Hibru 9

1Logle fɔo Korowii ne o nɛra faa fɔwa la gba fa dɔ mmara baa chegɛ o ta dɛɛ tomɛ Korowii, dɛ dɔ bela baa dɛ tomɛ Korowii harɛ nɔ ta, 2asɛ o do tɛnte dea bini. (Pateesah teŋe dea la doonyoa, asɛ bɛl ge bɔne dea la bini anɛ.) Dea la bologle la sɔne Korowii Bɔr Waa Do Goroŋ. A gɛ Korowii Bɔr Waa Do Goroŋ la bɔr belaa daa baa kpɔ kandea dɛɛ chɔŋɛ o ta, ne teebur ne paanoo baa kpɔa dɛɛ tɛ Korowii la che. 3Asɛ bela baa dɛ yerɛ Korowii Bɔr Waa Do Goroŋ Tenten la ge do pateesah nɛɛte la habɔɔ. 4Korowii Bogoroŋ Tenten la bɔr bela la, dɛ suugaswɛm kon baa dɛ fuh daawiile a sɔɔh aa soma o bini la lɔ bela. Dɛ daka baa kpɔ suugaswɛm ɛ o bwara bwa, asɛ o che tɛ ba ne Korowii fɔo la lɔ bela. Dɛ suugaswɛm vii la baa kpɔ kondikwaa aa le nyundua baa yera maana do o bini la, ne Aarɔn daŋgbala waa mogɛ papooni la, ne bwepɛmpɛŋre anɛ la ba faa chwerɛ o ne ba fɔobene la mmara fi la do a ta la lɔ daka la bini. 5Ba kwaa nyundua toroma baa dɛ yer ba Kerobim la banɛ chɔŋɛ daka la doa baa bagle kɛŋɔ Korowii jirima lɔ bela, asɛ ba sie gba dɔŋa, dɛ pagri kena tɔ bela baa laa Korowii bandia dɛɛ kpɔ o nɛra nɛɛ la. Yaa won dɔ bɔr taraken dɛ bagle kwaa nɔ waa bwa ka tonɛ. 6Ken nɔɔ dea la bini kwaa cheche, asɛ Sɔfore la ɛɛ jo o bologle la bini tɔperee bwa dɛ kaa ɛ ba toma. 7Dea la bonɛɛte la te la, Sɔfore Nomoa gboo dɛɛ jo o bini. O gba kwaraa la, kerabeŋkpoŋ gboo wɛɛ jo bela bena bɛlbwa. O ta chal kpoŋaa, waa bela jo. A nee o kaa soŋe o wechɔga ne nɛra la wechɔga baa ɛa baa wola jemɛ kɛŋɔ ba ɛ wechɔga la. 8Korowii Domadɛɛge dɛ bagle yaa waa dɛ le gɛ waa nɔ ta kɛŋɔ, dɛ tɛnte dea la ta lole naa, Korowii Bɔr Waa Do Goroŋ Tenten la ŋwɛnɛ ta pile mɔɔ. 9A gɛ waa nɔ chegɔ dɛ tɛ fini nɔ. A baglɔ kɛŋɔ saraha ɛɛ ne konaatena fuih dɛɛ tɛ Korowii aa won gel nɛn baa fuh kwaa la dɛɛ tɛo la tea to. 10A gɛ waa nɔ bwa ɛ kondiile ne konnyɔɔla ne bwara sarama waa aa ɛ nawee wa. Bwadabii waa a bwa, aa wone gel nɛn tea ɛɛ to. Korowiirii kpɔa tɛ o nɛra ásɛ baa teŋɛ a ta dɛ ka tel kɛŋɔ o ŋwɛnɛfale la aa bala. 11Yeesu Kristo balɔ dɛ ba ɛ Sɔfore Nomoa, dɛɛ ɛ wefala aa bala dɛ do wer ya jemɛ a waa taraken nɔ la toma. Tɛnte dea waa dɛ ɛ toma o bini la dɔ jirima dɛ do wer gwaa onɔ la. Nɛwɛnyini laa doo, harɛ bonɔ kon laa. 12Yeesu Kristo jo Korowii Bogoroŋ Tenten la. Waa jo bela la, boohna ne nabie chal laa o kpɔ jo bela. O gbagba chalee o kpɔ jo bela, dɛ lɛ yaa ta aa wola jagaa dɔ bwa. Kerabeŋkpoŋii o jo bela. A ta hiaih kɛŋɔ o jo bela kpa. 13Nɛn waa kah doŋa la, dɛ ba won boohna ne nabie chal ne naloni tɔɔ kpɔe dɛ jwal o nɛɛ asɛ dɛ laa doŋa kpɔ o nɛ aa, 14ɛrɛɛ a ɛ Yeesu Kristo chal aa wola won laa ya doŋa kpɔ ya nɛɛ kohona nɔ? Korowii Domadɛɛge waa lole saŋ bɛlbwa aa wola jaga dɔe la, on cha Yeesu Kristo o won kpɔ o te kɛŋɔ konaate waa wola kirihiah bɛlbwa dii dɛ ɛ saraha dɛ tɛ Korowii. Yeesu chal ɛɛ laa ya wechɔga aa dɛ kaa ya ne seo ta la bwa kpɔ ya nɛɛ asɛ ya tea to, asɛ a waa bɛ yaa hiah kpa, asɛ ya won tomɛ Korowii kasinteŋ la. 15Yeesu chegɔ nɛwɛnyini ne Korowii baah ta taraken dɛ fɔwɛ fɔo dɛ tɛ nɛwɛnyini ne Korowii, ásɛ nɛra Korowii aa lee ba ŋɔ ba ɛ o nɛra la won dɔ kwaa waa bag ba nyoa la saŋ bɛlbwa dɛɛ la. Baa wonoo dɔa saŋ bɛlbwa dɛɛ la, dɛkalkɛŋɔ wechɔga ba faa dɛ ɛ fɔobene la ta la, Yeesu Kristo aa baa sewɛ la, o bɔ a kem. O sewɔ asɛ ba wechɔga la bɛ won dɔ kpegri ba nɛɛ kpa. 16Dɛ nɛn chwerɛ gɛ aa chɛ kɛ ba di o kapɛrɛ, dɛ o ta sewaa, nɛn aa won di. 17Kɛ dɛ o sewɔ te naa, baa wonoo bɔne o kwaa name. Dɛ naate waa chwerɛ tɔn la ta lole te naa, ŋwɛnɛ toole kɛŋɔ nɛn bɔne o laala. 18A waa gela fɔobene la kwara ta la, chal ɛɛ fuge mɔɔ baa ɛ o we-ɛɛla la. 19Mosis tɔ sie bagle waa bwa Korowii aa ŋɔa ó nɛra la ɛ dɛ le Korowii Mmara Tɔn bini, mɔɔ dɛ kpɔ nabie ne boohna chale koo nee ta, dɛ kpɔ pee pona aa swɛɛra ne dawii ane soosiwi ɛ chal ne nee la merɛ Korowii Mmara Tɔn la ne nɛra la bwa nɛ. 20Waa kpɔa dɛɛ merɛ ba nɛɛ la, o ŋɔ, "Chal nɔɔ n kpɔ dɛɛ merɛ fɔo Korowii aa ŋɔa hɛ́ɛ teŋɛ a ta la ta á ɛ danseɛ kɛŋɔ he sɛoh kɛ hɛɛ teŋɛ o Mmara la taa." 21Gɛ tentenee o yon ɛ chal la dɛ merɛ tɛnte dea la ne numoli ne koŋkwaare baa dɛ ɛ a ne toma Korowii Dea bela la bwa ta. 22Mmara la ta la, chal nee baa fee doŋa waa ne kwaa kɛrɛdɛ ta. Dɛ chal ta fugaa, Korowii aa wechɔga kpɔe dɛɛ kɛ. 23A gɛ kwaa la bwa, dɛ Korowii doa kwaa la chaaree a bwa. Dɛ gɛɛ chɛ kɛ ba fee doŋa a ta. Kɛ Korowii doa kwaa la te gbagba la, kwaa baa kpɔa dɛɛ ɛ saraha dɛɛ fee a doŋa la gwaa anɔ. 24Bela Yeesu Kristo aa joa la, Korowii Bɔr Waa Do Goroŋ Tenten nɛwɛnyini aa mao o ɛ Korowii doa kon chaa gbo la bini laa o jo. Korowii doa gbagbaa o la, dɛ ka che Korowii sie ásɛ dɛ won cha yaa taraken. 25A ta hiaih kɛ o teŋɛ dɛɛ jo Korowii Bogoroŋ la dɛ kpɔ o te ɛ saraha bena bɛlbwa gɛ Juda tena Sɔfore Nomoa aa dɛ jo ba kon ta chal aa wola o gbagba bwara chal ɛɛ ne la. 26Dɛ bena bɛlbwaa wɛɛ jo bela dɛ kpɔ o te ɛ saraha aa, bena bɛlbwaa o fe ɛɛ ba wahala nae dɛ kpoŋe le harɛ mumpar ba le fini. Kɛ kerabeŋkpoŋ gboo o ba harɛ nɔ ta tɔpere tama waa kaa nɔ ta, dɛ ba kpɔ o te ɛ saraha dɛɛ doŋi wechɔga, waa wola gɛɛ ɛ kpa. 27Kerabeŋkpoŋii nɛwɛnyini bɛlbwa ɛɛ ba sewa, asɛ a habɔɔ la, Korowii bol o waa dɛ pa bole. 28Gɛɛ ba kpɔ Yeesu Kristo ge ɛ saraha kerabeŋkpoŋ, ásɛ o che nɛndamanta wechɔga. Wɛɛ berɔɔ ba nɛɛtena ja. Wechɔga waa laa wɛɛ ba bala name te. Nɛra baa dɛ kpao siswɛm ne laanee wɛɛ ba ba lɛ.

will be added

X\