Jems 5

1Kondɔɔhna ge, hé no n be! Waa aa dɛ ba heyaa pui la nomanta, hé dooge lɔŋɔre dɛɛ wi. 2He kondɔɔh chɔgɔ, kwaa di he bwara laala bwa. 3He suugaswɛm ne suugapoŋa bwa ge deero. Awola Korowii aa dɛ ba he waa bola la, he suugare aa deera la ɛɛ ɛ danseɛ kɛŋɔ he ɛ wechɔga, dɛ we heyaa kɛŋɔ nii ken. Bɔkwaa hɛɛ cheg suuga waa bwa jaga tɔpere nɔ ta dɛ́ ɛɔ? 4Hɛ́ɛ no! Nɛra haa kpɔ ba, ba ɛ he kooni tomare he ta ban kem bɔe dɛ faah ba la dɛ wi he tɛl. A gɛ nɛra la wii chole Korowii waa ɛ komɛlbwa Dɔɔ la deŋna ta. 5He dɔ sobɔrdɛɛge harɛ nɔ ta dɛ so, dɛɛ di he bwara. Gɛ haa dɛ di he bwara la, he do kɛŋɔ kondɛɛre baa ku kpɔga dɛɛ tɛo ó di dɛ je bá kpoo la. 6He pa nɛndɛɛga ba wa aa do kaih la bolchɔge dɛ kpoo ba, ba ta wone ɛ wobɛlbwa dɛ́ lɛ ba te. 7Kɛ yabala, hé lawɛ bambile dɛ ka tel gɛ saŋ ya Dɔɔ la aa ba. Hé na gɛ paa yon so kpa bwaala logla á nɛ ó du o kwa, dɛ lawɛ bambile asɛ yoo ge yo mɔɔ o koo kwaa la yon ɛ la. 8Gɛ tentenee chɛ kɛŋɔ he ge lawɛ bambile dɛ che kiŋkiŋ, dɛkalkɛŋɔ he Dɔɔ la bala telo. 9Yabala, he bɛ dɔŋa waa dɛɛ nagre asɛ dɛ ba di bolchɔge Korowii sie. Ya bole pae dɛ tel. 10Yabala, hé nyiŋi Korowii keamere la baa chegɛ o sɔn ta dɛ bol waa bagle nɛra la na, dɛ na gɛ baa na wa, kɛ dɛ won lawɛ bambile ba wahala ta la. Hé ge ɛ gɛ. 11Ya dɛ yerɛ nɛra baa wona lawɛ bambile dɛ che kiŋkiŋ la silɛɛ tena. He fa no Job wa, gɛ waa wona lawɛ bambile dɛ che kiŋkiŋ o wahala bini ka tonɛ, asɛ a habɔɔ Korowii chao. Nɛra waa dɛ domɛ Korowii tea wɛɛ sune ba nɛ. 12Yabala, anɔ la aa jaa dɛ ɛ siswɛm waa laanee kɛ he bɛ Korowii kɛɛ harɛ kɛɛ komɛlbwa dɛɛ ŋwɛɛ. Ba dɛ bɔɔ heyaa waa dɛ a ɛ kpela aa, hé sɛh ŋɔ, "Ɔɔh," dɛ nyosone gee yaa, hé ŋɔ, "Ɔɔhɔ." He bɛ ŋwɛɛ ja, asɛ a bɛ wechɔga ɛ dɛ tɛ heya. 13Dɛ sibegrewaane pu bɛlbwa naa, wɛ́ɛ soŋe Korowii. Dɛ silɛɛ waane ge pui naa, go yela dɛ kpɛɛ Korowii. 14Dɛ he bini bɛlbwa ge bwara dɛ weo waa, ó tomɛ nɛn o ka yerɛ asɔre la bini nomonome ásɛ ba ba ba kpɔ noo lege o tile Yeesu sɔn ta, dɛ soŋe Korowii tɛo. 15Dɛ ba kpɔ yarada dɛ soŋe Korowii aa, weela te la ɛɛ dɔ bokpegaa. Ya Dɔɔ la ɛɛ geloo o bwara do kpegri. Dɛ wechɔga anee o ɛ kwaraa naa, Korowii ɛɛ kpɔɔ kɛo. 16Anomanta a wer kɛŋɔ he bol he wechɔga dɛɛ bagle he bala he ne baa teŋɛ Yeesu nɛɛ la, ásɛ ba ge won dɛ soŋe Korowii dɛɛ tɛ heya, ásɛ o tɛ heyaa bokpega, dɛkalkɛŋɔ nɛndɛɛge dɛ soŋe Korowii aa, o dɛ no dɛ ɛ dɛɛ tɛo. 17Korowii keame Elaeja fa ɛ nɛn kɛŋɔ yan. O soŋe Korowii taeh dɛ ŋɔ ó gel bwaala nɛɛ, asɛ bwaala ta nɛɛ, hwel che bene atoro korobie anumɛl. 18Asɛ o berɛ soŋe Korowii ja dɛ ŋɔ ó gel bwaala nɛ, asɛ nyundua pili, bwaala nɛ taeh, harɛ ta kwaa bwa le. 19Yabala, dɛ he bini bɛl nyogrɔ le kasinteŋ ŋwɛnɛ la ta, asɛ he bini bɛl ge won berɛ chao dɛ baglo asɛ o berɛ ba teŋɛ kasinteŋ ŋwɛnɛ la ta ja aa, dɛ naate waa chao la ɛ waa taeh. 20Hé jemɛ kɛŋɔ nomɛlbwa waa wona cha wechɔg-ɛɛ asɛ o gel wechɔga ɛɛ dɛ berɛ baa ɛ wedɛɛga ja la, dɛ naate lɛ wechɔg-ɛɛ la nyu, dɛ gel o wechɔga damanta bwa waa ɛa la, Korowii kpɔ kɛo.

will be added

X\