Hibru 1

1A saŋ la dɛ Korowii chegɛ o keamere nɛɛ dɛɛ bol waa ya naanar be. Kera aŋwɛnɛ bwaa o bol waa ba be. Dɛ ŋwɛnɛre waa chegɛ a ta dɛɛ bol waa ba be fuuh. 2Fini tɔpera nɔ aa ka mun nɔ te, o Bie nɛɛ o che dɛɛ bol waa ya be. Korowii Bie nɔɔ o kpɔ cheg kɛŋɔ o toole naa, onee lole dɛ dɔ komɛlbwa. O nɛɛ Korowii che dɛ ta komɛlbwa. 3He na o jirima waa dɔa, dɛ he na jirima Korowii aa dɔa. Gɛ Korowii aa doa o ge den do kati. O wobol dɔ kpegri. A kpegrii lawɛ komɛlbwa kpoŋe. Korowii Bie la aa laa ya wechɔga kpɔ ya nɛɛ tonɛ la, o kaa so nomombɔr nyundua Korowiijen dig ta, 4dɛ gwaa nyundua toroma bwa, gɛ sɔn Korowii aa tɛo la aa gwaa ba sɔn la. 5Korowii ta o nyundua toroma la bɛlbwa be ŋɔe ŋɔ, "N Biee hen. Fini n berɛ he Mɛɛ" bwa. O ta ba bɛlbwa waa bolɛ ŋɔ, "Mɛɛ ɛ o Mɛɛ, asɛ o ɛ n Bie" bwa. 6Korowii aa dɛ ba o Bie waa lɔ o be logla la harɛ ta toma la, o bolɔ ŋɔ, "A chɛ kɛ nyundua toroma bwa ɛɛ tomɔ," 7dɛ bol nyundua toroma la ge waa ŋɔ, "O gelɔ o nyundua toroma do kɛŋɔ peu ne ninlao." 8O bol o Bie la waa ja, dɛ ŋɔ, "Korowii, he kora ɛɛ cheo dɛɛ la saŋ bɛlbwa. Kasinteŋii hɛɛ ba kpoŋa dɛɛ di kora he nɛra nɛ. 9He dɛ nyin waa aa togra dɛ ki waa aa wola togrɛ. A waa Korowii haa dɛ tomɔ la lee ŋɔ hé ɛ kooro, dɛ tɛɛ bosɔɔhna ne sɔnjen dɛ gwaa he bala bwa la." 10Korowii berɔ ŋɔ, "Nomoa, wobɛlbwa mumpar la, hen ta harɛ. Kwaa aa lɔ nyundua ge nɔ, he nɔn tomaa a bwa. 11A bwa ɛɛ chɔgoo, aa wola lee do kpa, kɛ he te ɛɛ do lee dɛɛ la. A bwa ɛɛ ba ɛ kombenaa kɛŋɔ yal yon hɛh la. 12Hɛɛ kpɔa bil kɛŋɔ yal hɛoh waa, ba yon kpɛrɛwo bil la. Aa begroo, aa wola won do wer kɛ konfala saŋ bɛlbwa wee kpa. Kɛ he te ɛɛ do gɛ haa doa saŋ bɛlbwa, asɛ he bene ge aa jagaa dɔ bwa." 13Korowii nyundua torome besoo bee o ŋɔ, "So nomombɔr n dig ta asɛ n ba he dɔma ne harɛ he tigri ba nɛɛ," bwa nɔ? 14Korowii bonɔɔna laa o nyundua toroma la te naa? Nɛra Korowii aa ba lɛ la waa o yon dɛ tomɛ o nyundua toroma la ásɛ baa cha o nɛra la.

will be added

X\