Jn 18

1Yeesu aa soŋe Korowii tonɛ la, o ne o habɔteŋra la leɔ dɛ ka le nenabɔɔ bɛl baa dɛ yerɔ Kedrɔn. Dɛ ba du daa ane bela, asɛ ba ka jo a baah. 2Dɛ Judas waa leo tɛ la jemɛ bela, dɛkalkɛ Yeesu ne o habɔteŋra la dɛ cheme bela warawara. 3Anomanta Judas na Sɔfonomonome ne Farisii tena, asɛ ba tɛo soojare ne nɛra baa dɛ daah Korowii Dea la bane. Asɛ ba kpɔ kandere ne kapɛle ne dɔmkwa, asɛ Judas kpɔ ba la daa la baah bela. 4Dɛ Yeesu jemɛ waa aa dɛ ba o nɛɛ chiga bwa, anomanta o leɔ ka chem ba, asɛ dɛ bɔɔ ba ŋɔ, "Ume bɔree hɛɛ nyin ɔ?" 5Anee ba ŋɔ, "Yeesu waa le Nasarɛt la bɔree yaa nyin." Belaa Yeesu ŋɔ, "Menee nɔ!" Dɛ Judas waa le Yeesu tɛ la ja soojare la ne nɛra la nɛɛ ba che bela. 6Yeesu aa ŋɔa men nɔ la, ba le habɔɔ dɛ chogli. 7Belaa o berɛ kwaa pɛɛ ba ŋɔ, "Ume bɔree hɛɛ nyin ɔ?" Asɛ ba ŋɔ, "Yeesu waa le Nasarɛt la." 8Anee o ŋɔ, "N ta ŋɔe ŋɔ menee nɔ naa? Dɛ n bɔree hɛɛ nyin aa, amɔ hé gel nɛra baa ja n nɛɛ nɔ te kaa." 9Gɛ aa ɛ asɛ waa o faa bola o Mɛɛ be la ɛ kasinteŋ kɛŋɔ o faa ŋɔa ŋɔ, "N Mɛɛ, nɛra haa tɛ mɛ la bɛlbwa ta n nɔn ta nyogrɛ" la, a waa o bol gɛ. 10Dɛ Seemɔn Pita dɔ kere o be bela. O pamɛ kere la dɛ ŋwɛnɛ Sɔfore Nomoa bonɔɔ dig deŋne dɛ laa cha. Gɛ bonɔɔ la sɔne Malkus. 11Pita aa ɛ gɛ la, Yeesu ŋɔ o be ŋɔ, "Kpɔ kere la su o tɔɔ ta! N bɛ wahala n Mɛɛ aa chega ŋɔ ń na la na kɛɛ?" 12Room soojare ne ba nomoa ne Juda tena baa dɛ daah Korowii Dea lawɛ Yeesu dɛ vɔrɔwo, 13dɛ tɔ sie la o ne Anas be. Dɛ Kaefasee Sɔfore Nomoa a gɛ bena la ta. Dɛ o mo Anas bie. 14A gɛ Kaefas nɔɔ fa ŋɔ Juda tena nomonome be ŋɔ nɛmbeŋkpoŋ lɛ nɛra bwa seo sewaa, a bɔ harɛbir bwa aa pagra la. 15Baa dɛ kaa Yeesu ne la, Seemɔn Pita ne o dɔŋa habɔteŋra la bɛl teŋɛ o nɛ. Dɛ Sɔfore Nomoa la jeremee a gɛ habɔteŋre nɔ, anomanta o teŋɛ Yeesu nɛɛ dɛ jo Sɔfore Nomoa la dem bela. 16Baa jo dem bela la, Pita te kaa jagɛ che dem la doonyoa. Dɛ tolo bɛlee dɛɛ daah doonyoa la. Asɛ Yeesu habɔteŋre la Sɔfore Nomoa la aa jemɔ la berɛ le buse dɛ ba bol waa tolo la be dɛ kpɔ Pita jo dem bela. 17Belaa tolo la bɔɔ Pita ŋɔ, "Baa nɔ habɔteŋre laa hen aa?" Anee o chaŋo ŋɔ, "Ɔɔh, o habɔteŋre laa men." 18Dɛ waa lole, anomanta dɛ Sɔfore Nomoa bonɔɔna ne nɛra baa dɛ daah Korowii Dea la do nii hɔla ta dɛ cheg dɛɛ ŋwee, asɛ Pita ka ja ba nɛɛ dɛ gee ŋwee. 19Sɔfore Nomoa la bɔɔ Yeesu o habɔteŋra ne o webagla la wa. 20Anee o ŋɔ, "Tɔpere bɛlbwaa mɛɛ bagla nɛra baah ta ba bwa ɛɛ no. Korowii Dea ne cheremi deene ya Juda tena bwa aa dɛ cheme a bini la, belaa mɛɛ bagla. N ta sɔeh dɛ bagle wobɛlbwa ge bwa. 21Amɔ ɛrɛɛ hɛɛ bɔɔ mɛ gɛ nɔɔ? Bɔɔ nɛra baa noa la, banee dɛ jemɛ waa maa bag ba dɛ́ bagle." 22Yeesu aa chaŋe waa la gɛ la, dɛ Sɔfore Nomoa la bonɔɔ bɛl chegɛ o jwɛɛh asɛ dɛ kpaa o lwɛɛma, dɛ kɔro ŋɔ, "Kenii chɛ kɛ he chaŋe Sɔfore Nomoa aa?" 23Belaa Yeesu ŋɔ, "Waa maa bola a ta magrɛ la, bagle nɛ́ra bwa no. Dɛ gɛ laa ge aa, n lɔe nɔ munii ɛrɔɔ?" 24Asɛ Anas gel ba la Yeesu ne Sɔfore Nomoa Kaefas be, dɛ o nɔɔra ta vɔrɔwɔ gɛ. 25Dɛ Seemɔn Pita ta chegɔ dɛɛ ŋwee nii la, asɛ ba bɔɔro ŋɔ, "Baa la habɔteŋra la bɛl laa hen aa?" Asɛ o tɔh pelepele ŋɔ, "Bɛl laa men!" 26Dɛ Sɔfore Nomoa la bonɔɔ Pita aa ŋwɛnɛ o deŋne dɛ laa cha la lole bɛl lɔ dem bela. O bɔɔrɔ ŋɔ, "Kɛ dɛ he ja baa la nɛra la nɛɛ daa la baah bela laɔ?" 27Anee o tɔh ja ŋɔ, "Akai!" Bug la taa jabal si. 28Tomun aa dɛ kpɔ la, Juda tena nomonome la kpɔ Yeesu la Kaefas be dɛ ba o ne Room nomoa waa dɛ nyiŋi ba harɛ ta la be koodem. Dɛ Galekaa tɔpere telo, anomanta Juda tena nomonome la te ta dem bela joɛ, dɛkalkɛ dɛ ba jo bela aa, baa kah doŋaa baa wola won di Galekaa kondikwaa la. 29Baa vɛh bela joe la, ba harɛ nomoa Paelet leɔ ba ba be, dɛ ba bɔɔ ba ŋɔ, "Bɔkwa waa o ɛ aa wola magrɛ hɛɛ bɔɔro wɔ?" 30Anee ba chaŋe ŋɔ, "Dɛ wechɔg-ɛɛ laa aa, ya fe ta o ne he be balɛ." 31Asɛ Paelet ŋɔ ba be ŋɔ, "Hé gbabir kpɔɔ kaa ka bol o waa gɛ he mmara aa dɛ chagle." Anee ba ge chaŋo ŋɔ, "Ya ta ŋwɛnɛ dɔe kɛŋɔ yá bol nɛn waa dɛ pao bolchɔge bá kpoo." 32Gɛ waa nɔ chigo ásɛ nɛra jemɛ kɛ Yeesu waa waa bola dɛ bagle seo la soo waa dɛ ba sewa la ɛ kpela. 33Asɛ Paelet berɛ jo o koodem bela, dɛ yerɛ Yeesu ba o be, dɛ bɔɔro ŋɔ, "Henee Juda tena kooro ɛ?" 34Belaa o chaŋo ŋɔ, "He gbagbaa na waa nɔ dɛɛ bɔɔ mɛ kɛɛ nɛra banee bol n waa he be nɔ?" 35Anee Paelet ŋɔ, "Haa na mɛ nɔ, Juda tee men aa? He gbagba bwɛɛ tena ne he Sɔfonomonomee ba he ne n be. Bɔkwa wechɔgaa he ɛɔ?" 36Asɛ Yeesu chaŋo ŋɔ, "Harɛ ta bonɔ laa mɛɛ di kora. Dɛ harɛ ta bonɔɔ mɛɛ di kora aa, n nɛra fe aa sɛh bá kpɔ mɛ tɛ Juda tena, ba fe ɛɛ yoo lɛɛ mɛ. Kɛ harɛ ta bonɔ kora laa mɛɛ di." 37Yeesu aa ŋɔ gɛ la, anee Paelet bɔɔro ŋɔ, "Amɔ kooroo hen kpela kenɛ?" Asɛ o chaŋo ŋɔ, "Henee ŋɔa kooroo men. Kasinteŋ bola waa ba lol mɛ. A waa n ba harɛ nɔ ta dɛ́ ba bol kasinteŋ la nɛra bwa be. Nomɛlbwa waa dɛ nyin kasinteŋ la, on dɛɛ no n be." 38Anee Paelet ŋɔ, "Bɔkwa gee kasinteŋ nɔɔ?" Waa bol gɛ la, o berɔ le dɛ ka ŋɔ Juda tena la be ŋɔ, "N ta waa maa che a ta pao bolchɔge nae, 39kɛ gɛ he Juda tena yon gel n foo wechɔg-ɛɛ beŋkpoŋ dɛɛ ta he Galekaa kondikwaa tɔpere ta la, ń foo Juda tena kooro nɔ ta gɛ kɛɛ?" 40Belaa ba bwa nyɛg kohona ŋɔ, "Bɛ on foo! Foo Barabas!" Dɛ gɛ Barabas nɔ, ŋwɛɛree.

will be added

X\