Hibru 2

1Gɛɛ a do te naa, a chɛ kɛ ya do sie dɛ nyiŋi waa yaa noa la kɛrɛdɛ, asɛ dɛ bɛ ba koni dɛ nyogre ŋwɛnɛ. 2Waa Korowii faa kpɔa tɛ o nyundua toroma ba bol la ɛo kɛ mmarakpeg bɛl. Nomɛlbwa waa wola a ta teŋɛ la, ba tɛr o deŋne gɛ aa chɛa. 3A do gɛ naa, ya lɛɛ waa nɔ aa gwaa nyundua toroma waa la kohona nɔ, dɛ ya vɛah aa, ɛrɛɛ yaa ba ɛɛ dɛ leɔ? Ya Dɔɔ Yeesu gbagba fa tɔ sie bol ya lɛɛ waa nɔ, asɛ nɛra baa noa ge di danseɛ ya be kɛ a ɛ kasinteŋ. 4Korowii gbagba chegɛ nyokpowaa ne wekpega ɛɛ ta, ne o Domadɛɛge waa kpɔa bɔne nɛra gɛ waa dɛ nyin la ta dɛ di a danseɛ. 5Nɛra baa dɛ ba le doe yaa dɛ bol ba waa nɔ, o ta ban kpɔe do nyundua toroma lɔga. 6Ba chwerɛ Korowii Tɔn bini bobɛl ŋɔ, "Korowii, nɛn gee bɔkwa asɛ hɛɛ lii o waɔ? Nɛwɛnyini gee bɔkwa hɛɛ dawɛ o waɔ? 7Tamaa kenii he gel nyundua toroma gwaalo. He gelɔ o dɔ jirima, asɛ komɛlbwa ɛɛ tɛo duure, 8dɛ kpɔ komɛlbwa do o lɔga." Waa kpɔ komɛlbwa do nɛwɛnyini lɔga nɔ, a baglɔ kɛŋɔ komɛlbwa toole waa wola o kpegri dɔe. Kɛ ya ta nae kɛŋɔ kwaa bwa aa lɔ nɛwɛnyini lɔga mɔɔ. 9Kɛ ya dɛ na Yeesu te kɛŋɔ Korowii aa ba o ne harɛ asɛ nyundua toroma gwaalo tama, asɛ waa na wahala dɛ sewɛ la, o tɛo jirima dɛ gel komɛlbwa ɛɛ tɛo duure. Korowii alaworomɛɛ o sewɛ tɛ nɛwɛnyini bwa la. 10Korowiirii ta komɛlbwa, asɛ a che o kpegri ta komɛlbwa ge do le. Waa gela Yeesu na wahala la, magraa a magre kɛrɛdɛ. Waa dɛ nyin o lɛ nɛndamanta dɛ gel ba ɛ o bii, dɛ do o be dɛ dɔ jirima la waa o gel Yeesu waa ɛ ba Sitɔɔ la gbagba kpɔ a gɛ ŋwɛnɛ la ta dɛ na wahala dɛ́ won ɛ ba Sitɔdɛɛge kɛrɛdɛ ka tonɛ dɛ lɛɛ ba la. 11Yeesuu laa nɛwɛnyini doŋa dɛɛ kpɔ ba nɛɛ dɛ gel ba ɛ Korowii nɛra. O ne nɛra waa laa doŋa dɛɛ kpɔ ba nɛɛ la bwa Mɛɛ beŋkpoŋ. A waa aa wola on sihiih ɛ kɛŋɔ o yer ba o nimanar la. 12O ŋɔ Korowii be ŋɔ, "Mɛɛ bol he waa haa ɛa n nimanar bee. Mɛɛ kpɛɛree ba chema binii." 13O toolo berɛ ŋɔ, "Mɛɛ kpɔ n tenee tɛ Korowii dɛ yaradao," dɛ berɛ ŋɔ, "N ne bechale Korowii aa tɛ mɛ laanee la." 14Nɛra Yeesu aa dɛ yer ba bechale la, baa ɛ nɛwɛnyina dɛ dɔ bwadabii ne chal nomanta la, o gbabir baa berɛ nɛwɛnyini dɛ do kɛ ban, dɛ dɔ bwadabii ne chal. O ɛ gɛ, ásɛ dɛ won che o seo waa dɛ ba sewa ta dɛ chɔg naate seo aa tɛo kpegri nɛra nɛɛ la. Onee Bɔnsam. 15Yeesu ɛ ken ásɛ dɛ won lɛ nɛra baa koh seo ɔma waa dɛ ɛ yoma ba soga bini bwa la. 16Ya jemɔ kɛŋɔ kasinteŋ, nyundua toroma laa o cha nɔ, Abraham naanaree o cha. 17Dɛ a chɛ kɛ o do gɛ Abraham naanar la aa doa ŋwɛnɛ bɛlbwa ta. Gɛɛ o ɛ dɛ́ won tomɛ Korowii kɛŋɔ ba Sɔfore Nomoa kasinteŋ ne dɛɛ na ba sum, dɛ won dɛɛ soŋe ba wechɔga, dɛ won dɛɛ kwaa ba ne Korowii baah. 18Bɔnsam daahno na dɛ ɛo hɔhɔrɔwa ó fe ɛ wechɔga, kɛ o ta on wone. Anomanta wɛɛ wonoo cha nɛra Bɔnsam aa dɛ daah ba dɛ na la.

will be added

X\