Jn 12

1Aa baa ka tɔpera anumɛl bá di Galekaa tɔpere la la, Yeesu berɔ ba Bɛtani dɛ la Lasorɔs la waa chumu seo ta la dem. 2Ba hɔɔhro, o ne nɛra bane ne Lasorɔs so dɛɛ di kwaa la, asɛ Maata tɔɔ dɛɛ tɛɛ ba. 3Anee Mɛɛre kpɔ nosɔɔhsoma loŋbir a yog aa kpega dɛ do wer kohona ba fɔgle Yeesu napaala dɛ kpɔ o nyumpona feera. Asɛ dea la bini bwa sɔɔh do som ken. 4Belaa Yeesu habɔteŋra la bini bɛl baa dɛ yerɔ Judas Eskareɔt o taa dɛ ba Yeesu lee tɛ la ŋɔ, 5"Ba fe yog nosɔɔhsoma nɔ dɛ lɛ suugajena dɛ bɔne tɛ nyaara ta bɔ naa?" 6Menɛkɛsɛ ŋɔ nyaara waa hiaoh waa o ŋɔ gɛ la. Waa ɛ ŋwɛɛ waa o ŋɔ gɛ. Dɛ onee dɛɛ kpoŋe ba suuga, asɛ dɛ yon ŋwɛ ane dɛɛ di. 7Asɛ Yeesu ŋɔ, "Hé gelo jeih ken. Noo o kpɔ dɛɛ hug mɛ. 8He ne nyaara ɛɛ do lee saŋ bɛlbwa. Kɛ n te, maa he bee so ka tonɛ." 9Belaa Juda tena pirim aa noa kɛŋɔ Yeesu lɔ Bɛtani la, ba ba bela dɛɛ nyinu dɛ́ na. O gbo waa laa, Lasorɔs waa chumu seo ta la ge jao. 10Anomanta Sɔfonomonome la vɔrɔwɔ kɛŋɔ bá kpo Lasorɔs gba, 11dɛkalkɛŋɔ o waa Juda tena kɛrɛdɛ vɛh ba nɛɛ teŋa dɛɛ yarada Yeesu dɛ kpɔ ba te tɛo. 12Tɔ aa pera la, nɛnlaa baa ba Jerusalam dɛɛ ba ba di Galekaa la noɔ kɛŋɔ Yeesu dɛ ba bela. 13Belaa ba nyin bambie papooni dɛ kpɔ le bwɛɛ bini ka chemo ŋwɛnɛ ta silɛɛ ne dɛɛ ŋɔ, "Woowo! Korowii jam! O swee Israel tena Kooro waa valɛ o sɔn ta dɛɛ ba nɔ andɛɛga." 14Dɛ Yeesu nyin keego bie bɛl, dɛ so o ta gɛ baa chwera Korowii Tɔn bini ŋɔ, 15"Saayɔn tena, he bɛ ɔmɛ! Hé nyiŋi na! He Kooroo soge keego bie ta dɛɛ ba la." 16Dɛ o habɔteŋra la ta o waa nɔ mun noɛ logla la, dɛ ka tel kɛ Korowii aa tɛo jirima mɔɔ ba ta lii kɛŋɔ ba chwerɛ o bwara waa Korowii Tɔn bini gɛ, asɛ ba ɛo gɛ kpela. 17Dɛ nɛnlaa Yeesu aa yerɛ Lasorɔs lalbɔɔ bini o ir seo ta ba siwi ta la bol gɛ waa ɛa la bwa dɛɛ bagle nɛra. 18Nɛnlaa baa noa kɛŋɔ o ɛ wejena nɔ la koh a waa dɛ ka chemo. 19Belaa Farisii tena la bol dɔŋa be ŋɔ, "Hɛlaa yaa hɛlɛ la! Yaa won ɛo wobɛlbwa noo! Na nɛra bwa aa wura teŋɛ o nɛɛ gɛ!" 20Dɛ Grik tena bane ja nɛra baa kaa Jerusalam dɛɛ la ká tomɛ Korowii Galekaa tɔpere la ta la nɛ. 21Ba la Felep waa le Galilia harɛ bwɛɛ baa dɛ yerɔ Bɛtsaeda la be, dɛ ka soŋo ŋɔ, "Nomoa, ya dɛ nyin Yeesu dɛ́ nao." 22Belaa Felep ka ŋɔ Andriu be, asɛ ba bwa la ka bol Yeesu be. 23Anee o chaŋ ba ŋɔ, "N Nɛn Bie la tɔpere telo kɛŋɔ Korowii tɛ mɛ jirima. 24Kasinteŋ, dɛ ba ta mebii kpɔe du o pɔh aa, waa won ya. O gboo dɛ do le. Dɛ he duu te naa, o dɛ le dɛ ya kɛrɛdɛ. 25Nomɛlbwa o siwi aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Asɛ nomɛlbwa ge o siwi aa wola harɛ nɔ ta silɛɛ kwaa ta lɛ la, wɛɛ dɔ o nyuu dɛ dɔ Korowii mkpa aa wola jaga dɔe la. 26Nomɛlbwa waa sɛh dɛɛ tom mɛ la, wɛ́ɛ teŋɛ n nɛ. Bobɛlbwa maa do la, belaa n toroma gee ba doe. N Mɛɛ la ɛɛ tɛ nomɛlbwa waa dɛ tom mɛ la sɔnee. 27"Taraken n liire ta bobeŋkpoŋ chegɛ. Ɛrɛɛ ń soŋe n Mɛɛ ŋɔɔ? Ń soŋo ŋɔ, 'N Mɛɛ, lɛɛ mɛ le waa nɔ nyoa' aa? Akai! A ta gɛ magrɛ, dɛkalkɛŋɔ gɛ waa nɔ waa n ba." 28Asɛ o ŋɔ, "N Mɛɛ, gel he sɔn dɔ jirima!" Belaa ba no taa bɛl le nyundua kɛŋɔ, "N gelɔ n sɔn dɔ jirima, kɛ mɛɛ berɔɔ gel o dɔ ja." 29Nɛnlaa baa ja o nɛɛ bela la aa no taa la la, bane ŋɔ bwaalaa kɔra, asɛ ba bane ge ŋɔ nyundua torome bɛlee bol waa o be. 30Asɛ Yeesu ŋɔ, "N waa laa ya no gɛ taa nɔ. He waa. 31Tɔpere Korowii aa bol harɛ nɔ ta nɛra bwa waa dɛ pa bole la telo, asɛ name gee mɛɛ ba n doŋi Bɔnsam waa ɛ harɛ nɔ ta kpegnɛn la ta. 32Men, baa sag mɛ nyunduaa. Ba baa sag mɛ naa, mɛɛ tɛr nɛra bwaa ba n be." 33Anɔ waa bola nɔ dɛ bagle seo la soosiwi waa dɛ ba sewa. 34Belaa nɛnlaa la chaŋe ŋɔ, "Ya noɔ Korowii Tɔn la ɛɛ bagle kɛŋɔ dɛ Kristo la balaa, waa sewɛ bwa. Aah, ɛrɛɛ he te berɛ ŋɔ Nɛn Bie la chɛ kɛŋɔ ba sagɔ nyundua ɔ? Umee Nɛn Bie nɔ kwaraa te nɔ?" 35Anee Yeesu ŋɔ ba be ŋɔ, "Bɔr taa dɛ chaah he nɛɛ tɔpera anɛ nɔ, hɛ́ɛ valɛ o ta. Dɛ gɛ laa aa, bɔr ɛɛ biruu he nɛ. Nomɛlbwa waa dɛ valɛ biro ta la aa bela waa dɛ kaa jemɛ. 36Bɔr taa dɛ chaah he nɛɛ nɔ, hé yarada bochaah la dɛ berɛ bochaah nɛra." Yeesu aa bol gɛ waa nɔ tonɛ la, o le ba baah asɛ dɛ ka sɔh. 37O ɛ nyokpowaa kohona ba siwi ta, kɛ a ne a bwa ba ta on yaradae. 38Anɔ dɛ bagle kɛ Korowii keame Aesaya waa waa bola la ɛ kpela. O bolɔ ŋɔ, "N Dɔɔ, ya faa bol he waa la, umee yarada yaa ɔ? Ba na he kpegri, kɛ umee wona jemɛ kɛŋɔ henee yɔ?" 39Gɛɛ a do ba ta waa la yaradae, asɛ Aesaya berɛ bol ja ŋɔ, 40"Korowii tɔɔge ba sie, dɛ gel ba bambile do kpegri, gɛ aa ɛ ba sibie bɛ na, asɛ ba liiree bini bɛ chaah ba no a mun, a ba ɛ kɛ baa charɛ ba liire dɛ ba o be o chaah ba." 41Yeesu jirimaa Aesaya na asɛ dɛ bol o waa gɛ la. 42Juda tena nomonome kɛrɛdɛ gba yarada Yeesu, kɛ baa dɛ ɔmɛ Farisii tena nomanta, ba ta bolɛ nomɛlbwa no, dɛkalkɛ dɛ ba bolaa, aa geloo ba doŋ ba cheremi dea joe. 43Nɛra bee baa nyin sɔn dɛ gwaa kɛ Korowii aa tɛɛ ba sɔn. 44Belaa Yeesu kpɔ takpeg dɛ ŋɔ, "Nomɛlbwa waa yarada mɛ la, n laa wɛɛ yarada. Naate waa tom mɛ laanee wɛɛ yarada la. 45Nomɛlbwa waa na mɛ la, dɛ naate waa tom mɛ laanee o na gɛ la. 46N ba harɛ nɔ ta kɛŋɔ kandea dɛ baa chaah nɛra bwa, ásɛ nomɛlbwa waa yarada mɛ la bɛ biro ta do kpa. 47Dɛ nɛn no n waa la dɛ waa a ta teŋaa, n laa dɛ bol o waa dɛ pa bole, dɛkalkɛ nɛra waa bola dɛ pa bole waa laa n ba harɛ nɔ ta. Nɛra bwa lɛɛ waa n ba. 48Kɛ nɛn waa vɛh n ne n waa maa dɛ bol la ɛɛ di bolchɔgee. N waa maa dɛ bol nɔɔ dɛ pao bolchɔge tɔpere bwa jaga wee. 49Dɛkalkɛ n gbabir kpegri ne laa mɛɛ bol waa nɔ. N Mɛɛ waa tom mɛ laanee do mɛ dɛ chag mɛ gɛ maa bol o wa. 50N jemɔ kɛŋɔ o waa la dɛ tɛ mkpa aa wola jage dɔe, anomanta anɔ la waa bol n be laanee n gee bol."

will be added

X\