1 Bechale, hɛ́ɛ no he nyare ne he mɛɛnanar wa, dɛkalkɛŋɔ anee wera tɛ heyaa ya Dɔɔ Yeesu Kristo nɛɛ teŋa ta. 2 Ba chwerɔ ŋɔ, "Duu he nya ne he mɛɛ," dɛ berɛ chwerɛ nyobaga bɛl waa ja o ta, o ɛ Korowii mmara waa tɔ sie bagɛ nyoa ja o ta. 3 Kenii o ŋɔ, "Dɛ he dɛ ɛ gɛ naa, Korowii ɛɛ nyiŋi heyaa, dɛ tɛ heyaa mkpajaŋ harɛ nɔ ta." 4 Mɛɛnanar, he bɛ he bii sibegra dɛɛ do asɛ ba baah nɛɛ di. Hé kpoŋ ba kɛrɛdɛ dɛɛ bag ba ŋwɛnɛre ne waa la bwa aa wera ya Dɔɔ be. 5 He banɔ la baa do heyaa bonɔɔna kɛɛ toli la, hɛ́ɛ no he dɔɔranar baa lɔ harɛ nɔ ta wa, dɛɛ duu ba, dɛ ta tea dɛɛ tom ba kɛŋɔ Yeesu Kristoo hɛɛ tomɛ. 6 He bɛ sɔn waa koh dɛ kpɔ bokpega dɛɛ ɛ toma nɛra sie ta, kɛ hɛ́ɛ ɛ toma kɛrɛdɛ gɛ aa chɛ kɛ Yeesu Kristo bonɔndɛɛga ne toldɛɛga ɛɛ ɛ, dɛɛ ɛ toma he bambile bwa ne á su Korowii siwi. 7 Hé kpɔ silɛɛ dɛɛ ɛ toma. Nɛn laa hɛɛ tomɛ. He Dɔɔ Yeesu Kristoo hɛɛ tomɛ. 8 Onee dɛɛ ba nomɛlbwa kem bɔe o tondɛɛga bwa waa ɛa ta. Dɛ bonɔɔ kɛɛ toloo ba doe noo, dɛ he nyuu hɛɛ di oo, he bwa dɛ ba tondɛɛga haa ɛa kembɔr dɔe Yeesu Kristo be. 9 Dɔɔranar, hɛ́ɛ ɛ he bonɔɔna ne toli kɛrɛdɛ, dɛ gel ba fiiga. He jemɔ kɛŋɔ he ne ba bwa Dɔɔ lɔ beŋkpoŋ nyundua. Waa bane nyine dɛɛ gwaa bane. 10 Anɔ la aa kaa laanee kɛŋɔ hé gel he ne ya Dɔɔ pɛ ásɛ he won dɔ kpegri waa dɔa kohona la. 11 Bɔnsam dɔ baradeɛre kɛrɛdɛ ga. Anomanta hé kpɔ Korowii laa laala bwa do dɛ won yoo, 12 dɛkalkɛŋɔ nɛn laa ya ne wɛɛ yo. Ya ne Bɔnsam toroma aa bea yaa wola an na a dɔ kpegri harɛ nɔ ta nɛra baa wola Korowii tomɛ dɛ do biro ta la nɛ, ne konchɔga bwa soosiwi aa wara kohona laanee dɛɛ yo la. 13 Anomanta a chɛ kɛŋɔ he kpɔ Korowii laa laala bwa dɛ do kɛrɛdɛ, dɛ konchɔga la baa ŋɔ a yo heya aa, he won che kiŋkiŋ dɛ yo ka tonɛ dɛ ta won che. 14 Kenii hɛɛ ba ɛɛ dɛ won che. Hé kpɔ kasinteŋ ɛ kriso, dɛ kpɔ waa aa togra ɛ laa batakaare, 15 dɛ kpɔ Amanesoma la aa dɛ bagle nyopɛo dɔe la do he nakpale, 16 asɛ dɛ kpɔ yarada tɔ he te gbemgbe dɛ́ won lɛ hɛma la Bɔnsam aa kpɔa su nii ta dɛɛ ta heyaa la bwa dɛɛ ta, 17 dɛ berɛ kpɔ lɛɛ Korowii aa lɛ heyaa la ɛ buni gbɛrɛ dɛ kpɔ pi, dɛ kpɔ o waa la aa ɛ o Domadɛɛge tokobii la kpoŋe. 18 Hɛ́ɛ soŋo harɛ bini soŋa nɔ bwa. Hé che Korowii Domadɛɛge la kpegri ta dɛ soŋo saŋ bɛlbwa. He bɛ dom dɛɛ chɔ. Hɛ́ɛ soŋe Korowii saŋ bɛlbwa dɛɛ tɛ o nɛra la bwa. 19 Hɛ́ɛ soŋo dɛɛ tɛ n ge, asɛ dɛ n dɛ ba waa bola aa, ń dɔ waa dɛɛ bol, dɛ dɔ bambile dɛ won pili o wesɔɔhla la dɛ le Amanesoma la bini. 20 Maa ɛ Yeesu nachige dɛɛ bol Amanesoma nɔ ba koh a waa do mɛ dea nɔ. Hɛ́ɛ soŋe Korowii asɛ n ta dɔ bambile dɛɛ bagla gɛ aa chɛ kɛ mɛɛ bagla. 21 Tichikos waa ɛ ya dɔŋ yaa nyinu kohona wɛɛ ɛ ya Dɔɔ toma kasinteŋ ne la, onee dɛ ba bagle n toma waa bwa ne gɛ maa doa. 22 A waa gela n tomɔ he be ásɛ o ba bol ya waa bagle heya, dɛ do heyaa gbemba la. 23 Ń Naa Korowii ne ya Dɔɔ Yeesu Kristo tɛ he ne yabala la bwa deŋnesɔɔhna ne nɛnnyin ne yarada, 24 dɛ cha he banɔ la bwa haa dɛ nyin ya Dɔɔ Yeesu Kristo bambile bwa ne aa wola jaga dɔe la.
