Galaasia 5

1Ya di ya nyu. Yeesu Kristo foo yaa, anomanta ya ta nɛndɔɔla ɛɛ kpa. Waa foo heyaa nɔ, hé che kiŋkiŋ. He bɛ gel ba kpɔ waa dɛɛ ha heyaa kpa. 2Hé gel n ŋɔ he be, dɛ he teŋɛ Mosis Mmara nɔ ta dɛ gel ba teŋe he pena aa, dɛ waa Yeesu Kristo aa ɛa tɛ heyaa la ta tɔnɔ dɔe tɛ heyaa kwaraa. Men Pɔɔl, men ŋɔa. 3Hé gel n kwaa ŋɔ he be he no kɛrɛdɛ, nomɛlbwa waa gela ba teŋe o pen ásɛ o waa su Korowii siwi la, a chɛ kɛ o teŋɛ Mosis Mmara la bwa ta. 4He banɔ la haa dɛ nyin he che Mosis Mmara ta teŋa ta ásɛ dɛ ɛ nɛndɛɛga he waa su Korowii siwi la, he pere he te le Yeesu Kristo be. He ta nɛra Korowii aa sune ba nɛɛ la nɛɛ jae. 5Ya te ken nɔ, ya chegɛ yarada yaa dɛ yarada Yeesu Kristo la ta dɛɛ hwɛgɛ kɛŋɔ Korowii Domadɛɛge ɛɛ geloo ya ɛ nɛndɛɛga ya waa su Korowii siwi. 6Yeesu Kristo ŋwɛnɛ ta teŋa nɔ ta te, ba teŋe nɛn pen oo, ba ta o pen teŋoo, a laa ɛ wehiah. Waa aa hiah laanee kɛŋɔ nɛn aa dɛ yarada Yeesu Kristo asɛ gɛ yarada nɔ won gel wɛɛ nyin o dɔŋa. 7He fa dɛ teŋɛ ŋwɛnɛdɛɛge la ta kɛrɛdɛ. Bɔkwaa bala haa wola berɛ dɛɛ teŋɛ kasinteŋ ŋwɛnɛ la ta kpaɔ? Bɔkwaa tɔ heyaa ŋwɛnɛ ɔ? 8Korowii waa le heyaa he ba o be la, o be laa gɛ liire nɔ le. 9Ba ŋɔ, "Iisi tama ken won paanoo damanta hoeh," anomanta hɛ́ɛ nyiŋi liire aa do ken nɔ dɔŋa kɛrɛdɛ. 10N te ta dɛ yarada heya. Ya Dɔɔ la ya bwa aa dɛ tomɛ la nomanta n dɛ yarada heyaa kɛŋɔ haa liifalee dɔ. Naate waa dɛ wili heyaa nɔ, gɛ bwa waa doa, Korowii ɛɛ bɔɔ kemee. 11Yabalawa, dɛ n fe ta dɛ bol ŋɔ penteŋa hiaoh waa, nɛra fe chegɛ n nɛɛ ken aa? Dɛ n fe kpɔ penteŋa waa dɛ ja Yeesu Kristo dagagre ta sewa la waa ta dɛɛ bol aa, nɛra fe dɛ vɛh n wobol nɔ naa? 12A ka n te wa aa, nɛra baa dɛ wili heyaa ŋɔ hé teŋe he pena la, ba dɛ nyin aa, bá fɔgɛ ba lure ge. 13Yabalawa, Korowiirii le heyaa tɛ o te, dɛ lɛ heyaa asɛ Mmara la bɛ heyaa vɔrɔwe kpa. Kɛ haa dɔ he te nɔ, he bɛ gel a do he som kohona, asɛ hɛɛ ɛ wechɔga la bwa he bwadabii aa dɛ nyin kɛŋɔ hɛɛ ɛ. Hé kpɔ dɔŋa nyina dɛɛ tomɛ dɔŋa. 14Maa dɛ ŋɔ nɔ, webeŋkpoŋ bɛl lole dɛ he dɛ ɛ aa, dɛ he tonɛ Mosis Mmara la bwa. Onee kɛŋɔ, "Nyin he dɔŋ kɛ he gbagba." 15Dɛ haa dɔŋa nyin, dɛɛ yo aa, amɔ te hɛ́ɛ nyiŋi kɛrɛdɛ. A waa laa aa, he dɛ ba dɔŋa baah chɔga kwaraa. 16Waa maa dɛ nyin n bol laanee kɛŋɔ hé kpɔ he te tɛ Korowii Domadɛɛge la, ásɛ wɛɛ bagle heyaa ŋwɛnɛ. Dɛ o dɛ bagle heyaa ŋwɛnɛ aa, haa wechɔga he nɛwɛnyini mar aa dɛ nyin la ɛɛ ba, 17dɛkalkɛŋɔ waa he nɛwɛnyini mar wechɔga aa suu la aa dɛ nyin la, Korowii Domadɛɛge la aa an nyin. Nɛwɛnyini mar wenyina ne Korowii Domadɛɛge wenyina aa jo. Anomanta waa haa dɛ nyin ɛɛ la, haa wona ba dɛ ɛ. 18Dɛ he kpɔ he te tɛ Korowii Domadɛɛge la wɛɛ bagle heyaa ŋwɛnɛ te naa, Mosis Mmara la aa won di kpegri he nɛ. 19Nomɛlbwa jemɛ nɛwɛnyini mar wechɔga aa suu nɔ tetoowa. Anee kɛŋɔ jwamane ne wedoŋa ne pɛlchɔga we-ɛɛla te bwa soosiwi, 20ne voga toma ne sɔm wa. A bini anee kɛŋɔ nɛra ne ba dɔŋa aa dɛ di dɔm dɛɛ yo, ne sɔnnyin kohona, ne bandisale ne sibegra, ne nɛra ne ba bala baah pegra, ne nyopɛo bɛ dɔe, 21ne bɔweela, ne dɛɛra, dɛ dɛɛ dɛɛ do gbɔga kohona, ne wesale aa do ken nɔ. N fa ŋɔ he be wubwa ŋɔ hé nyiŋi kɛrɛdɛ, dɛ ŋɔ nɛra baa dɛ ɛ gɛ waa nɔ la, baa Korowii Kora la ta jae ba. N berɔ kwaa dɛɛ lii heyaa ja. 22Korowii Domadɛɛge la te, kwaa waa dɛ tɛ laanee dɔŋa nyina, ne silɛɛ, ne nyopɛo, ne bambile dɔe, ne tesom, ne wedɛɛga ɛɛ, ne kasinteŋ dɔe, 23ne pwɛre doe, dɛ gel nɛn won o te lawa. Harɛ bɛlbwa toole dɛ ki a gɛ waa nɔ. 24Nɛra baa ɛ Yeesu Kristo nɛra la, ba kpaa ba nɛwɛnyini mar wechɔga aa suu nɔ wenyina ne ba liichɔga bwa pɛl Yeesu dagagre la ta dɛ kpoa. 25Taraken nɔ, ya jemɔ kɛŋɔ Korowii Domadɛɛge laanee tɛ yaa mkpa, anomanta a chɛ kɛ ya kpɔ ya te tɛo dɛ gel wɛɛ bagle yaa ŋwɛnɛ ya soga bini. 26A ta chɛ kɛ yaa ɛ jenu. A ta chɛ kɛ yaa ir dɔŋa bwaawee. A ta chɛ kɛ ya dɔ bɔweela dɔŋa nɛ.

will be added

X\