Jems 3

1Yabala, he bwa laa chɛ kɛ he gel he sie begre Korowii waa bagla ta, dɛkalkɛ gɛ haa jema la, ya nɛra yaa dɛ bagle Korowii waa la waa binii wɛɛ ba nyiŋa kɛrɛdɛ gwaa nɛra baa kaa la. 2Ya bwa dɛ koni saŋ bɛlbwa. Dɛ nɛn aa wobɛlbwa waa dɛ bol la ta koni aa, dɛ o ɛ nɛŋkaih tenten. Nɛn waa won o wobol nyiŋa la, o won o te lawa wobɛlbwa ta. 3Ya kpɔ bune dɛɛ do jagre nyoo ásɛ aa no ya wa, asɛ ya won a bera dɛɛ kaa bela bwa yaa dɛ nyin. 4Yá ta sie na gɛ stiimae aa kana asɛ peukpeg yon ta dɛ kpɔɔ dɛɛ kaa, kɛ dajegaa bɛlee lɔ o ta ba kpɔ dɛɛ menɛ o sie asɛ wɛɛ kaa bela bwa baa dɛ nyin. 5Gɛɛ nyondoŋe do jegaa nɛn bini, kɛ dɛ won wejena ɛɛ. Hé na gɛ kɔr aa doa asɛ nihɔl won o fuih. 6Nyondoŋe do kɛŋɔ nihɔl ken, dɛ won wechɔga ɛɛ taeh ya bini, dɛ won yaa chɔga ya soga bini bwa. Bɔnsam niinii dɛɛ choŋu. 7Kpɔg bini ola ne olchɔga ne jumbii ne kwaa aa dɛ huuh ne mpo bini pɛŋa bwa, nɛn won a dɛɛra á do pwɛre. 8Kɛ nyondoŋe te, nomɛlbwa toole dɛ won o nyiŋa. O ɛ konchɔge haa wola won togro. O dɛ kpo kɛŋɔ tɛgchɔga ken. 9O nee yaa jam Korowii waa ɛ ya Naa ne ya Mɛɛ la, dɛ berɛ kpɔ o tenten dɛɛ taah ya dɔŋa Korowii aa ta ba kɛŋɔ o tenten la. 10Nyoa beŋkpoŋ la taa wobodɛɛga ne taahna bwa ɛɛ le. Yabala, a ta chɛ kɛŋɔ aa ba gɛ! 11Nenabɔɔ ɛɛ wonoo palɛ, o nee ane do som asɛ ane ge do nyɛgre aa? 12Yabala, pur da ɛɛ wonoo nɔnɛ sombie aa, kɛɛ bambi ɛɛ wonoo nɔnɛ pur nɔna aa? Gɛ tentenee nenabɔɔ o nee aa do nyɛgre la aa wola won berɛ do som bug ta tenten. 13He bini umee ɛ wejereme dɛɛ no waa mun ɔ? Gel o pwɛr o te dɛɛ ɛ wedɛɛga ásɛ o da bagle kɛ o ɛ wejereme. 14Dɛ he dɛ nyin kɛ he gbo dɔ, dɛ dɔ bɔweela ne sibegra he bambile bini naa, amɔ he bɛ sɔn dɛɛ nyin dɛɛ ŋɔ he dɔ wejema. Dɛ he dɛ ɛ gɛ naa, dɛ he ta kasinteŋ dɔe. 15Gɛ wejema nɔ ta Korowii doa wejema ɛɛ, a ɛ harɛ ta kwa. Korowii Domadɛɛge toole a ta. Bɔnsam liiree. 16Anomanta bela bɔweela ne n gbo dɔ aa lole la, belaa wesagasagare ne wedoŋa bwa do. 17Nɛn waa dɔ Korowii doa wejema la, kenii o da do: O waa do kaih, o waa dɔ deŋnesɔɔhna, o pwɛre, o dɛ no o dɔŋ wa, o dɛ na o dɔŋ sum, o ɛ nɛndɛɛge, o we-ɛɛla bwa wer, waa nɛra bane duure dɛɛ gwaa bane, o tea too. 18Nɛra baa dɛ nyin deŋnesɔɔhna la, nyopɛo nee baa ɛ ba wa, aa le wedɛɛga.

will be added

X\