Hibru 3

1Anomanta n bala Korowii nɛra waa le ya ne he bwa tɛ o te, hé ta sie nyiŋi Yeesu na. Korowiirii tomɔ ŋɔ ó ba ɛ ya waa yaa dɛ yarada nɔ Sɔfore Nomoa. 2O waa dɔ kasinteŋ Korowii waa kpɔɔ ŋɔ ó ɛ o toma la be kɛŋɔ Mosis faa dɛ nyiŋi Korowii nɛra nɛɛ o waa dɔ kasinteŋ wobɛlbwa ta la. 3Nɛn do dem aa, nɛra dɛ kpɛɛro dɛ gwaa dem la. Gɛɛ Yeesu ge do. A chɛ kɛ ba kpɛɛro gwaa Mosis, 4dɛkalkɛ dem bɛlbwa waa ɛ dem la, dɛ nɛnee doo. Korowii gee ta komɛlbwa. 5Mosis aa ɛ Korowii bonɔɔ dɛɛ nyiŋi Korowii nɛra waa bwa ta la, dɛ o waa dɔ kasinteŋ taeh, kɛŋɔ bonɔɔ kasinteŋ te wa aa dɔ kasinteŋ o dɔɔ be la. Dɛ o dɛ bol waa Korowii aa ba bol kerekere la nɛra be. 6Kɛ Yeesu Kristo te kasinteŋ waa dɔa la, Korowii Bie on, asɛ o ɛ Korowii nɛra bwa nomoa. Ya yarada yaa dɔa Yeesu Kristo nɛɛ, ne hwɛga yaa dɔa ya sie lɛ a ta la, ya lawɛ a bini kpoŋe kiŋkiŋ naa, Yeesu Kristo nɛraa yan. 7Anomanta Korowii Domadɛɛge bolɔ ŋɔ, "Dɛ he no Korowii waa fini naa, 8he bɛ deŋnekpeg ɛ kɛŋɔ he naanar faa ɛ deŋnekpeg dɛ vɛh o waa noe dɛ jo o nɛɛ la. 9He naanar bene fifraanaarɛ baa dia kpɔg baah la, ba daah mɛ na dɛ na waa maa ɛa bwa. 10Anomanta n baah di gɛ nɛra la nɛ, asɛ n ŋɔ ba bambile ta n waa lawɛ bwa. Ba vɛh n waa ta teŋa. 11N baah naa dia la, n ŋwɛɛrɔ ŋɔ, 'Baa ona maa tɛɛ ba ŋɔ bá ba onɛ gɛ maa dɛ onɛ la dɔe ba bwa.' " 12Anomanta yabala, hɛ́ɛ nyiŋi kɛrɛdɛ asɛ he bini bɛlbwa bɛ liichɔga ba dɔ kɛŋɔ waa Korowii waa lole saŋ bɛlbwa dɛ gbo ɛ Korowii laanee yarada, dɛ ba vɛh o waa ta teŋa. 13Anomanta hɛ́ɛ ja dɔŋa tɔperee bwa mɔɔ tɔpere la o Domadɛɛge aa bol o waa dɛ ŋɔ "fini" la garɛ, asɛ wechɔga bɛ heyaa ba negre, he deŋne ba do kpegri. 14Gɛ ya yarada aa doa le mumpar la, dɛ ya wono che gɛ kiŋkiŋ ka tel wobɛlbwa jaga aa, dɛ ya ne Yeesu Kristo pɛo wobɛlbwa ta. 15Korowii Tɔn bolɔ ŋɔ: "Dɛ he no Korowii waa fini naa, he bɛ deŋnekpeg ɛ kɛŋɔ he naanar faa ɛ deŋnekpeg dɛ vɛh o waa noe dɛ jo o nɛɛ la." 16Dɛ lepetenaa no Korowii waa dɛ ɛ deŋnekpeg dɛ vɛh o waa noe dɛ jo o nɛɛ nɔɔ? Nɛra Mosis aa tɔ ba sie dɛ le Ijipt harɛ la bwaa ɛ deŋnekpeg la. 17Lepetena nɛɛ Korowii baah di bene fifraanaarɛ nɔɔ? Nɛra baa ɛ wechɔga dɛ serewe kpɔg baah la, ba nɛɛ o baah di. 18Korowii aa ŋwɛɛra ŋɔ baa ona waa tɛɛ ba ŋɔ bá ba onɛ la dɔe ba la, dɛ lepetena bee o ŋɔ gɛ nɔɔ? Nɛra baa ɛ deŋnekpeg la bee o ŋɔ gɛ. 19He ta nae kɛŋɔ ba yarada bɛ dɔe waa Korowii aa wola ban ŋwɛnɛ tɛɛ ba dɔ ona waa dɔa tɛɛ ba la aa?

will be added

X\