Galaasia 2

1A habɔɔ bene fi dɛ anaarɛ la, n berɔ la Jerusalam ja. N kpɔ Taetos ja n nɛ, asɛ ya ne Banabas la. 2Korowiirii gela n jemɛ dɛ la ba be. N tɔ sie la asɔre tena nomonome be n ne ba gbo so, n bagle Yeesu Amanesoma maa dɛ bol nɛra baa wola Juda tena ɛɛ be la bwa ásɛ ba jemɛ n wa, ásɛ n toma maa ɛa ne anɔ la n taa dɛ ba ɛɛ la bɛ pɛɛ ɛ. 3Dɛ Grik tee Taetos anomanta o ta pen teŋe. Kɛ nomɛlbwa ta on hɛɛ ŋɔ bá teŋe o pen. 4Dɛ nɛra la bane tea bini laa gɛ baa gel Taetos la. Dɛ a gɛ nɛra nɔ dɛ ɛ ba te kɛŋɔ asɔre tenaa ban ken dɛ sɔh jo ya bini, dɛ baa nyiŋi dɛ́ jemɛ ya asɔre tena dɔe yaa dɔ ya te Mosis Mmara aa wola yaa vɔrɔwe la bini. Dɛ ba dɛ nyin ba hɛ yaa yá berɛ dɛɛ ɛ waa yaa vɛah la. 5Yaa wola nyin kɛ ba won berɛ Amanesoma la sie ásɛ kasinteŋ la do le tɛ heyaa la, ya ta ban sie tɛɛ kwaraa. 6Nɛra la bini banɔ la baa dɛ lii ba nɛnjena la ta wone dɔ wobɛlbwa bol dɛ ja Amanesoma maa dɛ bol la ta. N te kwaraa waane laa ba nɛnjena ɛɛ wa, dɛkalkɛŋɔ nɛnjena o, nɛnjegre o, a laa Korowii te ɛɛ nyiŋi. 7Ba gbabir nao kɛŋɔ Korowiirii kpɔ o waa la tɛ mɛ ŋɔ ń bol nɛra baa wola Juda tena ɛɛ la be, gɛ waa kpɔ o waa tɛ Pita ŋɔ ó bol Juda tena be la. 8Dɛkalkɛŋɔ gɛ Korowii aa bagle o kpegri Yeesu torome Pita nɛɛ wɛɛ tomɛ Juda tena bini la, gɛɛ o bagle o kpegri men maa ɛ Yeesu torome nɔ nɛɛ mɛɛ tomɛ nɛra baa wola Juda tena ɛɛ bini. 9Jems ne Pita ne Jɔn nomɛlbwa aa dɛ yer ba asɔre tena nomonome la gbabir sɛoh kɛŋɔ Korowiirii kpɔ gɛ toma nɔ do n nɔn ta dɛ cha mɛ a ta. Anomanta ba do nɔɔra n nɔn ta dɛ bagle kɛŋɔ nɛmbeŋkpoŋii ya bwa Korowii toma nɔ bini. Ya nyoa pɛo, asɛ ba sɛh kɛŋɔ n ne Banabas ɛɛ bol Yeesu waa dɛɛ bagle nɛra baa wola Juda tena ɛɛ, asɛ ba gee bagle Juda tena. 10Waa baa bola ja bwaa kɛŋɔ yáa lii nyaara waa dɛɛ cha ba. Dɛ gɛ waa nɔ ɛ waa n ge aa swɛɛ siwi dɛɛ ɛa wubwa. 11Pita aa ba Anteɔk la, n diu kasinteŋ, dɛkalkɛŋɔ dɛ o dɛ ɛ waa aa wola a ŋwɛnɛ ta ɛɛ. 12Jems fa tomɛ nɛra bane Anteɔk. Gɛ nɛra nɔ aa wola Anteɔk balɛ mɔɔ la, dɛ Pita ne asɔre tena la bini bane baa wola Juda tena ɛɛ la pɛo dɛɛ di kwa. Kɛ Jems toroma la aa baa jo Anteɔk la, Pita chwa a gɛ nɛra la be kwaa dii, dɛkalkɛŋɔ dɛ o dɛ ɔmɛ kɛŋɔ hɔɔhra la bɛ ba ŋɔ waa Juda tena nawee waa dɛ bagle kɛŋɔ ba ne nɛra baa wola pena teŋne aa kwaa di la ta teŋɛ. 13Pita koh nɛra sie bɔr ɔma waa dɛ nyogre ŋwɛnɛ. Yabala Juda tena baa ɛ asɔre tena la kar la ge koh nɛra sie bɔr ɔma waa dɛ ɛ gɛ Pita aa ɛa la. Banabas gba nyogre ŋwɛnɛ, dɛ teŋɛ ba nɛ. 14Maa naa kɛŋɔ ba nyogre Yeesu Kristo Amanesoma la ŋwɛnɛ la, n di Pita kasinteŋ yabala la bwa siwi ta ŋɔ, "Ŋwɛnɛ besoo taa a che he ɛ Juda te haa wola Juda tena nawee waa la ta teŋɛ dɛ ŋɔ he hamɛ nɛra baa wola Juda tena ɛɛ ŋɔ báa teŋɛ a ta nɔ? 15Ya te nɔ, Juda tenaa ya nyare ne ya mɛɛnanar, ba lolɛ yaa, asɛ ya ge ɛ Juda tena. Nɛra baa wola Juda tena ɛɛ asɛ Juda tena ɛɛ yer ba 'wechɔg-ɛɛra' la laa yaa. 16Kɛ, ya jemɔ kɛŋɔ Mosis Mmara ta teŋa laa gela nɛn ɛɛ ɛ nɛndɛɛge o wa ɛɛ su Korowii siwi, nemenɛ kɛŋɔ haa dɛ yarada Yeesu Kristo waa la dɛ kpɔ he te tɛo. Yeesu Kristo nɛɛ ya ge kpɔ ya yarada do, asɛ Korowii koh o waa dɛ lɛ yaa kɛ nɛndɛɛga ya waa su o siwi. Mmara ta teŋa laa dɛɛ ba yaa nɛndɛɛga ɛɛ Korowii be, dɛkalkɛŋɔ Mmara ta teŋa aa won gel nomɛlbwa waa su Korowii siwi. 17"Yaa dɛ nyin ya che Yeesu Kristo nɛɛ dɛ ɛ nɛndɛɛga ya waa su Korowii siwi la, an gela ya vɛh Mmara ta teŋa dɛ berɛ wechɔg-ɛɛra la. Dɛ a do gɛ naa, dɛ Yeesu Kristoo dɛɛ cha dɛ gel wechɔga ɛɛ won dɛɛ kaa sie naa? Akai! 18Mosis Mmara n gbagba faa ŋɔa o ta teŋa ta tɔnɔ dɔe la, dɛ n berɔ berɛ habɔɔ dɛ baa teŋɛ o ta naa, n ta wechɔga ɛɛ yaa? 19A gɛ Mmara laanee pili n sie dɛ gel n jemɛ waa dɛ chwa o ta teŋa. Mosis Mmara la te be pera te naa, n do kɛŋɔ nɛn waa sewa. N ne Mmara la toole wobɛlbwa bini kpa, ásɛ n won do le tɛ Korowii. 20Baa kpaa Yeesu Kristo pɛl o dagagre ta la, a kaa ɛ kɛ n ne onee sewa. Anomanta n soga nɔ maa soga nɔ, n gbagba laa dɛɛ hwee nɔ. Korowii Bie Yeesu Kristoo soge n nɛɛ dɛɛ hwee la. N hweera nɔ maa dɛ hwee nɔ, yarada maa yaradao la, anee gela n do le la. Korowii Bie nɔ nyin mɛ kohona dɛ kpɔ o hweera charɛ n nyu. 21Maa sɛh gel Korowii nɛra nɛɛ suna la ɛ pɛɛ. Dɛ Mosis Mmara ta teŋa taa a che nɛn ɛ nɛndɛɛge o waa su Korowii siwi aa, amɔ te dɛ pɛɛpɛɛ Yeesu Kristo sewɛ."

will be added

X\