Jems 4

1Bɔkwaa dɛɛ ba nagra ne he baah ta nɔ? Kwaa haa dɛ pɛlɛ a nɛɛ laa dɛɛ ba a ne naa? Anee dɛɛ yo heya. 2Kwaa haa dɛ nyin haa wola dɔ la waa hɛɛ kpoo dɔŋa la. He dɛ nyin kwaa sibegra ne, kɛ haa dɔ, a waa gela hɛɛ nagre dɛɛ yo la. Haa wola Korowii soŋe la waa haa wola he konnyina dɔ la. 3He dɛ soŋo, kɛ haa dɔ, dɛkalkɛŋɔ liire haa chegɛ a ta dɛɛ soŋo la aa were. He gbogbo konnyina ne kwaa haa dɛ pɛlɛ a nɛɛ waa hɛɛ soŋo. 4He nɛnchɔga nɔ haa vɛh Korowii kɛŋɔ hanchɔge waa dɛ nyin baala nɔ! Haa jemɛ kɛŋɔ nɛn waa dɛ nyin harɛ nɔ ta kwaa la vɛh Korowii dɛ ɛ o dɔm kɛɛ? Nomɛlbwa waa daŋre harɛ nɔ ta kwaa nyina ne la vɛh Korowii. 5Kɛ he dɛ lii kɛŋɔ pɛɛpɛɛ Korowii Tɔn la ŋɔ lileo Korowii aa kpɔa do ya bini la dɛ mee la? 6Kɛ chae Korowii aa na ya sum dɛɛ cha yaa la, on kpega, gɛ Korowii Tɔn la aa bagla ŋɔ, "Korowii dɛ ba nɛra baa dɛ ɛ sɔnnyin la ne harɛ, dɛɛ cha nɛra baa dɛ pwɛr ba te." 7Anomanta hé kpɔ he te tɛ Korowii asɛ dɛ no o be. Hé yo Bɔnsam. Wɛɛ chwao le he be. 8Hé suuh tel Korowii, asɛ o suuh ba he be. Wechɔg-ɛɛra, hé charɛ he liire dɛ le he wechɔga ta. He banɔ la he liire aa ɛ anɛnɛ la, hé laa doŋa kpɔ he nɛ. 9Hé gel he tea bini chɔg, he wi. Hé gel he mama berɛ wii asɛ he silɛɛ ge berɛ sum. 10Hé pwɛr he te tɛ Korowii. Wɛɛ gɔɔ heyaa. 11Yabala, he bɛ he bala dɛɛ ŋwalɛ. Nomɛlbwa waa ŋwalɛ o dɔŋ kɛɛ dɛ pwaoh la, dɛ Mmara laanee o ŋɔ aa were dɛɛ pwah la. Dɛ he bol waa dɛɛ yagɛ Mmara la aa, amɔ te dɛ haa waa Mmara la aa bagla la ɛ. Dɛ he dɛ gɔɔ he te dɛɛ pwah Mmara la. 12Korowii gbosoroo dɛ won do mmara dɛ won bol nɛn wechɔga wa, o gbosoroo dɛ won lɛ nɛra dɛ won chɔg bane ge. He gee umeo dɛ́ won bol he dɔŋ bwara wechɔge ɔ? 13Hé berɛ dɛɛ no. He banɔ la haa dɛ lii he nyuune bini dɛɛ ŋɔ, "Fini kɛɛ tɔpere nɔ tɔpesoo yaa la bwɛɛ nɔ bwɛsoo taa dɛ ka di benanyoa dɛɛ di bona dɛ nyin kwa," 14kɛ dɛ he ge aa jemɛ gɛ tɔɔ aa dɛ ba he pera la! Gɛ kɔɔle yon ta, kɛ aa bigri dɛ yon kaa la, gɛɛ he mkpa do. 15Anomanta a fe chɛ kɛŋɔ he ŋɔ, "Dɛ Korowii sɛoh dɛ tɛ yaa ŋwɛnɛ te naa, tɔɔ perɔ yaa ka ɛ kenii kɛɛ anɔɔ." 16Kɛ taraken he dɛ ɛ mbarafo kɛ he gbo ɛɛ wonoo ɛ gɛ haa dɛ nyin. A gɛ waa la bwa ɛ wechɔga. 17Anomanta nomɛlbwa waa jemɛ waa aa wera kɛŋɔ o ɛ, dɛ vɛh ɛɛ la, dɛ o ɛ wechɔga.

will be added

X\