Hibru 5

1Sɔfore Nomoa bɛlbwa waa dɛ ɛ toma Korowii Dea la, o dɔŋa nɛwɛnyini binii ba yon leo, dɛ kpɔɔ ŋɔ ó ɛ Korowii toma dɛɛ tɛɛ ba, dɛ kpɔ jam kwaa dɛɛ tɛ Korowii, dɛ kpo kondɛɛra dɛ fuah dɛɛ tɛo ba wechɔga wa. 2A gɛ Sɔfore Nomoa nɔ ɛɛ wonoo dɛɛ sune nɛra baa wola waa jemɛ dɛɛ koni la nɛ, dɛkalkɛŋɔ o gba kwaraa ta kpegri dɔe dɛ́ won dɛɛ vɛh wechɔga ɛɛ. 3Gɛ o yon kpo kwaa ɛ saraha dɛɛ tɛ nɛra ba wechɔga waa la, gɛɛ wɛɛ ba ɛɛ dɛɛ tɛ o tenten, dɛkalkɛŋɔ o gba ge dɛ ɛ wechɔga. 4Sɔfore Nomoa ɛɛ nɔ ɛ wejena. Nomɛlbwa toole dɛ gbagba won le o te dɛ ɛ a gɛ toma nɔ, nemenɛ Korowii aa leo kɛŋɔ waa le Aarɔn o ɛ bɛl la. 5Gɛɛ a do Yeesu Kristo ge aa wola o te gbagba leɛ Sɔfore Nomoa toma aa ɛ wejena nɔ ta. Korowiirii ŋɔ o be ŋɔ, "N Biee hen, fini n berɛ he Mɛɛ." 6Korowii bol bobɛl ge ŋɔ, "Hɛɛ ɛ Sɔfoo saŋ bɛlbwa, kɛŋɔ Mɛlkesɛdɛk faa ɛ Sɔfo la." 7Yeesu aa lɔ harɛ ta la, dɛ wii ne siniire nee wɛɛ soŋe komɛlbwa dɛɛ le Korowii be. Dɛ Korowii dɔ kpegri dɛ́ leo seo ta. Waa pwɛra dɛɛ no Korowii deŋna waa la nomanta, dɛ Korowii dɛ no o wesoŋa. 8Yeesu ɛ Korowii Bie, kɛ o na wahala, dɛ che a ta dɛ won pwɛr o te dɛ no o Mɛɛ deŋna wa. 9Waa wona teŋɛ o Mɛɛ ŋwɛnɛ ta kɛrɛdɛ ka tonɛ la, o berɛ nɛra baa dɛ teŋɛ o Yeesu ŋwɛnɛ ta bwa Lɛɛ, bá che o nɛɛ dɛ dɔ lɛɛ aa wola jaga dɔe bwa. 10Korowii bol o waa dɛ ɛo Sɔfore Nomoa kɛŋɔ Mɛlkesɛdɛk faa ɛ Sɔfo la. 11Waa yaa dɔa dɛ́ bol he be dɛ le gɛ waa nɔ ta la warɔ, kɛ a bini bagla kpegri, dɛkalkɛŋɔ haa waa mun no. 12Haa lea hweli waa nɔ bigro, a chɛ kɛ saŋ nɔ he fe aa jema dɛɛ bagle nɛra a wa. Kɛ he ta do kɛ nɛra baa pa mun dɛɛ hweli Korowii wa, asɛ a chɛ kɛ ba le mun ta dɛ bag ba a wa. A fe aa chɛ kɛ he won dɛɛ di kondikwaa tenten la, elee he taa ɔr. 13Nomɛlbwa o taa dɛ ɔr Korowii waa ta la, bechalaa on. Waa waa jemɛ, waa wedɛɛga aa dɛ su Korowii siwi jemɛ. 14Nomonomee dɛɛ di kondikwaa tenten. Banee ɛ waa ben, dɛ jemɛ wedɛɛga ne wechɔga.

will be added

X\