Hibru 12

1Ya te aa dɔ a gɛ nɛra nɔ bwa waa baa yarada Korowii dɛ ɛ aa bagle yaa waa nɔ, a chɛ kɛ ya ge lawɛ bambile dɛ chwa ya chwae waa chɔ ya sie nɔ siswɛm ne. A chɛ kɛ ya laa komɛlbwa waa gel ya lɔ naa ya chwae ta la kpɔ, dɛ gel wechɔga aa dɛ tɔ yaa ŋwɛnɛ bwa. 2Yáa nyiŋi Yeesu waa ɛ ya Korowii yaradae bwa nyu te, dɛ ɛ a mumpar ne a jaga la. On koh bosɔɔhna waa ba dɔ waa asɛ ba ɛo hɔhɔrɔwa dagagre ta la. O ta sihiih waa koɛh dɛ vɛh. Taraken o soge nomombɔr Korowii dig ta. 3Hé nyiŋi gɛ nɛnchɔga faa haoh dɛɛ chɛgro asɛ o lawɛ bambile la, asɛ bɔhwaah bɛ heyaa lawɛ, he le habɔɔ. 4He ne wechɔga aa dɛ yo nɔ, he ta yoi chal le he nɛɛ mɔɔ. 5He soh gɛ Korowii aa kpɔ heyaa ɛ o bii dɛ ja heyaa la aa? Ba chwerɔ ŋɔ, "N bie, Korowii dɛ tɛr he deŋne aa, bɛ an wesale lii. Dɛ o dɛ togre naa, bɛ gel a hwah he bwara, 6dɛkalkɛŋɔ nɛn Korowii aa dɛ nyin la, o deŋnee wɛɛ tɛr, dɛɛ togre nɛn waa lɛo kɛ o bie." 7Hé lawɛ bambile wahala haa dɛ na ta, dɛ nyiŋa kɛŋɔ he Mɛɛɛ dɛɛ tɛr he deŋne. He deŋne tɛra la chaglɔ kɛŋɔ Korowii kpɔ heyaa ɛ o bii, dɛkalkɛŋɔ bie bɛlbwa toole o mɛɛ aa wola o deŋnee tɛr bwa. 8Dɛ o ta he deŋne tɛrɛ kɛŋɔ waa dɛ tɛr o bii bwa deŋne la aa, amɔ dɛ o bii gbagba laa heya, dɛ kataborerii heya. 9Ya mɛɛnanar baa lolɛ yaa la kwara, ba tɛr ya deŋne aa, ya dɛ no ba be. Aah dɛ ya Mɛɛ waa lɔ nyundua dɛ dɔ ya lileore la te sɛh, a ta chɛ kɛ ya no o be dɛ dɔ mkpa aa? 10Ya mɛɛnanar baa lolɛ yaa la, tɔpera anɛ bɛlee ba tɛr ya deŋne gɛ ba ge aa naa kɛ a ŋwɛnɛ taa la. Kɛ Korowii te aa dɛ tɛr ya deŋne la, ya gbagba kɛrɛdɛ waa wɛɛ ɛ gɛ ásɛ ya do goroŋ kɛŋɔ gɛ waa doa la. 11Ba dɛ tɛr nɛn deŋne aa, bug la ta la, o tea bini dɛ chɔg, o sie aa lɛ. Kɛ dɛ o hweli waa name o deŋne tɛra la ta naa, o waa dɛ togre, asɛ o bwara ɛɛ sɔɔhno. 12Anomanta he bɛ nɔɔra kpɔ sawɛ nyoa. Hé hamɛ mun. 13Hé gel he we-ɛɛla togre ásɛ he bala baa gwɛgra Korowii nɛɛ teŋa ta dɛ do kɛ nɛn waa dɛ dugri la bɛ he ŋwɛnɛre aa wola togrɛ la ta kpɔ dɛ ba lɔ na. A chɛ kɛ he togre he ŋwɛnɛre ásɛ ba kpɔ a ta dɛ dɔ bokpega. 14Hé swɛɛ siwi kɛŋɔ he ne nɛra bwa baah nɛɛ do werii, dɛ swɛɛ siwi kɛŋɔ hɛɛ do goroŋee, dɛkalkɛŋɔ dɛ nomɛlbwa ta goroŋ doe yaa, waa Korowii nae ba. 15Korowii dɔ chae waa dɛ nyin o cha yaa kohona. Anomanta hé nyiŋi kɛrɛdɛ asɛ a bɛ bɛlbwa ba paŋɛ. A waa laa aa, wechɔga ane ɛɛ ba jo he binii dɛ chɔg nɛndamanta kɛŋɔ koŋkpela yon jo kondikwaa ta dɛ chɔga la. 16He bini bɛlbwa bɛ jwamane ba bɔ, dɛ vɛh Korowii ɔma kɛŋɔ Esɔ aa koh kerabeŋkpoŋ kondikwaa dii waa dɛ yog o nomonome tɛ o nime la. 17He nao kɛŋɔ waa bera baa nyin kɛŋɔ o mɛɛ swee tɛo gɛ baa sweera dɛɛ tɛ binomoa la, o ta gɛ dɔe kpa. O siwi swɛɛrɔ wɛɛ nyin o dɔ gɛ a fe aa chɛa kɛ o dɔ, hale dɛɛ wi gba. Kɛ waa o gbagba aa ɛa la, o ta wone bera a do gɛ a faa doa kpa. 18Haa ba Korowii be nɔ, kon haa lege be laa he ba, kɛŋɔ Israel tena faa ba bwejen Sinai ta la. A gɛ bwejen nɔ fa dɛ lawɛ nii jigijigi ken. Ba faa ba o mun la, bɔr bwa biro kpirikpirikpiri ken, asɛ peu ɛɛ ta vuguvuguvugu ken. 19Dɛ bɛla bɛl dɛ si, asɛ nomɛl taa ɛɛ le. Nɛra la aa no taa la la, ba soŋɔ ŋɔ anɔ la baa noa la magre gɛ, 20dɛkalkɛŋɔ dɛ waa naate aa dɛ bol la kpegri tɛɛ ba. O bolɔ ŋɔ, "Dɛ kondɛɛre kwaraa lege bwejen la aa, a chɛ kɛ ba fogro bwea kpo." 21Waa aa chig bela la, dɛ a ɔma kohona to, asɛ Mosis ŋɔ, "Ɔmee lag mɛ, n bwara dɛ sa!" 22He te aa ba Korowii be nɔ, bwejen Saayɔn waa lɔ Korowii o gbo ɛ Korowii dɛ do le saŋ bɛlbwa la gbagba bwɛɛ Jerusalam waa lɔ nyundua la, o taa he ba. Bela nyundua toroma kagboŋlafa aa chema silɛɛ ne laanee he ba. 23O binomonome o kapɛrɛ aa ku ba nɔn asɛ ba sɔna do tɔn la aa lɔ o be la ta la gba cheme bela. Ba ne Korowii waa dɛ ba nɛra bwa waa bola dɛ pa bole la, ne lala ba wa aa togra dɛ su o siwi, asɛ o gel ba ɛ nɛndɛɛga ka tonɛ la bwa bee he ba. 24Yeesu bee he ba. On chegɛ nɛwɛnyini ne Korowii baah ta dɛ fɔwɛ fɔofale la la. Bela waa kpɔ o chal jwal laanee he ba. O chal soŋe wedɛɛga dɛɛ tɛ yaa. A ta do kɛŋɔ Abɛl chal aa ba taahna ne la. 25Anomanta hé nyiŋi kɛrɛdɛ asɛ dɛ bɛ deŋne taŋ Korowii waa waa dɛ bol la ta. A saŋ la tena faa vɛh nɛn ba ne waa lɔ harɛ bonɔ waa waa bola dɛ kpɔ ja ba la, dɛ ba ta wone lɛ ba te naa, ya nɛra yaa vɛh naate waa lɔ nyundua waa waa kpɔa dɛɛ ja yaa la, ɛrɛɛ yá ɛ dɛ won lɛ ya te nɔ? 26Waa bol waa gɛ saŋ la, harɛ jigro. Kɛ taraken te, o bagɛ nyoa ŋɔ, "Mɛɛ ba jigri harɛɛ kerabeŋkpoŋ ja. Harɛ gbo laa mɛɛ ba jigra. Mɛɛ jigri nyundua gee ja." 27A gɛ waa waa bola dɛ ŋɔ "kerabeŋkpoŋ ja" nɔ dɛ bagle kɛŋɔ o baa jigri nyundua ne harɛ naa, Korowii kontaala aa lɔ a ta dɛ won jigri la ɛɛ chɔgoo, ásɛ anɔ la aa wola won jigri la do le dɛɛ la. 28Anomanta a chɛ kɛ yaa jam Korowii saŋ bɛlbwa kɛŋɔ waa gela ya do o Kora waa wola yiigi ta nɔ. A chɛ kɛ yaa tomɔ gɛ aa too o tea, dɛɛ tɛo duure dɛɛ ɔmɔ, 29dɛkalkɛŋɔ ya Korowii nɔ do kɛ nii aa wona dɛɛ chɔg kwaa kohona.

will be added

X\