Hibru 6

1Yaa jemɛ Yeesu Kristo welogla la nomanta la, siee a chɛ kɛ yaa kaa, dɛɛ la nomonome bini. Yaa berɛ pa mun bol gɛ aa chɛ kɛ ya charɛ liire le ya wechɔga aa dɛ kaa ya nɛɛ seo ta la ta, ne gɛ aa chɛ kɛ ya yarada Korowii dɛ kpɔ ya te tɛo waa kpa. 2Yaa berɛ bol Korowii nee sɔe wa, ne nɔɔra kpɔe dɛ dawɛ nɛra nɛ, ne gɛ lala bwa aa ba ir seo ta, ne gɛ Korowii aa ba bol nɛra waa dɛ pa bole dɛ bɔ ba ba wechɔga kem aa wola jagaa dɔ waa kpa. 3Dɛ Korowii sɛoh waa, yaa gel anɔ bwa waa baglaa, dɛ kaa sie. 4Nɛra baa yarada Korowii waa ka la, ɛrɛɛ bá ɛ dɛ charɛ ba liire dɛ le ba wechɔga ta dɛ berɛ yaradao jaɔ? Korowii chaah ba sie o waa nɔ ta ka, asɛ ba na Korowii doa koŋkɛɛle la som la bɛl, asɛ dɛ tɛɛ ba o Domadɛɛge la ka. 5Ba no Korowii waa la dɛ jemɛ wera aa wera, dɛ dɔ kpegri baa dɛ ba dɔe tɔpere waa lɔ sie dɛɛ ba bala la ta ane. 6Anɔ bwa habɔɔ la, ba gel Korowii waa ba faa dɛ yarada la! A kpegri kɛ ba charɛ ba liire dɛ le ba wechɔga ta dɛ berɛ ba yaradao, dɛkalkɛŋɔ ba kaa ɛ kɛŋɔ baa kwaara kpaa Korowii Bie la dɛɛ pɛl o dagagre ta, dɛ gel sihiih kpoo nɛra baah ta. Ba ɛo dawɛ ba nyu ta. 7Harɛ bɛlbwa bwaala aa dɛ nɛ o ta wɛɛ ɛ kondikwaa dɛɛ tɛ nɛra baa dɛ parɔ la, Korowii ɛɛ geloo o ɛ harɛdɛɛge. 8Kɛ dɛ harɛ bɛlbwa le kpɔga ne sɔɔhne aa, o ta tɔnɔ dɔe. O chegɛ Korowii taahna nyoa. Baa fuuh. 9N dandɛɛga, yaa dɛ bol anɔ bwa nɔ, he te la, he wa aa yaa gwaŋɛ. Ya jemɔ kɛ he we-ɛɛla ɛɛ do werii a bagle kɛŋɔ Korowii lɛ heya. 10Korowii ta nɛn waa wola waa ɛ a ŋwɛnɛ ta ɛɛ, a ba ɛ kɛŋɔ wɛɛ soh he tondɛɛga haa dɛ ɛ, ne gɛ haa dɛ nyinu dɛ koh a waa cha o nɛra dɛ taa cha ba la waa. 11Ya dɛ nyin kɛŋɔ he bɛlbwa swɛɛ siwi gɛ dɛ ka tonɛ ásɛ dɛ won dɔ kon haa dɛ hwɛgɛ o ta la. 12Yaa nyin kɛ he bwara hwah heya. Ya dɛ nyin he kpɔ nɛra baa lawɛ bambile dɛɛ yarada Korowii asɛ o tɛɛ ba kwaa waa bag ba nyoa la da. 13Korowii bagɛ Abraham nyoa. Waa bagɔ nyoa la, komɛlbwa aa wola toole dɛ gwaalo la, o gbagbaa o ŋwɛɛ, dɛ ŋɔ, 14"N ŋwɛɛrɔ kɛŋɔ mɛɛ kwaa he wobɛlbwaa tɛɛ, dɛ tɛɛ naanar kohona." 15Abraham ge wono lawɛ bambile aaa, dɛ ba dɔ kon Korowii aa bagɔ nyoa la. 16Dɛ nɛn dɛ ba ŋwɛɛra aa, kon waa gwaaloo o yon ŋwɛɛ, asɛ ba jemɛ kɛ kasinteŋii wɛɛ bol, dɛ tɔŋla bɛlbwa teŋo. 17Dɛ Korowii dɛ nyin o bagle nɛra baa dɛ ba kon waa bag ba nyoa ŋɔ wɛɛ ɛo tɛɛ ba la kɛŋɔ waa o liire chara ba bwa, a waa o ŋwɛɛ la. 18Korowii bagɛ nyoa dɛ ŋwɛɛ o tenten ja. Webele anɛ nɔ gelɔ nyobaga la do kpegri, dɛkalkɛŋɔ Korowii aa won teŋe nyosone. Anee dɛ do ya nɛra yaa ba Korowii be ŋɔ ó lɛ yaa la gbemba, asɛ ya won do kpegri ya hwɛga yaa dɛ hwɛgɛ o nɛɛ la ta. 19A gɛ hwɛga nɔɔ dɛ gel ya bambile won che bobeŋkpoŋ, asɛ ya che kɛrɛdɛ. Hwɛga nɔ nomanta, a kaa ɛ kɛŋɔ ya won Korowii bodɛɛge bela pateesahjen faa tɔa nɛmpɛɛne aa wola bela jo la joe. 20Yeesu aa ɛ Sɔfore Nomoa dɛɛ la saŋ bɛlbwa kɛŋɔ Mɛlkesɛdɛk la, o koh ya waa dɛ tɔ sie ya nɛɛ jo bela mɔɔ ya ge ba.

will be added

X\