Galaasia 6

1Yabala, dɛ he lawɛ he bini bɛl wechɔga bɛlbwa ta naa, he banɔ la haa dɔ Korowii Domadɛɛge la kɛrɛdɛ la, hé togro. Kɛ he bɛ o nɛɛ nyɛg te, hé togro sipwɛra ne. He gbagba ge la, a chɛ kɛ hɛɛ nyiŋi kɛrɛdɛ, asɛ Bɔnsam bɛ heyaa ba negre do wechɔga ta. 2Waa pu he dɔŋ dɛ ɛ bone tɛo waa, hé chao. He dɛ ɛ gɛ naa, dɛ Yeesu Kristo mmara la taa hɛɛ teŋɛ la. 3Dɛ nɛn ta nɛnjen ɛɛ dɛɛ lii o te nɛnjen aa, dɛ o dɛ negre o te. 4Hé bɛlbwa nyiŋi o we-ɛɛla na. Dɛ a wer aa, ó gel o sie lɛ. Kɛ he bɛ he te kpɔ dɛɛ magɛ dɔŋa dɛɛ nyin sɔn, 5dɛkalkɛŋɔ nomɛlbwa ne o bonee wɛɛ ba chega. 6Nomɛlbwa baa dɛ baglo Yeesu Kristo waa nɔ la, kondɛɛge bɛlbwa haa dɔ la, tɛ naate waa dɛ bagle la. 7He bɛ he te dɛɛ negre. Haa jemɛ kɛ baa Korowii negre kɛɛ? Kwaa nɛn aa dua la, anee wɛɛ komɛ. 8Dɛ nɛn teŋɛ o nɛwɛnyini mar wechɔga aa suu pɛla kwaa nɛɛ dɛ du wechɔga aa, sewee wɛɛ ba koma. Dɛ nɛn teŋɛ Korowii Domadɛɛge la tetoowaa ta dɛ du wedɛɛga aa, wɛɛ komɛ mkpa waa wola jaga dɔe bwa laanee Domadɛɛge la be. 9He bɛ gel ya bwara ɛɛ hwah yaa wedɛɛga ɛɛ ta. Dɛ ya swɛɛ siwi a ta naa, Korowii tɔpere la telaa, yaa komaa. 10Anomanta saŋ bɛlbwa, dɛ ŋwɛnɛ lole naa, yáa cha nomɛlbwa, a laa kɛŋɔ nɛra ya ne baa dɛ di lola Yeesu Kristo nɛɛ teŋa nɔ ta nɔ. 11N gbagbaa chwerɛ bonɔ la. Hé na gɛ maa chwera a do bare gɛ! 12Nɛra baa dɛ do heyaa ŋɔ hé teŋni he pena la, nɛra sie ta waa baa ɛ gɛ. Ba dɛ ɛ gɛ ásɛ Juda tena na dɛ bɛ ba yaradae baa yarada Yeesu dagagre ta sewa waa koh dɛ hah ba. 13Nɛra baa sɛah ba teŋni ba pena la, ba gba aa Mosis Mmara la bwa ta teŋɛ. Ba dɛ nyin ba teŋni he pena ásɛ dɛ won kpɔ a waa dɛɛ ta nyoa. 14N te aa n te maŋkura wobɛlbwa ta. Yeesu dagagre ta sewa la waa taa n te ɛɛ jaagi. O seo la gelɔ harɛ ta bonɔ waa berɛ wepɛɛ n be, a ta kpegri dɔe n nɛɛ kpa. 15Penteŋa ne o bɛ teŋa te ta hiaih kwaraa. Waa aa hiah laanee kɛ Korowii aa charɛ ya liire ya ɛ nɛnfala. 16Nɛra baa dɛ teŋɛ gɛ waa maa dɛ bagle nɔ ta ba soga bini la, Kórowii na ba sum dɛ tɛɛ ba bambisɔɔhna. Banee o nɛra Israel tena la. 17Nomɛlbwa bɛ men yɔna do kpa. Yeesu Kristo toma maa dɛ ɛ la, a ŋwɛra pɛla lɔ n nɛ. 18Yabala, yá Dɔɔ Yeesu Kristo cha heya. Aamen.

will be added

X\