Hibru 8

1Waa yaa dɛ bol laanee kɛŋɔ ya dɔ Sɔfore Nomoa o do gɛ tenten. O soge nomombɔr Korowiijen kookara la jwɛɛh nyundua. 2Korowii dobɔr tenten waa do goroŋ la, belaa wɛɛ di sɔfore. Korowii gbagbaa do bela dea la, nɛwɛnyini laa doo. 3Sɔfore Nomoa bɛlbwa tomaa kɛŋɔ wɛɛ fuh kwaa dɛɛ tɛ Korowii, dɛɛ ɛ saraha ge. Anomanta a hiaoh kɛŋɔ ya Sɔfore Nomoa nɔ ge dɔ kwaa waa kpɔ dɛɛ tɛ Korowii. 4Dɛ o fe lɔ harɛ bonɔ naa, o fe aa Sɔfo ɛɛ ba, dɛkalkɛŋɔ Sɔfore lɔ harɛ ta dɛɛ ɛ saraha gɛ Mosis Mmara aa bagla la. 5Ba sɔfore toma baa dɛ ɛ la, chaaraa baa chaa gɛ baa dɛ ɛa Korowii doa la. A tenten laa. A waa Mosis faa dɛ ba Korowii tɛnte dea baa dɛ tomɔ o bini la ɛɛ la, Korowii ŋɔ o be ŋɔ, "Nyiŋi dɛ ɛ komɛlbwa kɛrɛdɛ kɛŋɔ maa bagle bwe la doa la." 6Taraken nɔ, ba tɛ Yeesu sɔfore toma o gwaa harɛ bonɔ Sɔfore. Fɔofale la waa chegɛ nɛwɛnyini ne Korowii baah ta dɛ fɔwɛ la ge gwaa ombene la, dɛkalkɛŋɔ nyoo Korowii aa baga fɔofale la ta la gwaa ambena la. 7Dɛ fɔobene la fe wer, waane aa wola toole o ta naa, onfale fe ta hiaih kpa. 8Kɛ Korowii nao kɛŋɔ o nɛra chɔg fɔobene la, a waa o ŋɔ, "Saŋ bɛl ɛɛ bao, asɛ n ne Israel tena ne Juda tena fɔwɛ fɔofale bɛl. 9O ne fɔo la n ne ba naanar aa fɔwa a gɛ saŋ maa lag ba le Ijipt harɛ la aa beŋkpoŋ ɛɛ ba, dɛkalkɛŋɔ ba naanar fa ta fɔo la ta teŋɛ. Anomanta n ge laa sie kpɔ ba nɛ. 10Fɔo n ne Israel tena aa dɛ ba fɔwa kerekeree la: Mɛɛ kpɔ me mmaraa do ba nyu bini, dɛ chwero do ba bambile bini, asɛ dɛ ɛ ba Korowii, asɛ ba ge ɛ n nɛra. 11Aa berɛ hiah kɛŋɔ nomɛlbwa bagle o dɔŋ kɛɛ o nime ŋɔ, 'A wer kɛŋɔ he jemɛ Korowii' kpa, dɛkalkɛŋɔ ba bechale ne nomonome bwa ɛɛ jem mɛɛ. 12Mɛɛ sune ba nɛɛ dɛ kpɔ ba waa aa wola togrɛ kɛ ba, maa ba wechɔga waa lii kpa." 13Korowii aa dɛ bol fɔofale waa nɔ, onlogle la berɛ ombene. Waa berɛ ombene nɔ, o kpegri tonɔ, wɛɛ nyogre.

will be added

X\