Jn 2

1A habɔɔ tɔpetooro wee la, dɛ ba dɛ ɛ hanfalewaa bwɛɛ bɛl baa dɛ yerɔ Keena o do Galilia harɛ ta la. Dɛ Yeesu nya Mɛɛre lɔ bela. 2Ba yerɛ Yeesu ne o habɔteŋra la bane ge hanfale waa la bɔr bela. 3Dɛ ba dɛ tɛ nɛra la aa cheme bela la sen, asɛ a bo. Belaa Yeesu nya ŋɔ o be ŋɔ, "Ba sen bwa tonɔ." 4Anee Yeesu bɔɔ o nya ŋɔ, "N nya, aah ɛrɛ waa he berɛ dɛɛ nyiŋi n te siwi ta nɔɔ? Gɛ saŋ maa dɛ ba n toma ɛɛ la ta tele mɔɔ." 5O nya berɔ ŋɔ bonɔɔna baa dɛ do sene la be ŋɔ, "Dɛ o baa ŋɔ hé ɛ wobɛlbwa naa, hé ɛ." 6Dɛ vɛɛhna anumɛl chegɛ bela asɛ ba kpɔ dɛɛ ɛ ba nawee bɛl. Ba yon ɛ nee do a bini ásɛ nɛra yon dɛɛ sarame ba sarama bɛl soo mɔɔ dɛɛ di kwa. Dɛ vɛɛhna la bɛlbwa won nee haŋkorɔ fah lɛɛ. 7Yeesu ŋɔ ba be ŋɔ bá do nee vɛɛhna la bini á su, asɛ ba do nee a su laŋlaŋ ken. 8Baa do nee vɛɛhna la bini la, o ŋɔ ba be ŋɔ, "Hé ɛ ane la ka tɛ hanfale dea nomoa la." Waa ŋɔ gɛ la, ba la nee la ne ka tɛo. Baa tɛo la, dɛ senee. 9Nomoa la aa dagɛ nee aa berɛ sen la na la, o ta wone jemɛ bela aa lea ba, kɛ dɛ bonɔɔna baa dɛ do sen la te jemɔ. 10Anomanta o yerɛ hanfale jaa la dɛ ŋɔ o be ŋɔ, "Nomɛlbwa dɛ ba nɛra sen tɛɛ yaa, andɛɛga nee o yon tɔ sie le, asɛ nɛra bwa aa baa nyɔ vagɛ la, mɔɔ o yon le anɔ la aa wola somɛ la ne asɛ baa nyɔ. Ɛrɛɛ he te tɔ sendɛɛga cheg dɛ ka mun dɛɛ ba a ne nɔɔ?" 11Yeesu nyokpowaa waa tɔ sie ɛa laanee la. Keena waa lɔ Galilia harɛ ta laanee o ɛa, dɛ chagle o nɛnsoo ne kpegri waa dɔa, asɛ o habɔteŋra la na dɛ yaradao. 12A habɔɔ la, Yeesu ne o nya ne o nimanar ne o habɔteŋra la la Kapeeneɔm dɛ ka so bela tɔpera anɛ. 13Dɛ Juda tena tɔpejen baa dɛ yerɔ Galekaa la joɔ tonɛ, anomanta Yeesu la Jerusalam. 14Bela la, o nao kɛŋɔ nɛra bane aa dɛ yog nae ne peera ne brɔnomare Korowii Dea bobɛl. Dɛ nɛra baa dɛ pegri suugare ge soge ba teeburre ta dɛɛ ɛ ba toma. 15Belaa Yeesu pɛrɛ bampɔrɔ ŋwɛɛra dɛ kpɔ doŋi peera ne nae ne kondɛɛra la bwa bela. O tagɛ nɛra baa dɛ pegri suugare la teeburre piigi, dɛ lɔ ba suugare merɛ, 16dɛ kɔr banɔ la baa dɛ yog brɔnomare la ŋɔ bá le a ne bela, dɛ ŋɔ ba bɛ o Mɛɛ dem kpɔ berɛ bonadibɔr. 17Bela la, o habɔteŋra la liiro kɛŋɔ baa chwerɛ Korowii Tɔn bini bobɛl kɛŋɔ, "Korowii Dea waa swɛɛ n siwi taeh" la. 18Belaa Juda tena nomonome la ŋɔ o be ŋɔ, "Bɔkwa nyokpowaa hɛɛ ba wona ɛ dɛ́ chagle kɛŋɔ he dɔ ŋwɛnɛ dɛ won ɛ a gɛ waa nɔ nɔ?" 19Anee Yeesu ŋɔ, "He kuugi Korowii Dea nɔ naa, n gee kpɔ tɔpera atoroo doo." 20Belaa ba bɔɔro ŋɔ, "Dea baa kpɔ bene fifraanaarɛ dɛ anumɛl mao la, hen dɛ won kpɔ tɔpera atoro gbo doo waa?" 21Dɛ Yeesu gbagba bwadabii waa wɛɛ bol dɛ kpɔ magɛ Korowii Dea la. 22Anomanta la, Korowii aa ir Yeesu seo ta la, belaa o habɔteŋra la lii kɛŋɔ Yeesu fa bol a gɛ waa nɔ. A gelɔ ba yarada waa baa chwera Korowii Tɔn bini la, ne waa Yeesu aa bola la. 23Yeesu taa lɔ Jerusalam dɛɛ di Galekaa la la, nɛra warɔ dɛ che o nyokpowaa waa ɛa ta dɛ yaradao kɛŋɔ onee Kristo la Korowii aa bagɛ nyoa ŋɔ wɛɛ tomɔɔ ó ba lɛ nɛwɛnyina la. 24Kɛ Yeesu ta ban yaradae kɛŋɔ ó kpɔ o te tɛɛ ba, dɛkalkɛŋɔ o jemɛ nɛwɛnyini da kɛrɛdɛ. 25A ta hiaih kɛ nɛn baglo gɛ nɛwɛnyini aa doa, dɛkalkɛŋɔ o gbagba jemɛ waa aa lɔ nɛn bambile bini.

will be added

X\