Hibru 13

1He nya biirii dɔŋa Yeesu Kristo waa nɔ ta, anomanta hɛ́ɛ nyin dɔŋa saŋ bɛlbwa. 2He bɛ soh kɛŋɔ a chɛ kɛ hɛɛ lɛ hɔɔhra dɛɛ nyiŋ ba kɛrɛdɛ. Bane ɛ gɛ dɛ nyiŋi nyundua toroma, dɛ baa jemɛ. 3Hɛ́ɛ lii nɛra baa do ba dea waa kɛŋɔ he ne banee ba do dea ken. Hɛ́ɛ lii nɛra baa dɛ ɛɛ ba hɔhɔrɔwa ge waa kɛŋɔ he ge aa dɛ na weweele la bɛl ken. 4A chɛ kɛ nomɛlbwa kpɔ duure dɛɛ tɛ hahmor, dɛ bɛ nɛmpɛɛne lawɛ dɛɛ chɔ dɛ ka ja ba haahna kɛɛ ba jaranar nɛ. Korowii ɛɛ tɛr nɛra baa dɛ ɛ wedoŋa baa ne haah chɔe be pera dɛɛ nyin ba dɔŋa haahna kɛɛ ba dɔŋa jaranar la deŋnee. 5He bɛ gel suuga waa swɛɛ he siwi kohona. Hé gel anɔ la haa dɔa la magre he ne, dɛkalkɛŋɔ Korowii bolɔ ŋɔ, "Maa heyaa ta bwa, maa sie laa kpɔ he nɛɛ bwa." 6Anomanta yaa wonoo lɔ bambile ŋɔ, "N Naa Korowii dɛ cha mɛ, anomanta maa ɔmɛ. Ɛrɛɛ nɛwɛnyini ɛɛ ba wona ɛɛ mɛ nɔ?" 7Hé nyiŋi he nomonome ba faa bol Korowii waa dɛɛ bagle heyaa la. Hé nyiŋi gɛ ba faa teŋɛ Korowii ŋwɛnɛ ta dɛ ba serewe, dɛɛ yarada Korowii gɛ ba faa dɛ yaradao la. 8Yeesu Kristo aa begre. Gɛ waa doa a saŋ la la, gɛɛ o ta do fini, gɛɛ wɛɛ ba doe saŋ bɛlbwa. 9He bɛ gel wefala chɔg he liire asɛ he le Korowii ŋwɛnɛdɛɛge la ta. He dɛ nyin he do kpegri Korowii nɛɛ teŋa ta naa, hé kpɔ sie dawɛ chae Korowii aa sune nɛra nɛɛ dɛɛ cha ba la ta. He bɛ sie kpɔ dawɛ kondikwaare ane kii ne ane dii ta, dɛkalkɛŋɔ a ta wone cha nɛra baa kpɔ sie dawɛ a ta la. 10Juda tena Sɔfore baa dɛ ɛ toma Korowii Dea bini la ta ŋwɛnɛ dɔe kɛŋɔ ba di ya saraha kwaa yaa dɛ di la ane. 11Juda tena Sɔfore Nomoa dɛ ba chal ne saraha ɛɛ Korowii Bogoroŋ Tenten la aa, o dɛ jo a ne bela dɛ́ kpɔ soŋe o nɛra wechɔga. Kondɛɛra la baa ɛ a chal la te la, daharaa baa fuah. 12Gɛ tentenee Yeesu ge na wahala dɛ sewɛ Jerusalam dahara, asɛ dɛ kpɔ o chal dɛ laa doŋa kpɔ nɛwɛnyina nɛɛ ásɛ ba ɛ Korowii nɛra. 13Anomanta, hé gel ya la o be dahara bela, dɛ ka puu di o sihiih waa dia la, 14dɛkalkɛŋɔ, ya ta bwɛɛ dɔe dɛ́ so o ta saŋ bɛlbwa harɛ bonɔ. Bwɛɛ o taa lɔ sie dɛɛ ba la, o taa ya sie dawɛ. 15Anomanta a chɛ kɛ ya che Yeesu nɛɛ dɛ ɛ ya saraha dɛɛ tɛ Korowii saŋ bɛlbwa. Saraha yaa dɛ ba ɛɛ laanee kɛŋɔ yáa dɛɛ kpɛɛroo dɛɛ yerɛ o sɔn. 16He bɛ dɔŋa wedɛɛga ɛɛ ne dɔŋa chae waa soh, dɛkalkɛŋɔ a gɛ waa nɔ ɛ saraha a waa aa dɛ lɛ Korowii sie. 17Hɛ́ɛ no nɛra baa dɛ tɔ he sie la nyoa wa, dɛɛ ɛ waa baa ŋɔa hɛ́ɛ ɛ la, dɛkalkɛŋɔ ban dɛɛ nyiŋi heya. Ba dɔ nkontaah dɛ́ bu Korowii sie dɛ bagle gɛ bwa baa nyiŋi heya. Hɛ́ɛ no ba nyoa wa, ásɛ ba won ɛ toma silɛɛ ne. Dɛ haa ba nyoa waa no aa, baa ɛa tebinichɔg nee, aa wola tɔnɔ bɛlbwa lee ba dɛ tɛ heya. 18Hé soŋe Korowii dɛɛ tɛ yaa. Ya jemɔ kɛŋɔ ya tea bini too, dɛkalkɛŋɔ ya dɛ nyin kɛ yaa ɛ waa aa togra saŋ bɛlbwa. 19N dɛ soŋe heyaa kohona ásɛ he soŋe Korowii ásɛ o ba n ne he be warane. 20N dɛ soŋe Korowii waa ir ya Dɔɔ Yeesu seo ta la. Ya Dɔɔ Yeesu ɛ Petegrejen dɛɛ nyiŋi o peera ta. Seo o gbagba aa sɛah dɛ sewɛ la, a taa a che asɛ Korowii fɔwɛ fɔo waa wola pura dɔe bwa la. Kórowii waa dɛ tɛ bambisɔɔhna la tɛ heyaa dadɛɛge aa chɛ kɛ he dɔ dɛ́ won dɛɛ ɛ o tetoora bwa. Ó che Yeesu Kristo nɛɛ dɛ ɛ waa waa dɛ nyin bwa ya bini. Yeesu Kristo chɛ jam saŋ te bɛlbwa! Aamen. 22Yabalawa, n dɛ soŋe heyaa kɛŋɔ he lawɛ bambile dɛ no waa nɔ maa chwera dɛ kpɔ dɛɛ do heyaa gbemba nɔ. He nyiŋo na naa, tɔn nɔ maa chwerɛ heyaa nɔ aa jaŋɛ bɛlbwa. 23N dɛ nyin he jemɛ kɛnaŋɔ ba le ya dɔŋ Timoti dea. O balɔ warane asɛ mɛɛ ba he be naa, n ne wɛɛ bao. 24Ya dɛ na he nomonome la bwa, ne Korowii nɛra la bwa. Yabala Itali harɛ tena la ge dɛ na heya. 25Kórowii cha he bwa sekwaraa.

will be added

X\