Jn 3

1Dɛ Juda tena nomoa bɛl lole baa yerɔ Nikodeemɔs. Dɛ o ɛ Farisii te. 2Awola bɛl jwaana, o ba Yeesu be dɛ ba ŋɔ o be ŋɔ, "Nomoa, nomɛlbwa jemɔ kɛŋɔ Korowiirii tomɛ ŋɔ hé ba bagle nɛra wa, dɛkalkɛ dɛ Korowii ta nɛn habɔɔ chegaa, waa won ɛ nyokpowaa nɔ haa dɛ ɛ nɔ." 3Belaa Yeesu chaŋo ŋɔ, "Kasinteŋ, n dɛ ŋɔ he be, nomɛlbwa waa dɛ nyin Korowii Kora la ta dɛ ja la, nemenɛ ba berɛ lolɔ ja." 4Anee Nikodeemɔs pɛɛro ŋɔ, "Nɛn waa kpega la, ɛrɛɛ bá ɛ dɛ berɛ won lolɔ jaɔ? Wɛɛ wonoo berɛ jo o nya tea bini ja asɛ o lolɔ waa?" 5Asɛ Yeesu ŋɔ, "Kasinteŋ, n dɛ ŋɔ he be, dɛ ba ta nomɛlbwa lolɛ nee ne Korowii Domadɛɛge ne naa, waa Korowii Kora ta jae ba. 6Nɛwɛnyini lola lole, asɛ Korowii Domadɛɛge ge lola do le. Nɛwɛnyini lola ɛ bwadabii wa, asɛ Korowii Domadɛɛge lola ge ɛ lileo wa. 7He bɛ gel waa maa bola ŋɔ a chɛ kɛ ba berɛ lolɛ heyaa la kpo he nyoa. 8Bela peu aa dɛ nyin laanee o ta dɛɛ kaa. O dɛ ta aa, he dɛ no o gbɔga kɛ haa on na, haa won jemɛ bela waa lea ne bela waa dɛ kaa. Gɛɛ nomɛlbwa Korowii Domadɛɛge aa lolɔ la do. Dɛ o we-ɛɛla laa aa, komɛlbwa toole dɛɛ bagle kɛ Korowii Domadɛɛge lolɔ." 9Belaa Nikodeemɔs pɛɛro ŋɔ, "Ɛrɛɛ waa nɔ ɛɛ ba ɛɛ dɛ won magre ɔ?" 10Anee Yeesu ŋɔ, "Ɛrɛɛ he ɛ Juda tena nomonjen dɛɛ bagle Korowii Wa, haa wola gɛ waa nɔ jemɛ nɔɔ? 11Kasinteŋ, n dɛ ŋɔ he be, waa yaa jema la, ne waa ya sie aa naa la, anee yaa bol, kɛ haa ya be no. 12Aah dɛ maa dɛ bol waa aa lɔ harɛ ta bonɔɔ haa wola men yarada nɔ, dɛ n bol waa aa lɔ Korowii doa aa, ɛrɛɛ hɛɛ ba ɛɛ dɛ won yarada a te nɔ? 13Dɛ n Nɛn Bie laa aa, nomɛlbwa ta Korowii be nyundua laŋɛ mɔɔ. N gboo le o be nyundua dɛ tu ba harɛ. 14Gɛ saŋ ya naanar aa lɔ pua la, Korowii keame Mosis la fa kpɔ buni dɛ logɛ harɛkon dɛ kpɔ do daa ta dɛ gɔɔro ásɛ nɛra nyiŋu dɛ bɛ dɛɛ sewɛ. Gɛɛ a chɛ kɛ ba gɔɔ n Nɛn Bie la. 15Dɛ ba baa gɔɔ mɛ gɛ naa, nomɛlbwa waa yarada n waa la, wɛɛ dɔ Korowii mkpa aa wola jaga dɔe bwa laanee. 16"Korowii dɛ nyin nɛwɛnyini taeh. A waa o gel men maa ɛ o Bibeŋkpoŋ gbo waa dɔɔ la ba harɛ nɔ ta, asɛ nomɛlbwa waa yarada n waa la bɛ sewɛ, kɛ ó dɔ o mkpa aa wola jaga dɔe bwa la. 17Korowii aa tom mɛ harɛ la, o ta ŋɔe ŋɔ ń ba bol he waa dɛ pa heyaa bolchɔge. Kɛ o tom mɛ ŋɔ ń ba nyin ŋwɛnɛ tɛ heyaa ásɛ o won lɛ heya. 18Nomɛlbwa waa yarada n waa la, Korowii aa o waa bol a ba ɛ kɛ wɛɛ di bolchɔgee. Kɛ nomɛlbwa waa wola n waa yaradae la, Korowii pao bolchɔge tonɛ, dɛkalkɛŋɔ o ta o Bibeŋkpoŋ la waa yaradae. 19Ba bolchɔge pae munii kɛŋɔ nii waa dɛ chaah bɔr la ba harɛ nɔ ta, kɛ nɛwɛnyini berɔ dɛɛ nyin biro gwaa nii la, dɛkalkɛŋɔ ba wobɛlbwa ɛ wechɔga. 20Nomɛlbwa waa dɛ ɛ wechɔga la, waa bochaah nyin, dɛkalkɛŋɔ o le bochaah ta naa, nɛra ɛɛ na o wechɔga laanee. 21Naate waa dɛ ɛ wedɛɛga la te, waa bochaah lee ɔmɛ. Wedɛg-ɛɛ bɛlbwa dɛ ɛ o waa bochaah ta ásɛ nɛra bwa na dɛ jemɛ kɛ o jemɛ Korowii." 22A habɔɔ la, Yeesu ne o habɔteŋra la la Judia harɛ ta, asɛ o ka di tɔpera anɛ ba be dɛɛ sɔ nɛra Korowii nee bela. 23Dɛ Jɔn ge dɛ sɔ nɛra Korowii nee bwɛɛ bɛl baa dɛ yerɔ Aenɔn o ne Salem aa wola jaŋɛ la ta. Dɛ nee lɔ Aenɔn taeh, asɛ nɛra ɛɛ ba Jɔn be wɛɛ sɔ ba Korowii ne. 24A gɛ saŋ la dɛ ba ta Jɔn lawɛ do dea mɔɔ. 25Dɛ nɛra baa teŋɛ Jɔn nɛɛ la ne Juda te bɛl dɛ tɔŋle dɔŋa ba bela Korowii toma waa aa ɛ nɔɔra ne naa sarama ne nee sɔe wa. 26Ba la Jɔn be dɛ ka pɛɛro ŋɔ, "Nomoa, he dɛ lii kɛ he ne baa bɛl faa chegɛ Jɔɔdan Moo la wee leebɔr pera la aa? O waa he faa bol la. O dɛ sɔ nɛra Korowii ne, asɛ nɛra bwa chwa dɛɛ kaa o be." 27Belaa Jɔn ŋɔ, "Nomɛlbwa toole dɛ won dɔ komɛl dɛ Korowii laa tɛo. 28Maa ŋɔa ŋɔ n laa Kristo la, dɛ ŋɔ tomaa ba tom mɛ ŋɔ ń tɔ o sie la, he ta noɛ yaa? 29Hanfale jaaree dɔ o haah. Kɛ, dɛ hanfale jaa la dam lɔ hanfale la waa bɔr dɛ no o nyoa bela aa, dɛ o sie lɛo. Gɛɛ n ge bwara sɔɔh mɛ kohona. 30A chɛ kɛ o sɔn ɛɛ le kohona asɛ n te sɔn ɛɛ ba harɛ. 31"Nɛn waa le nyundua la gwaa nomɛlbwa. Nɛn waa le harɛ bonɔ la, harɛ waa o jemɛ, a waa gee o won bola. Kɛ nɛn waa le Korowii be nyundua la te gwaa nomɛlbwa. 32Waa o siwi aa naa ne waa waa noa Korowii be laanee wɛɛ bol, kɛ nɛwɛnyini aa o be no. 33Nomɛlbwa sɛh Korowii wa aa, o gbagba wono dɛɛ jemɛ kɛ Korowii waa dɔ kasinteŋ. 34Nɛn Korowii aa tomɔ la, Korowii wobolee wɛɛ bol, dɛkalkɛ Korowii tɛo o Domadɛɛge la tɛɛ tenten. 35Korowii nyin o Bie la taeh, dɛ kpɔ wobɛlbwa kpegri do o nɔn ta. 36Nomɛlbwa waa yarada Korowii Bie la waa la, wɛɛ dɔ mkpaa aa wola jaga dɔe bwaa. Nomɛlbwa waa wola Korowii Bie la waa yaradae la, waa mkpa dɔe ba. Korowii bandia ɛɛ do o nɛɛ saŋ bɛlbwaa."

will be added

X\