Hibru 4

1Korowii nyoa waa bagɛ nɛra ona waa ŋɔa bá ba onɛ la ta lole. Anomanta hé gel ya nyiŋi kɛrɛdɛ asɛ he bɛlbwa bɛ a gɛ nyobaga la ba paŋɛ. 2Gɛ yaa dɛ no Korowii Amanesoma nɔ nɔ, gɛɛ ba ge noa. Kɛ ba te aa noa la, a ta tɔnɔ leɛ tɛɛ ba, dɛkalkɛŋɔ ba ta an yaradae. 3Ya te nɔ, ya dɛ yarada Korowii waa la, anomanta Korowii ɛɛ geloo ya onɛ ona waa dɛ onɛ la bɛl. Ba chwerɛ Korowii Tɔn bini ŋɔ: "N baah naa dia la, n ŋwɛɛrɔ ŋɔ baa ona maa tɛɛ ba ŋɔ bá ba onɛ gɛ maa dɛ onɛ la dɔe ba bwa." A ta baglɛ kɛŋɔ ona toole kpa. Gɛ saŋ Korowii aa ta harɛ la, dɛ o ɛ o wobɛlbwa tonɛ dɛ te onɛ. 4Korowii Tɔn bobɛl bol tɔpenuanɛ wee la waa ŋɔ, "Korowii aa tonɛ o toma bwa la, o onɔ tɔpenuanɛ wee la ta," 5asɛ bela yaa dɛ bol o waa nɔ baglɔ kɛŋɔ: "Baa ona maa tɛɛ ba ŋɔ bá ba onɛ gɛ maa dɛ onɛ la dɔe ba bwa." 6A baglɔ kɛŋɔ nɛra bane ta lole dɛɛ ba a gɛ ona la dɔe. Aa chegɛ a saŋ la tena baa no Korowii Amanesoma nɔ deŋnekpeg ta asɛ ba paŋɛ Korowii ona la, 7Korowii berɔ kwaa do tɔpefale, dɛ pa o sɔn "fini." A habɔɔ aa bigra la, Korowii chegɛ Devid nɛɛ dɛ bol gɛ tɔpere nɔ wa. Anee n faa bol la: "Dɛ he no Korowii waa fini naa, he bɛ deŋnekpeg ɛ." 8Josua aa ba a saŋ la tena ne ba harɛ ta la, dɛ ba fe dɔ ona Korowii aa bol o waa la aa, Korowii fe ta berɛ bol tɔpefale waa kpa. 9He nyiŋo na naa, ona Korowii aa kwaara cheg o nɛra la ta lole bá ba onɛ, kɛŋɔ Korowii aa ona tɔpenuanɛ wee la ta la. 10Nomɛlbwa waa dɛ onɛ ona Korowii aa dɛ onɛ la, dɛ o onɛ o toma bwa ta kɛŋɔ Korowii aa onɛ o toma ta tɔpenuanɛ wee la ta la. 11Anomanta hé gel ya swɛɛ siwi dɛ dɔ gɛ ona la. A ta chɛ kɛ bɛlbwa ɛ a saŋ la tena deŋnekpeg la dɔŋ dɛ ba paŋɛ gɛ ona nɔ. 12Korowii waa waa bola do kɛ kon o siwi aa lole, dɛɛ ɛ toma. A nyɛgre ge gwaa naŋgɔse bɛlbwa, hale dɛ fe won pere hweera le lileo ta, dɛ won jo sema bini, hale dɛ fe won pere hoga ne fɔɔla baah. A wono dɛɛ jemɛ nɛwɛnyini liire ne o wesɔɔhla bwa. 13Korowii kontaale bɛlbwa toole dɛ won kpɔ o te sɔɔh. Wobɛlbwa chɔ baŋ o be wɛɛ nao. Onee yaa ba ya waa yaa ɛa harɛ bonɔ bwa taara dɛ bagle. 14Ya dɔ Sɔfore Nomonjen waa wona la Korowii sie tenten. Onee Korowii Bie Yeesu la. Anomanta hé gel ya lawɛ o waa la yaa dɛ yarada la bini kpoŋe kiŋkiŋ. 15Ya Sɔfore Nomonjen yaa dɔa la ta nɛn waa wola ya nɛɛ sune ya gwɛgra nɔ ta ɛɛ. Daahna bɛlbwa soosiwi toole Bɔnsam aa wola on daahnɛ kɛŋɔ waa dɛ daah yaa nɔ. Kɛ o chegɔ kiŋkiŋ, o ta wechɔga ɛɛ. 16Anomanta, hé gel ya lɔ bambile dɛ tel Korowii waa dɛ sune nɛra nɛɛ dɛɛ cha ba la sie. Wɛɛ na ya sumii dɛɛ cha yaa gɛ saŋ aa hiah yaa.

will be added

X\