Jn 20

1Tomun aa dɛ kpɔ Kwasiara la, Mɛɛre waa le Magdala la la bela baa huge Yeesu la, dɛ ka na kɛŋɔ bwe baa kpɔa tɔ bɔɔ la nyoa la le o nyoa. 2Waa na gɛ la, o chwao la Seemɔn Pita ne o dɔŋ Yeesu aa dɛ nyinu kohona la be dɛ ka ŋɔ ba be ŋɔ, "Ba laa ya Dɔɔ kpɔ lalbɔɔ la bini, yaa jemɛ bela baa kpɔɔ bil." 3Pita ne o dɔŋ habɔteŋre la iro dɛ la bela baa huge Yeesu la. 4Dɛ chwae baa chwa, asɛ Pita dɔŋ la chwa warane dɛ felu tel bɔɔ la ta. 5O boŋɔ haah dɛ na yapoŋ la chɔe, kɛ o ta lalbɔɔ la bini tenten joɛ. 6Belaa Pita waa ka mun la ba dɛ ba jo bɔɔ la bini, dɛ na yapoŋ la bela, 7dɛ na yapoŋ baa kpɔa vɔwɛ o nyu la kɛŋɔ waa gula chɔ pera. 8Belaa Yeesu habɔteŋre waa tɔ sie tel bela la ge berɛ jo lalbɔɔ la bini, dɛ na a bwa. Waa naa la, o den yarada. 9Dɛ ba ta waa aa lɔ Korowii Tɔn bini bobɛl dɛ bagle kɛŋɔ a chɛ kɛ Yeesu ir seo ta la mun noɛ mɔɔ. 10Yeesu habɔteŋra la berɛ kaa ba deremi. 11Kɛ dɛ Mɛɛre te ta chegɛ bɔɔ la nyoa dɛɛ wi. Waa dɛ wi la, o boŋɔ dɛ haah lalbɔɔ la bini, 12asɛ dɛ na nyundua toroma banɛ. Ba do kompoŋa so bela baa kpɔ Yeesu lale bil la. Bɛl soge o nyu bɔr, asɛ bɛl so o nakpale bɔr. 13Belaa nyundua toroma la bɔɔro ŋɔ, "N nya, bɔkwa waa hɛɛ wi ken nɔ?" Asɛ o ŋɔ, "Ba kpɔ n Dɔɔ kaa. Maa jemɛ bela baa kpɔɔ ka bil." 14Waa bol gɛ tonɛ dɛ berɛ o te, dɛ Yeesuu chega, kɛ o ta jemɛ kɛ onee. 15Belaa Yeesu ŋɔ, "N nya, bɔkwa waa bala hɛɛ wi ken nɔ? Ume bɔree hɛɛ nyin ɔ?" Dɛ Mɛɛre dɛ lii kɛŋɔ nɛn waa dɛ nyiŋi daa baa dua bela la ta laanee, anomanta o chaŋo ŋɔ, "Nomoa, dɛ henee ba kpɔ n Dɔɔ kaa laa, hé gel n jemɛ bela haa kpɔɔ ka bil, ásɛ dɛ la ka kpɔɔ." 16Anee Yeesu yerɔ ŋɔ, "Mɛɛre." Asɛ o berɛ sie o be dɛ kpɔ Juda tena wobol ŋɔ, "Raboni!" (o munii Nomoa), dɛ ka lawɔ kpoŋe. 17Belaa Yeesu ŋɔ, "Kpɔ mɛ ta, n ta n Mɛɛ be laŋɛ mɔɔ. Kaa ka ŋɔ n nimanar be ŋɔ, 'N berɔ dɛɛ kaa nyundua n ne he bwa Mɛɛ waa ɛ ya bwa Korowii la be.' " 18Asɛ Mɛɛre waa le Magdala la la Yeesu habɔteŋra la be dɛ ka ŋɔ, "N na ya Dɔɔ la!" O bol waa Yeesu aa bola la ba be. 19Awola Kwasiara la jwaana la, Yeesu habɔteŋra la cheme dea bɛl bini. Dɛ ba dɛ ɔmɛ Juda tena, anomanta ba tɔɔge gbeni la dɛ laa karɛ ba nɛ. Belaa ba ŋɔ ba nyiŋi, dɛ Yeesu baa che ba baah dɛ ŋɔ, "Kórowii tɛ heyaa bambisɔɔhna." 20Waa bol gɛ la, o kpɔ o nɔɔra ne o loŋi bag ba, asɛ ba sie lɛ kohona kɛŋɔ baa na ba Dɔɔ la. 21Yeesu berɔ bol ja ŋɔ, "Kórowii tɛ heyaa bambisɔɔhna. Gɛ n Mɛɛ aa tom mɛ la, gɛɛ n gee tomɛ heya." 22Waa bol gɛ tonɛ la, o hweero ta ba nɛɛ dɛ ŋɔ, "Hé lɛ Korowii Domadɛɛge la. 23Dɛ he ŋɔ Korowii kpɔ nɛra wechɔga kɛ ba aa, wɛɛ kpɔɔ kɛ ba, kɛ dɛ he ŋɔ Korowii bɛ nɛra wechɔga kpɔ kɛ ba aa, aa do ba nɛɛ." 24Dɛ Tɔmas baa dɛ yerɔ Kpar o ɛ Yeesu habɔteŋra la bini bɛl la toole o bala la be gɛ saŋ Yeesu aa ba bela la. 25Anomanta dɛ ba dɛ bol o be ŋɔ, "Ya na ya Dɔɔ la." Asɛ o chaŋ ba ŋɔ, "Dɛ n te ta dadowɛre la buge aa lɔ o nɔɔra ta la nae, dɛ kpɔ n nonii do bela, dɛ berɛ kpɔ n nɔn do o loŋi bela baa kpɔ lampea yagɛ la aa, maa waa nɔɔ yarada." 26A yawanyoa la, Yeesu habɔteŋra la berɔ ba cheme dea la bini ja, dɛ Tɔmas ja ba nɛ. Ba kagre dea la gbeni, kɛ Yeesu baa jo che ba baah, dɛ ŋɔ, "Kórowii tɛ heyaa bambisɔɔhna!" 27Asɛ dɛ ŋɔ Tɔmas be ŋɔ, "Kpɔ he nonii ba do n nɔɔra bɔɔne la ta, dɛ kpɔ he nɔn do n loŋi bɔɔ la ge ta, dɛɛ yarada mɛ, dɛ gel aahna-aahna la haa dɛ ɛ la." 28Asɛ Tɔmas ŋɔ, "N Dɔɔ, n Korowii!" 29Belaa Yeesu ŋɔ o be ŋɔ, "Haa na mɛ nɔ waa he yarada mɛ nɔ kɛɛ? Nɛra baa wola men nae dɛ yarada mɛ la, ba na som." 30Nyokpowaa Yeesu aa ɛa o habɔteŋra la siwi ta warɔ taeh. A bwa laa n chwerɛ do tɔn nɔ bini. 31Kɛ n chwerɛ anɔ ásɛ he che a ta dɛ yarada kɛŋɔ Yeesuu Kristo Korowii aa bagɛ nyoa ŋɔ wɛɛ bao la, onee Korowii Bie la, ásɛ a che he yarada haa dɛ yaradao la ta he dɔ Korowii mkpa.

will be added

X\