Jn 1

1Wobɛlbwa mumpar Korowii aa wola nyundua ne harɛ tae mɔɔ la, dɛ Korowii Nyoa Wobol la lole. Dɛ o ne Korowiirii lole, asɛ o ne o bwa ɛ beŋkpoŋ. 2Dɛ onee ja Korowii nɛɛ mumpar la. 3O nɛɛ Korowii che dɛ ta komɛlbwa. Kontaale bɛlbwa toole waa wola o nɛɛ chegɛ dɛ tao. 4Korowii Nyoa Wobol la bee Korowii mkpa do, asɛ gɛ mkpa nɔ ge ɛ kɛŋɔ nii dɛɛ chaah nɛwɛnyini sie. 5Nii nɔ lole dɛɛ chaah biro ta, kɛ biro ta wone tɔɔ ŋwɛnɛ ó chaah bɔr kahonɛ bwa. 6Dɛ baa bɛl lole baa yerɔ Jɔn. Korowiirii tomɔ 7ŋɔ ó ba bol nii la waa dɛ chaah nɛwɛnyini sie la waa nɛra be, ásɛ ba no dɛ yarada. 8Dɛ Jɔn gbagba laa gɛ nii la. Balaa o ba dɛ ba bol nɛn waa ɛ nii tenten la waa ásɛ nɛra jemɛ o wa. 9Korowii Nyoa Wobol laanee nii kasinteŋ waa dɛ ba harɛ nɔ ta dɛ ba pili nɛwɛnyini sie la. 10O nɛɛ Korowii che dɛ ta nɛwɛnyini, kɛ waa ba harɛ ta bonɔ la, nɛwɛnyini ta on jemɛ. 11O ba o gbagba harɛ ta, asɛ o gbagba nɛra vɛoh. 12Kɛ nɛra la te bwa baa lɛo dɛ yaradao la, o tɛɛ ba kpegri kɛŋɔ bá ɛ Korowii bii. 13Ŋwɛnɛ nɛwɛnyini aa chegɛ o ta dɛɛ lolɛ bii la, kɛɛ nɛwɛnyini pɛla, kɛɛ nɛwɛnyini tetoora ta laa ba lol ba ba ɛ Korowii bii. Korowii kpegri taa a che ba berɛ o bii. 14Korowii Nyoa Wobol la baa berɛ nɛwɛnyini, dɛ ba so ya be. Ya na o jirima waa dɔa, dɛ jemɛ kɛŋɔ Korowii Bibeŋkpoŋ laanee on. Dɛ o wobɛlbwa wer, asɛ o dɔ kasinteŋ ge kohona. 15O waa Jɔn faa bol kohona dɛɛ ŋɔ, "Nɛn n faa dɛ bol o waa dɛ ŋɔ men tɔ sie o nɛɛ kɛ o gwaa mɛ, dɛkalkɛŋɔ o lole mɔɔ ba lol mɛ la, on la." 16Korowii chao kohona asɛ o ge na ya sum dɛɛ tɛ yaa andɛɛga saŋ bɛlbwa, waa wola gel bwa. 17Mosis nɛɛ Korowii che dɛ ba Mmara la ne. Yeesu Kristo ge nɛɛ nɛn nɛɛ suna ne kasinteŋ bwa che dɛ ba harɛ ta. 18Nomɛlbwa ta Korowii nae bwa. O Bibeŋkpoŋ waa pɛlo la, on gela nɛwɛnyini jemɔ. 19A wola bɛl, Juda tena nomonome baa lɔ Jerusalam la tomɛ ba Sɔfore ne Tɔn Jerema bane ŋɔ bá ka bɔɔ Jɔn o nɛnsoo. Waa waa bola dɛ kpɔ di Yeesu danseɛ laanee nɔ. 20Baa bɔɔro gɛ la, o ta nyoa tɔe. O bol kasinteŋ ŋɔ, "Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la laa men." 21Anee ba bɔɔro ŋɔ, "Aah dɛ umee hen ɔ? Elaejaa hen kɛɛ?" Asɛ o ŋɔ, "O laa men." Anee ba ŋɔ, "Korowii keame laanee hen kɛɛ?" Asɛ o ŋɔ, "Akai." 22Belaa ba ŋɔ, "Bagle he nɛnsoo yá jemɛ, dɛ won dɔ wobɛl ka bol nɛra baa tomɛ yaa la be. Nɛn besoo hɛɛ lii he te nɔ?" 23Belaa Jɔn kpɔ Korowii keame Aesaya waa o faa bola la chaŋ ba ŋɔ, "Menee naate waa dɛ bol waa takpeg ne pua waa ɛ hɛŋle gbo harɛ ta dɛɛ ŋɔ, 'Hé gel he we-ɛɛla togre, dɛ kpɔ he te dɛɛ kpa he Dɔɔ bala' la." 24Anee nɛra Farisii tena la aa tom ba la 25bɔɔ Jɔn ŋɔ, "He ŋɔ Kristo la laa hen, Elaeja ge laa hen, Korowii keame la ge laa hen, aah dɛ ɛrɛɛ he ɛ dɛ won dɛɛ sɔ nɛra Korowii ne ɔ?" 26Belaa Jɔn ŋɔ, "Nee n te kpɔ dɛɛ sɔ nɛra Korowii ne. Nomɛl lɔ he bini taraken haa wola on jemɛ. 27Men bala mɔɔ o ba, kɛ o gwaa mɛ. Maa o napaa tee kwaraa dɔ." 28Bwɛɛ baa dɛ yerɔ Bɛtani o do Jɔɔdan Moo la wee leebɔr pera la, belaa a gɛ waa nɔ chig. Dɛ belaa Jɔn ɛɛ sɔ nɛra Korowii ne. 29Tɔ aa pera la, Jɔn na Yeesu kɛŋɔ waa dɛ ba o be. Belaa Jɔn ŋɔ nɛra o ne baa chega la be ŋɔ, "Hé na Korowii Pebie waa dɛ ba nɛra bwa wechɔga laa dɛ kpɔ ba nɛɛ la! 30O waa n faa bol ŋɔ, 'Nomɛl lɔ n habɔɔ dɛɛ ba, dɛ gwaa mɛ, dɛkalkɛ o lole mɔɔ ba lol mɛ' la. 31Dɛ n gbabir faa on jemɛ, kɛ o waa n ba dɛ baa sɔ nɛra Korowii nee ásɛ Israel tena jemɔ." 32Jɔn bol Yeesu waa ja ŋɔ, "N na Korowii Domadɛɛge la aa le nyundua kɛŋɔ brɔnoma, dɛ ba so o nɛ. 33N te fe aa jemɛ kɛ onee, kɛ Korowii waa lee mɛ ŋɔ ń ba kpɔ nee dɛɛ sɔ nɛra Korowii nee laanee gela n jemɔ. O ŋɔ n be ŋɔ, 'Hɛɛ na n Domadɛɛge laanee o ba so naate nɛ. On dɛɛ ba n Domadɛɛge kpɔe dɛ sɔ nɛra la.' 34A gɛ waa nɔ chigo n na, anomanta n dɛ ŋɔ he be ŋɔ Korowii Biee on." 35Tɔ aa pera la, dɛ Jɔn ne o habɔteŋra banɛ chegɛ bela ja. 36O na Yeesu o baa kaa, asɛ dɛ ŋɔ, "Hé na Korowii Pebie la!" 37Waa ŋɔ gɛ la, o habɔteŋra banɛ la noɔ, dɛ ka teŋɛ Yeesu nɛ. 38Belaa Yeesu ke nyiŋi dɛ na kɛ baa teŋɛ o nɛ, asɛ o bɔɔ ba ŋɔ, "Bɔkwaa hɛɛ nyin ɔ?" Asɛ ba bɔɔro ŋɔ, "Rabae, lee he dem doɔ?" (Rabae munii nɛn waa dɛ chagle wa.) 39Belaa o ŋɔ, "Hé ba na." Asɛ ba la dɛ ka na o dem. Dɛ a bɔ jɔmɔra dɔŋ anaarɛ, asɛ ba so o be bela wee ba jo. 40Dɛ Andriu ɛ nɛra banɛ la Jɔn aa bol waa ba no dɛ teŋɛ Yeesu nɛɛ la bini bɛl. Seemɔn Pita nimee on. 41Waa waa tɔ sie ɛ laanee kɛŋɔ o kaa nyin o dɔɔ Seemɔn bɔr, dɛ ŋɔ o be ŋɔ, "Ya na Mɛsaya la." (Mɛsaya munii Kristo.) 42O la Seemɔn ne Yeesu be. Belaa Yeesu nyiŋu dɛ ŋɔ, "He sɔne Seemɔn. Jɔn biee hen. Taraken baa dɛɛ yerɛɛ Sefas." (Grik tena ge dɛ yerɛ Sefas Pita. O munii Bwe.) 43Tɔ aa pera la, Yeesu ɛo kɛŋɔ wɛɛ la Galilia harɛ taa. O kaa na baa bɛl baa dɛ yerɔ Felep dɛ ŋɔ o be ŋɔ, "Baa teŋɛ n nɛ!" 44Dɛ Felep bwɛɛ Bɛtsaeda, belaa Andriu ne Pita ge le. 45Felep ge kaa na baa bɛl baa dɛ yerɔ Nataaneɛl, dɛ ŋɔ o be ŋɔ, "Ya na naate Mosis aa chwerɛ o waa Korowii Tɔn bini la. O waa Korowii keamere la ge chwerɛ la. O sɔne Yeesu. Josef waa le Nasarɛt la biee." 46Belaa Nataaneɛl ŋɔ, "Nasarɛt ge, kondɛɛge besoo dɛ won le bela ɔ?" Anee Felep ŋɔ, "Ba ba na nɔ!" 47Yeesu aa na Nataaneɛl wɛɛ ba o be la, o ŋɔ, "Israel te tentenee nɔ. O waa dɔ kasinteŋ kɛrɛdɛ!" 48Belaa Nataaneɛl bɔɔro ŋɔ, "Ɛrɛɛ he ɛ jem mɛ nɔ?" Asɛ Yeesu chaŋo ŋɔ, "Haa lɔ pur la mun la, n nae mɔɔ Felep ka yerɛ la." 49Anee Nataaneɛl ŋɔ, "Nomoa, Korowii Biee hen. Henee Israel tena Kooro la." 50Asɛ Yeesu ŋɔ o be ŋɔ, "Maa ŋɔ he be ŋɔ n nae pur la mun la waa he den yarada mɛ nɔ naa? Hɛɛ na wejenaa a gwaa anɔ!" 51Yeesu ŋɔ ba be ŋɔ, "Kasinteŋ, n dɛ ŋɔ he be, hɛɛ nao nyundua aa pila, asɛ nyundua toroma che bela tu dɛɛ ba men Nɛn Bie be, dɛ berɛ teeh dɛɛ kaa."

will be added

X\