Galaasia 3

1Ee, Galaasia tena, he gɛnoo! Ya ta heyaa baglɛ gɛ aa ɛa Yeesu Kristo sewɛ dagagre ta bwa naa? Aah bɔkwaa bera negre heyaa jaɔ? 2Hé gel n bɔɔ heyaa webeŋkpoŋ. Mosis Mmara ta teŋa taa a che he dɔ Korowii Domadɛɛge la aa, kɛɛ haa no Yeesu Kristo waa la dɛ yaradaa taa a che nɔ? 3He gɛnɔ ga! Korowii Domadɛɛgee gela he won pa mun Yeesu nɛɛ teŋa ta. Ɛrɛɛ he berɛ dɛɛ nyin kɛŋɔ he kpɔ he gbagba kpegri ɛ ka tonɛ nɔɔ? 4Amɔ waa he sie aa naa ne anɔ la haa noa la bwa ɛ pɛɛ aa? Dɛ a ɛ pɛɛ te naa, dɛ aa were kwaraa! 5Korowii Domadɛɛge nɔ waa tɛ heya, dɛɛ ɛ nyokpowaa he bini nɔ, dɛ Mosis Mmara ta teŋa waa o ɛ a bwa kɛɛ haa dɛ no o waa dɛ yaradaa la waa yɔ? 6Hé nyiŋi Abraham na. Korowii Tɔn baglɔ ŋɔ, "O yarada Korowii, asɛ Korowii che o yarada la ta dɛ lɛo kɛ nɛndɛɛge o waa su o siwi." 7A chɛ kɛ he jemɛ kɛŋɔ nɛra baa dɛ yarada Korowii la, banee Abraham naanar. 8Korowii Tɔn baglɔ kɛŋɔ yarada taa aa ba chega asɛ Korowii lɛ nɛra baa wola Juda tena ɛɛ la kɛ nɛndɛɛga ba waa su o siwi. Korowii bol Amanesoma la waa Abraham be dɛ ŋɔ, "He nɛɛ aa ba chega Korowii swee nɛwɛnyini bwa andɛɛga." 9Yaradaa Abraham yarada Korowii asɛ o swee andɛɛga tɛo. Anomanta nomɛlbwa waa yarada Korowii la, Korowii ɛɛ sweero andɛɛgaa. 10Nɛra baa kpɔ sie dawɛ Mosis Mmara gbo ta kɛŋɔ a taa ba che Kórowii lɛɛ ba la, bá bwɛɛlɛ, dɛkalkɛŋɔ a lɔ Korowii Tɔn bini kɛŋɔ, "Nomɛlbwa waa to Mosis Mmara la bɛlbwa saŋ bɛlbwa wee la, ó bwɛɛlɛ." 11Taraken nɔ, ya nao kɛŋɔ nomɛlbwa aa won che Mosis Mmara la ta dɛ ɛ nɛndɛɛge o waa su Korowii siwi, dɛkalkɛŋɔ nomɛlbwa aa won teŋɛ a bwa ta. Korowii Tɔn baglɔ ŋɔ, "Naate o waa aa togra dɛ su Korowii siwi la, wɛɛ yaradao dɛ dɔ o nyu." 12Nɛn waa dɛ teŋɛ Mosis Mmara ta la, yarada laa dɛɛ ba o lɛɛ. Korowii Tɔn baglɔ ŋɔ, "Nomɛlbwa waa wona dɛɛ teŋɛ Mosis Mmara la bwa ta la, on dɛɛ ba o nyu dɔe." 13Yeesu Kristo lɛ nyotaahna aa lɔ Mosis Mmara la ta bɛ won teŋa la dawɛ o nɛɛ dɛ lɛ yaa le a ta. Korowii Tɔn baglɔ ŋɔ, "Nomɛlbwa baa sagɔ daa ta la, Korowii nyotaahna lɔ o nɛ." 14Korowii fa bagɛ Abraham nyoa ŋɔ wɛɛ ɛo wedɛɛgee. Gɛ aa ɛ asɛ nɛra baa wola Juda tena ɛɛ che Yeesu Kristo nɛɛ dɛ dɔ a gɛ wedɛɛge nɔ la waa o lɛ nyotaahna la dawɛ o nɛɛ dɛ lɛ yaa le a ta la, ásɛ a che yarada ta Korowii tɛ yaa o Domadɛɛge la waa bagɛ nyoa ŋɔ wɛɛ tɛ yaa la. 15Yabalawa, hé gel n kpɔ harɛ bonɔ waane magɛ waa nɔ maa dɛ bol nɔ. Dɛ nɛra banɛ fɔwɛ fɔo o do kpegri aa, nɛmpɛɛ aa won puru ba habɔɔ, nomɛlbwa ge aa berɛ won berɔ ba habɔɔ. 16Korowii Tɔn la baglɔ kɛŋɔ Korowii bagɛ Abraham ne o naa nyoa. Korowii Tɔn la ta ŋɔe ŋɔ Korowii bagɛ Abraham ne o naanar nyoa. Dɛ́ Abraham ne o naa. O baglɔ kɛŋɔ Abraham naa beŋkpoŋ, onee kɛ Kristo. 17Waa maa dɛ nyin n bagle laanee kɛŋɔ Korowii ne Abraham fɔwɛ fɔo bɛl, asɛ Korowii bagɛ Abraham nyoa kɛŋɔ wɛɛ di fɔo la taa. Mosis Mmara nɔ ge la, fɔo nɔ habɔɔ bene lafraanaarɛ dɛ fifraatoroo a ge ba. Dɛ ɛrɛɛ Mosis Mmara nɔ won ɛ dɛɛ chɔg gɛ fɔo nɔ dɛ teŋe Korowii nyobaga la ta nɔ? 18Dɛ Mosis Mmara la ta teŋa taa aa ba chega Korowii ɛ yaa o wedɛɛge la te naa, ate dɛ o nyoa waa bagɛ Abraham la ɛ pɛɛ. Kɛ gɛ laa a do. Nyoa Korowii aa bagɛ Abraham la waa o sune o nɛɛ dɛ chao, dɛ ŋɔ wɛɛ ɛo wedɛɛgee la. 19Aah dɛ bɔkwa waa Korowii tɛ yaa Mosis Mmara laɔ? Wechɔga jema waa o kpɔa ja yaa. Korowii ɛo kɛŋɔ Ḿmara la do le dɛ ka tel kɛŋɔ Abraham naa la aa bala. Abraham naa nɔɔ Korowii bagɛ nyoa la la. Nyundua toromaa Korowii gel ba ba Mosis Mmara la ne ba tɛ yaa. Nɛn nɛɛ nyundua toroma la ba chig dɛ kpɔ Mmara la tɛo, asɛ o ge kpɔ tɛ ya naanar. 20Korowii aa bagɛ nyoa la ge la, o gbo waaa, nɛmbeŋkpoŋ waa ta keame hiaih. 21Amɔ dɛ Mosis Mmara nɔ ne nyoo Korowii aa bagɛ yaa la aa jo kɛɛ? A dɛ jo. Dɛ nɛwɛnyini fe dɔ mmara bɛl waa dɛ ba wona togre nɛra ásɛ ba dɔ ba nyu aa, ate nomɛlbwa waa dɛ teŋɛ gɛ mmara la ta la, o waa fe ɛɛ su Korowii siwii kɛŋɔ o ɛ nɛndɛɛge. 22Korowii Tɔn la baglɔ kɛŋɔ wechɔga vɔrɔwe nɛwɛnyini bwa, ásɛ Korowii nyobaga waa bagɛ yaa la ɛ nɛra baa yarada Yeesu Kristo la gbo kwa. Anomanta nɛra baa dɛ yarada Yeesu Kristo laanee Korowii ɛɛ ba o nyobaga kwaa la kpɔe tɛ. 23Yeesu Kristo yaradae waa nɔ aa wola balɛ mɔɔ la, dɛ Mosis Mmara la vɔrɔwe yaa kɛŋɔ nɛra baa do ba dea ken. Yeesu Kristo yaradae waa nɔɔ bala mɔɔ ya ta dɔ ya te. 24Dɛ Mosis Mmara nɔɔ dɛɛ nyiŋi yaa mɔɔ Yeesu Kristo ba. Waa bala la, o yaradae taa aa ba chega asɛ ya waa su Korowii siwi, asɛ o lɛ yaa kɛŋɔ nɛndɛɛga. 25Yeesu Kristo yarada waa nɔ aa tel ya be nɔ, Mosis Mmara la laa dɔ yaa kpa. 26Haa yarada Yeesu Kristo la nomanta, he bwa ɛ Korowii bii. 27He banɔ la ba faa sɔ heyaa Korowii nee ásɛ he ne Yeesu Kristo ɛ beŋkpoŋ la, Yeesu Kristo daa he kpɔ gɛ la. 28Anomanta pegra bɛlbwa toole he baah kpa. Juda tena oo, nɛra baa wola Juda tena ɛɛ yoo, yoma oo, deheɛre oo, haahna oo, baala oo, he bwa ɛ beŋkpoŋ Yeesu Kristo be pera. 29Dɛ he ɛ Yeesu Kristo nɛra te naa, ate Abraham naanaree heya. Kon Korowii aa bagɛ Abraham nyoa la, he gee dɔɔ.

will be added

X\