Hibru 11

1Bɔkwaa yarada ɔ? Yaradaa kɛŋɔ yaa jema kaih kɛŋɔ yaa wonoo dɔ kwaa yaa dɛ tamane a wa, dɛ jemɛ kɛŋɔ kwaa yaa wola an na siwi ne la bwa lole kpela. 2Yarada taa a che Korowii pena a saŋ la tena. 3Yarada taa a che ya no a mun kɛŋɔ nyoa wobol nee Korowii ta nyundua ne harɛ. Anomanta nyundua ne harɛ yaa dɛ na nɔ, kwaa baa wola an na nee ba taa. 4Yaradaa Abɛl dɔ, asɛ o kwaa waa kpɔa ɛ saraha tɛ Korowii won su siwi dɛ gwaa o dɔɔ Keen kwa, asɛ Korowii lɛa dɛ penao kɛŋɔ o ɛ nɛndɛɛge o wa aa su o siwi. O fe sewɔ, kɛ o yaradae waa yarada Korowii nomanta, waa waa ɛa la chɔɔ ba le fini ba taa bola. 5Yarada Enɔk yarada Korowii, asɛ Korowii kpɔɔ kaa o be nyundua, dɛ o ta sewɛ. Ba nyin o bɔr kahonɛ, dɛkalkɛŋɔ dɛ Korowii kpɔɔ kaa nyundua. Ba chwerɛ o waa kɛŋɔ Korowii aa wola on kpɔe kaa o be mɔɔ la, dɛ Korowii sie lɛ o nɛ. 6Nɛn ta yarada dɔe yaa, o waa aa won lɛ Korowii sie. Nomɛlbwa waa ba Korowii be la, a chɛ kɛ o dɔ yarada kɛŋɔ Korowii lole, dɛ yarada kɛŋɔ nomɛlbwa waa dɛ nyin o jemɛ Korowii la, Korowii dɛ chao. 7Yarada taa a che Korowii aa bol waa a taa lɔ sie dɛɛ ba bala Nowa be la, o no, dɛ o ta an nae mɔɔ. O noɔ dɛ kwaa gberjen o ne o haah ne bii jo o bini, ba ta serewe. Nowa te aa yaradaa, asɛ nɛwɛnyina baa kaa la aa wola yaradae la, a gelɔ nɛwɛnyini bwa di bolchɔge, asɛ dɛ gel o ɛ nɛra aa chegɛ ba yarada ta asɛ ba waa su Korowii siwi la bɛl. 8Yarada taa a che Korowii aa le Abraham ŋɔ ó kaa harɛ waa bagɔ nyoa la ta la, o le dɛ kaa. Waa dɛ kaa la, dɛ waa bela waa dɛ kaa jemɛ. 9Yarada nee o ka so harɛfale Korowii aa bagɔ nyoa la ta kɛŋɔ hɔɔh ken. Tɛnte deene binii o so kɛŋɔ o bie Aesek ne o ge bie Jekɔb Korowii aa bagɛ ba ge a gɛ nyoa nɔ tenten la. 10Dɛ Abraham dɔ bwɛɛ bɛl hwɛga. A gɛ bwɛɛ la, Korowii gbagbaa vɔrɔwo, o che kiŋkiŋ. Waa pagre bwa. 11Abraham yaradae waa dɛ yarada Korowii la taa a che o won lolɛ dɛ o hwɛɛhrɔ asɛ o haah Saara ge ɛ hambara. Dɛ o jemɔ kɛŋɔ nyoa Korowii aa bagɔ la, wɛɛ ɛo. 12Abraham aa hwɛɛhra waa wola kpege kpa la, o wono lolɛ, asɛ o naanar ge ya, dɛ warɛ kɛŋɔ weweela kɛɛ mpo nyoa hɛŋle ken. 13Korowii yaradae taa a gɛ nɛra nɔ bwa do dɛ ba serewe, dɛ ba ta waa Korowii aa bagɛ nyoa la nae siwi ne. Kɛ ba yarada nomanta, ba naa bojaŋ ba sie lɛ kɛŋɔ haa na hɔɔhra bojaŋ baa ba he sie lɛ la. Ba sɛoh kɛŋɔ ba ɛ hɔɔhra harɛ nɔ ta. 14Nɛra dɛ bol ken aa, dɛ ba dɛ nyin ba chagle kɛŋɔ ba dɛ nyin ba gbagba harɛ dɛ́ so. 15Dɛ harɛ baa le o ta ba la waa ba fee lii raa, ba fe ɛɛ wonoo berɛ kaa o ta. 16Kɛ gɛ laa a do. Harɛdɛɛge waa wera gwaa bela baa lea la waa baa lii. Harɛ waa lɔ nyundua waa baa lii. Anomanta a ta Korowii sihiih ɛɛ kɛŋɔ baa dɛ yerɔ ba Korowii, dɛkalkɛŋɔ o kwaa bwɛɛ bɛl cheg ba. 17Yaradaa Abraham yarada Korowii waa o won lawɛ o bie Aesek ŋɔ o dɛ kpɔɔ ɛ saraha dɛ tɛ Korowii a gɛ saŋ Korowii aa daahno na la. Abrahamee Korowii bagɛ nyoa ŋɔ, "Aesek nɛɛ aa ba chega asɛ n tɛɛ he naanar la maa bagɛ nyoa ŋɔ mɛɛ tɛɛ la." Kɛ Korowii aa ŋɔa ó kpɔ o bibeŋkpoŋ Aesek la ɛ saraha tɛo la, o ta vɛɛh. 19Dɛ Abraham jemɔ kɛŋɔ hale dɛ Aesek sewɔ kwaraa naa, Korowii dɔ kpegri kɛŋɔ ó won iru seo ta. Yaa wonoo ŋɔ sewaa Aesek sewɛ dɛ berɛ ba Abraham nɔn ta ja. 20Yaradaa Aesek yarada Korowii waa o won swee Jekɔb ne Esɔ andɛɛga ba kerekere soga bini. 21Jekɔb aa dɛ ba sewa la, o swee andɛɛga tɛ Josef bii banɛ la bwa. Dɛ o kpoŋe daŋgbala dɛ pi o ta dɛɛ jam Korowii. Jekɔb aa dɛ yarada Korowii waa o won ɛ anɔ bwa. 22Josef aa dɛ ba sewa la, o ŋɔ Israel tena be ŋɔ baa le Ijipt harɛ taa, dɛ bagle gɛ baa kaa o hoga ne ka huge bwa. Waa dɛ yarada Korowii la waa o won ɛ gɛ. 23Mosis nya ne o mɛɛ aa lolɔ la, ba kpɔɔ sɔh korobie atoro, dɛkalkɛŋɔ ba nao kɛŋɔ o wer bonɔɔ. Ba ta Ijipt kooro mmara waa doa la ɔme. Baa dɛ yarada Korowii waa ba won ɛ gɛ. 24Mosis aa kpega la, o ta sɛɛh ba yerɔ Ijipt kooro bihaah bie. Waa dɛ yarada Korowii waa o won ɛ gɛ. 25O ta sɛɛh ɛ Ijipt tena bodia waa baa lɔ a ta la, dɛkalkɛŋɔ a ɛ wechɔga, harɛ bonɔ gbo gee aa jagɛ. O sie lɛ Korowii nɛra la pui dɛ́ na wahala dɛ gwaa Ijipt tena bodia la. 26O nyiŋi sihiih waa koh Kristo waa dɛ́ di la kɛŋɔ a wer o be dɛ gwaa kondɔɔhkwaa a faa lɔ Ijipt harɛ la, dɛkalkɛŋɔ dɛ o dɛ nyiŋi tɔpere la Korowii aa ba bɔ nɛra bwa kem la ŋwɛnɛ. 27Waa dɛ yarada Korowii la waa waa wola Ijipt kooro bandia ɔmɛ dɛ le bela, a do kɛŋɔ waa dɛ na Korowii baa wola on na la ken, o ta habɔɔ berɛ. 28Mosis aa dɛ yarada Korowii waa o pa Galekaa kondikwaa dii waa la mun, dɛ gel Israel tena ɛ chal lɔ ba gbeni, ásɛ Korowii nyundua torome waa dɛ kpoo Ijipt tena bibalogla la na dɛ bɛ ba te bibalogla kpoo. 29Korowiirii Israel tena yarada waa Mposwɛm la aa teŋe anɛ, o nenabɔɔ sie hol kɛŋɔ harɛpɛɛ la, ba won jo dɛ le la. Ijipt tena aa ŋɔa ba ge le la, mpo la kaa ba ne. 30Korowiirii Israel tena yarada waa ba bɔ nsara bar Jeriko tɔpera anuanɛ, asɛ danjwɛɛ waa bar bwɛɛ la bwa cheme kuugi la. 31Korowiirii hanjwamane Rahab yarada waa o lɛ Israel tena sɔh o be kɛrɛdɛ, ba na o bwɛɛ waa dɛ ka taa, Israel tena aa wola on kpoe ja nɛra baa wola Korowii waa noɛ la nɛ. 32Too, ń bagle ane ja aa? Maa bɔree dɔ bagle Gedeɔn, ne Barak, ne Samsen, ne Jɛfta, ne Devid, ne Samoɛl, ne Korowii keamere la bwa wa. 33A gɛ nɛra nɔ bwa yarada Korowii kohona, dɛ che ba yarada ta yo koranar dɛ pɔ ba nɛ, dɛ gel nɛra ɛɛ ɛ waa aa togra Korowii ŋwɛnɛ ta, asɛ Korowii ɛ waa waa bagɛ nyoa la ane ba bere saŋ. Ba wono tɔ nyujentena nyoo, a ta wone lag ba. 34Ba wono che nijena baah ta dɛ sɔɔh a nyoa, a ta wone fuuh ba, dɛ won lɛ ba te nɛra baa kpoŋe tokobie dɛɛ nyin ba kpoora nɔn ta. Ba wono dɔ bokpega gɛ saŋ baa gwɛgra, dɛ won yo laa kɛrɛdɛ, dɛ won pɔ harɛre ane tena nɛɛ laa ta ba chwaage. 35Korowii yaradae nomanta ba wono chum haahna bane nɛra baa serewa. Nɛra bane ɛ ba bini bane ge hɔhɔrɔwa kɛŋɔ bá fe vɛh Korowii nɛɛ teŋa, kɛ ba ta ba nyu dɔe waa koɛh dɛ vɛh, gɛ aa ɛ ásɛ ba won ba ir seo ta dɛ dɔ bodɛɛge do. 36Ba ɛ bane ge bahmugliwaa dɛ lɔɔ ba chweremi ne, dɛ do kwaa bane ge nɔɔra, dɛ do ba dea. 37Ba fogre bane bwea dɛ kpoo ba, dɛ kpɔ sradaa teŋni bane bini anɛnɛ, dɛ kpoo bane ge tokobie ne. Dɛ booh tɔne ne pee tɔnee ba bane kpɔ berɛ laala dɛɛ do. Dɛ ba nyao kɛrɛdɛ, asɛ nɛra che ba nɛ, asɛ bane gee ɛɛ ba hɔhɔrɔwa aa wola were. 38Dɛ nɛra baa dɔ harɛ nɔ ta gbo liire ta chɛɛ kɛ ba ne a gɛ Korowii nɛra baa ɛ nɛnjena nɔ pɛ so. Ba ta soŋnibɔr dɔe, dɛ do pua waa ɛ hɛŋle gbo harɛ ne bwea dor dɛɛ gaage, dɛɛ so bwe bɔɔne ne bɔpɛɛne bini. 39Nɛra dɛ pena a gɛ nɛra nɔ bwa yaradae baa yarada Korowii wa, kɛ ba bɛlbwa ta kon Korowii aa bagɛ Israel tena nyoa la dɔe. 40Korowii lii waa aa wera cheg ya fini nɔ tena, dɛ ŋɔ a gɛ nɛra la gbo aa won do kaih ka tonɛ, nemenɛ kɛŋɔ ya ne ba bwa aa pɛa dɛ do kaih.

will be added

X\