Hibru 10

1Tɔe Mosis Mmara la tɔ wedɛɛga a faa lɔ sie dɛɛ ba bala la sie dɛ che tɛa. A fa ta wedɛɛga la tenten ɛɛ kɛŋɔ nɛn lileo aa wola o gbagba ɛɛ la. Anomanta saraha la Mmara la aa gela baa ɛ bena bɛlbwa la aa won gel nɛra baa dɛ ba a ne la ɛ nɛndɛɛga ka tonɛ. 2Dɛ saraha la fe wono gel ba berɛ nɛndɛɛga dɛ ka tonaa, ba fe ta a ɛɛ gelaa? Dɛ a fe wono dɛɛ fee ba wechɔga ba nɛ aa, ba liire fe aa ban ha a waa we ba nɛɛ kpa. 3Saraha laanee dɛɛ lii ba bena bɛlbwa kɛŋɔ wechɔg-ɛɛraa ban, 4dɛkalkɛŋɔ nae ne boohna chale aa won fee wechɔga nɛra nɛɛ bwa. 5A waa Yeesu aa dɛ ba harɛ ta bala la, o ŋɔ Korowii be ŋɔ, "Konaatena ne koŋkwaare baa kpɔa ɛ saraha dɛɛ tɛɛ la, he sie aa a ta lɛ. Kɛ he ɛ bwadabii bɛl tɛ mɛ. 6He siwi aa konaatena baa dɛ fuah ambire dɛɛ tɛɛ, ne saraha baa ɛa dɛ kpɔ dɛɛ soŋe nɛra wechɔga la su. 7Belaa n ŋɔ, 'Korowii, menee la. N balɔ dɛ́ ba ɛ he tetoowaa gɛ baa chwerɛ n waa Mmara tɔn la bini la.' " 8O baglɔ kɛŋɔ konaatena ne koŋkwaare baa kpɔa ɛ saraha dɛɛ tɛ Korowii la ta o sie lɛɛ. O siwi ta konaatena baa fuah dɛ ɛ saraha dɛɛ tɛo ne saraha baa ɛa dɛ kpɔ dɛɛ soŋe wechɔga la sui, kɛ dɛ Mosis Mmara ge fe bagle a bwa. 9Belaa o ŋɔ, "Korowii, menee la, n balɔ dɛ́ ba ɛ he tetoowa." A baglɔ kɛŋɔ Korowii teŋe sarahabena la bwa ta dɛ kpɔ Yeesu Kristo saraha la chig a naa ta. 10Yeesu Kristo aa ɛ Korowii tetoowaa dɛ kpɔ o bwadabii ɛ saraha kerabeŋkpoŋ a den tonɛ la nomanta, o laa ya bwa wechɔga kpɔ ya nɛ, dɛ gel ya ɛ Korowii nɛra. 11Juda tena Sɔfore te la, tɔpere bwaa ba che ba sɔfore toma ta dɛ teŋɛ dɛɛ ɛ saraha siwibeŋkpoŋ. Kɛ a gɛ saraha nɔ aa won laa nɛn wechɔga kpɔ o nɛɛ bwa. 12Kerabeŋkpoŋ gboo Yeesu Kristo te ɛ nɛwɛnyini wechɔga saraha, a den magre, aa wola hiaih kɛŋɔ o ɛ bɛl kpa, dɛ ka so nomombɔr Korowii dig ta. 13Belaa o do dɛɛ kpa ka tel kɛŋɔ Korowii aa ba o dɔma ne harɛ asɛ o tigri ba nɛ. 14Saraha beŋkpoŋ waa ɛa dɛ fee wechɔga nɛra nɛɛ la gboo gela ba do kaih saŋ bɛlbwa dɛɛ la. 15Korowii Domadɛɛge gba di danseɛ bagle yaa. O tɔ sie ŋɔ, 16"N Naa Korowii bolɔ ŋɔ, 'Fɔo n ne baa fɔwɛ tɔpera aa lɔ sie la ta laanee nɔ: Mɛɛ kpɔ me mmaraa do ba bambile bini, dɛ chwero do ba nyuune bini.' " 17O berɔ ŋɔ, "Maa ba wechɔga waa lii kpa bwa." 18Anomanta, dɛ Korowii dɔɔ kpɔ ya wechɔga kɛ yaa aa, a ta berɛ hiah kɛŋɔ ba ɛ saraha dɛ kpɔ soŋe ya wechɔga kpa. 19Yabalawa, Yeesu seo la nomanta yaa wonoo jo Korowii Bɔr Waa Do Goroŋ Tenten la, yaa wola ɔmɛ. 20Yeesu pili ŋwɛnɛfale mkpa aa lɔ o ta tɛ yaa, asɛ ya won jo Korowii Bogoroŋ la ta. O bwadabii ɛo kɛŋɔ pateesahjen o faa tɔ Korowii Bogoroŋ Tenten la ŋwɛnɛ la. Waa sewa la, ŋwɛnɛ pilo tɛ yaa. 21Ya dɔ Sɔfojen wɛɛ nyiŋi Korowii bii. 22Anomanta la, Korowii aa sɔ ya wechɔga ta waa wola gelɛ ya liire ɛɛ ɛ yaa kɛŋɔ ya ɛ wechɔga kpa, dɛ kpɔ o nedɛɛga sɔ ya bwadabii nɔ, hé gel ya kpɔ tepoŋ ne yarada ba o be, ya bɛ tɔŋle tama bɛlbwa, 23dɛ lawɛ hwɛga yaa dɔa la bini kpoŋe kiŋkiŋ, dɛ bɛ dɛɛ ɔmɛ tama bɛlbwa, dɛkalkɛŋɔ naate waa bagɛ yaa nyoa la waa dɔ kasinteŋ. 24Hé gel ya lii gɛ yaa ɛ dɛ́ won dɛɛ do dɔŋa gbemba dɔŋa nyina ne wedɛɛga ɛɛ ta, 25asɛ dɛ bɛ chema yaa dɛ cheme saŋ bɛlbwa la gel, kɛŋɔ bane aa gela la. Waa bwa jaga tɔpere la dɛ tel, anomanta hɛ́ɛ do dɔŋa gbemba. 26Korowii aa pili ya sie ya jemɛ o kasinteŋ nɔ nɔ, dɛ ya ta saahnɔ do wechɔga ta dɛɛ ɛ aa, saraha bɛlbwa toole bobɛlbwa dɛ́ fee ya wechɔga ya nɛɛ kpa. 27Ɔmee taa yaa ba soga dɛɛ kpa Korowii tɔpere waa dɛ ba nɛra waa bola dɛ pa bole, dɛ do banɔ la baa chegɛ o nɛɛ wechɔga nii aa dɛ lawɛ kohona ta la. 28Nɛn to Mosis Mmara, asɛ nɛra banɛ ne batoro di danseɛ tiao o waa waa ɛa la ta naa, baa o nɛɛ sune, kpoe baa kpoo. 29Aah dɛ ɛrɛɛ a chɛ kɛ ba ɛ nɛn waa nyiŋi Korowii Bie la dɛɛ vaɔh? Dɛ nɛn nyiŋi fɔo la Korowii aa chegɛ o Bie seo ta dɛ fɔwɛ la dɛ fee o wechɔga o nɛɛ la pɛɛ aa, kembɔr besoo chɛ kɛ ba tɛo wɔ? A gɛ nɛn la ɛ Korowii Domadɛɛge la waa chao la nɛnhɛla. Korowii ŋɔ ó bɔɔ kem aa, o wenaale aa kanee do aa? 30Naate waa ŋɔa ŋɔ, "Menee dɔ wechɔga kem bɔe, menee dɛ bɔ nɛra ba wechɔga kem" la, ya jemɛ o nɛnsoo. Ba chwerɛ bobɛl ge ŋɔ, "N Naa Korowii ɛɛ bol o nɛra waa dɛ pa bole." 31Wobɛlbwa toole dɛ do ɔma kɛŋɔ haa ɛ wechɔg-ɛɛ dɛ jo Korowii waa lole saŋ bɛlbwa la nɔn ta. 32Hé lii gɛ he faa doa gɛ saŋ Korowii waa la aa chaah he sie la. He na wahala ga, kɛ he ta habɔɔ leɛ. 33Ba chɛgre heyaa dɛ ɛ heyaa hɔhɔrɔwa nɛra baah ane ta. Dɛ he dɛ cha nɛra baa dɛ ɛɛ ba hɔhɔrɔwa ane ta. 34He na nɛra baa do ba dea la sum, dɛ cha ba ba wahala nae ta. Ba lɛ he kwaa haa dɔa bwa, kɛ he sie ta kie. He sie lɛo, dɛkalkɛŋɔ he jemɔ kɛ he dɔ komɛl waa wola jaga dɔe dɛ gwaa anɔ la haa paŋa la. 35Anomanta, he bɛ he yaradae haa dɛ yarada Korowii Bie la gel. A dɔ kembɔa kohona. 36A hiaoh kɛŋɔ he lawɛ bambile dɛ́ won ɛ gɛ Korowii aa dɛ nyin, asɛ dɛ won dɔ kwaa waa bagɛ heyaa nyoa la. 37Anee Korowii Tɔn bagle la: "A ka tamaa ken asɛ naate waa dɛ ba bala la ba. Waa bigra ba. 38Nɛn o waa aa togra dɛ su n siwi la te la, wɛɛ yarada mɛɛ dɛ dɔ mkpa. Kɛ dɛ o le habɔɔ te naa, n sie aa o nɛɛ lɛɛ ba." 39Ya ta nɛra baa dɛ le habɔɔ dɛɛ nyogre la ɛɛ. Nɛra baa dɛ yarada dɛɛ dɔ mkpa laanee yan.

will be added

X\