Farisii tena sie. 14Dɛ tɔpere Yeesu aa tegɛ nentane pɛ teera ta dɛ kpɔ chaoh la ɛ Ona Tɔpere. 15Belaa Farisii tena la berɛ pɛɛro gɛ aa ɛa asɛ o won dɛɛ na. Anee o ŋɔ, "Kpechɛgree o kpɔ maa n sie asɛ n samɛ ta taraken dɛ won dɛɛ na la." 16Asɛ Farisii tena la bane ŋɔ, "Baa nɔ ta Korowii be leɛ, dɛkalkɛ o chɔg Ona Tɔpere." Bane ge ŋɔ, "Ɛrɛɛ wechɔg-ɛɛ ɛɛ ba wona ɛ nyokpowaa nɔ dɔŋa baa nɔ aa ɛa nɔɔ?" A chegɛ a ta ba nyoa ta pɛɛ kpa. 17Asɛ Farisii tena la berɛ pɛɛ baa la ja ŋɔ, "He ŋɔ o chaeh dɛ gel hɛɛ na bɔr, taraken nɔ, ɛrɛɛ he na o wa ɔ?" Anee o ŋɔ, "Korowii keamee on." 18Dɛ Juda tena nomonome la te dɛ tɔŋle ŋɔ, ba fe aa yarada kɛŋɔ o fa nyoŋɔ ka asɛ dɛ berɛ dɛɛ na, nemenɛ baa na o nya ne o mɛɛ mɔɔ. 19Ba yer ba dɛ bɔɔ ba ŋɔ, "He bie nɔ naa? He ŋɔ haa lolɔ dɛ o nyoŋɔ ɛ? Aah ɛrɛɛ a ɛ asɛ o berɛ won dɛɛ na nɔ?" 20Anee ba ŋɔ, "Ya jemɔ kɛ ya biee. Yaa lolɔ dɛ o nyoŋɔ. 21Kɛ yaa gɛ aa ɛa asɛ wɛɛ na ne naate waa gela wɛɛ na te waa jemɛ. Amɔ hé pɛɛ o gbagba na nɔ, dɛkalkɛ o kpego dɛ won bol wa." 22Dɛ Juda tena nomonome laanee baa ɔmɛ waa ba ŋɔ gɛ. Nomonome la ɛ nyoa beŋkpoŋ kɛŋɔ nomɛlbwa waa ŋɔ Yeesu ɛ Kristo la, baa doŋi naatee o bɛ ba cheremi dea jo kpa. 23A waa o nya ne o mɛɛ ŋɔ o kpego ŋɔ bá pɛɛro la. 24Ba berɔ yerɛ baa la o faa nyoŋa la nɛɛtena, asɛ dɛ ŋɔ o be ŋɔ, "Nyiŋi Korowii dɛ bol kasinteŋ. Ya te jemɔ kɛ baa nɔ waa chaeh nɔ ɛ wechɔg-ɛɛ." 25Belaa o ŋɔ, "Dɛ o ɛ wechɔg-ɛɛ ne o ta ɛɛ yoo, n te aa jemɛ. Webeŋkpoŋ maa jema laanee kɛ, n fa nyoŋɔ asɛ taraken dɛ berɛ dɛɛ na." 26Anee ba berɛ pɛɛro ŋɔ, "Aah ɛrɛɛ o ɛɛ nɔ? Bɔkwa waa o ɛ dɛ won pili he sie nɔɔ?" 27Anee o ŋɔ, "N faa bol he be wubwa la, he vɛh noe. Ɛrɛɛ hɛɛ nyin kɛ n bol ja ɔ? He ge dɛ nyin he ɛ o habɔteŋra kɛɛ?" 28Belaa ba chɛgro kohona, asɛ dɛ ŋɔ, "Henee o habɔteŋre! Ya te, Mosis habɔteŋraa yan. 29Gɛ yaa jema laanee kɛ Korowii bol waa dɛ bagle Mosis, kɛ baa nɔ te, yaa o leebɔr jemɛ." 30Asɛ baa la chaŋe ŋɔ, "Bɔkwa waa nɔɔ? Heyaa ŋɔa haa o leebɔr jemɛ, kɛ o gelɔ n te won dɛɛ na. 31Ya jemɔ kɛŋɔ Korowii deŋna toole wechɔg-ɛɛra be. O deŋna lɔ banɔ la baa dɛ duuru dɛɛ ɛ waa waa dɛ nyin la be. 32Le harɛ mumpar bwa, umee noa kɛŋɔ nomɛl wono pili nɛn baa lolɔ dɛ o nyoŋɔ sie bwa nɔ? 33Dɛ Korowii be laa baa nɔ le ba naa, o fe aa won ɛ waa nɔ dɔŋa." 34Anee ba ŋɔ o be ŋɔ, "He ne he wechɔgaa ba lolɛ. Gɛɛ he ŋɔ hé chagle yaa wa aa?" Asɛ ba doŋu cheremi dea bela bala kwara. 35Yeesu aa noa kɛŋɔ ba doŋu cheremi dea bala la, o nyin o bɔr asɛ dɛ pɛɛro ŋɔ, "He dɛ yarada Nɛn Bie la aa?" 36Asɛ o pɛɛro ŋɔ, "Nomoa, umee naate la ásɛ he chag mɛ n jemɔ dɛ yaradao wɔ?" 37Anee o ŋɔ, "Naatee he den na gɛ la, o ne henee dɛɛ bol waa la." 38Belaa baa la ŋɔ, "N Dɔɔ, n dɛ yaradae!" Asɛ dɛ guŋi o sie dɛ tɛo duure. 39Asɛ Yeesu ŋɔ, "Nɛra waa bola dɛ pa bole waa n ba harɛ nɔ ta, ásɛ nyoŋa berɛ dɛɛ na, ásɛ banɔ la ge baa dɛ na la berɛ nyoŋa." 40Dɛ Farisii tena bane lɔ bela. Baa no gɛ la, ba bɔɔro ŋɔ, "Amɔ ya ge ɛ nyoŋa kɛɛ?" 41Anee Yeesu chaŋe ŋɔ, "Dɛ he fe sɛoh kɛŋɔ he ɛ nyoŋa kwaraa naa, wechɔga fe toole he nɛ, kɛ haa ŋɔa he dɛ na nomanta, he ta lɔ wechɔga ta."

will be added

X\