fesos 5

1He ɛ Korowii bii waa dɛ nyin heya, anomanta hé chaaro dɛ kpɔ o da. 2A wer kɛŋɔ he so dɔŋa nyina ne kɛŋɔ Yeesu Kristo aa nyin yaa dɛ sewɛ lɛ yaa a ɛ sarahadɛɛge dɛ tɛ Korowii la. 3Kɛ jwamane ne wedoŋa ne sibegra dɔŋa kwaa ta te, he bɛ a waa dɛɛ bol a ba ɛ kɛŋɔ hɛɛ ɛa, dɛkalkɛŋɔ aa were tɛ Korowii nɛra. 4Hɛ́ɛ nyiŋi kɛrɛdɛ he wobol bini, dɛ bɛ wobochɔga ne gɛnewobol ne wobosale dɛɛ bol. A ta chɛ kɛ hɛɛ bola. Hé gel he wobol ɛ Korowii kpɛɛra wa. 5Hé jemɛ kɛrɛdɛ kɛŋɔ nɛra baa dɛ bɔ jwamane, dɛɛ ɛ wedoŋa, ba sie ɛɛ begre kwaa ta la aa bɔr dɔe ba Yeesu Kristo ne Korowii Kora la bini. Sie begra kwaa ta do kɛŋɔ vog toma ken. 6He bɛ gel nomɛlbwa kpɔ wepuu dɛ won negre heya. A gɛ waa nɔ bwa waa Korowii baah di deŋnekpeg tena nɛɛ wɛɛ ba ba deŋne tɛra. 7Anomanta he ne gɛ nɛra la bɛ wobɛlbwa ta pɛ. 8He waa bwa fa ɛ biro bini wa, kɛ ya Dɔɔ Yeesu nomanta he ɛ bochaah ta nɛra. Anomanta hé gel he soga bini wobɛlbwa do kɛŋɔ bochaah ta nɛra. 9Bochaah ta we-ɛɛlaa wedɛɛga, wekaih, ne kasinteŋ wa. 10Anomanta hé jemɛ waa haa ɛ aa lɛ Korowii sie, 11asɛ dɛ gel biro bini waa ɛɛ. A ta tɔnɔ dɔe. Hé le a ne baŋ ásɛ nɛra jemɛ gɛ aa doa. 12Waa ba yon sɔh dɛɛ ɛ la aa were. A waa bagla gba dɔ sihiih. 13Ba le komɛlbwa ne bochaah ta naa, o kon soosiwi won nae kɛrɛdɛ. 14Kon la bwa bɔr aa chaah o ta la, o gbagba dɛ bagle o te. A waa ba yon ŋɔ, "He banɔ la haa sewa chɔ la, hé ir ásɛ Kristo chaah he nɛɛ" la. 15Anomanta hɛ́ɛ nyiŋi he soga bini kɛrɛdɛ dɛ ɛ wejerema dɛ bɛ gɛn. 16Wechɔga lole kɛrɛdɛ taraken. Anomanta hé takapɔ dɛɛ ɛ wedɛɛga taraken nɔ haa dɔ bɔr dɛ ɛa nɔ. 17Hé gel he nfɛrɛ nyae la dɛ jemɛ waa Korowii aa dɛ nyin la kɛrɛdɛ. 18He bɛ sen nyɔ kohona dɛɛ dɛɛ. Gɛ dɛ chɔg nɛn. Kɛ hé gel Korowii Domadɛɛge la so he nɛɛ kɛrɛdɛ, 19asɛ dɛ gel o wobol ne o yela do he bambile bini he bola dɛɛ tɛ dɔŋa, dɛɛ go yela aa dɛ bagle o waa la ne anɔ la aa dɛ kpɛɛro. Hé kpɔ silɛɛ dɛɛ kpɛɛ he Dɔɔ he bambile bwa ne, 20dɛɛ yerɛ ya Dɔɔ Yeesu Kristo sɔn dɛɛ jam N Naa Korowii waa bwa ta. 21Hé bwa ɛɛ no dɔŋa be ɔma haa dɛ ɔmɛ Yeesu Kristo la nomanta. 22Haahna, hɛ́ɛ no he jaranar waa kɛŋɔ he Dɔɔ Yeesu Kristo waa hɛɛ no la, 23dɛkalkɛŋɔ baalee ɛ o haah nyu te kɛŋɔ Yeesu Kristo aa ɛ asɔre tena bwa nyu te la. Banee ɛ o bwadabi wɛɛ lɛɛ ba. 24Anomanta a chɛ kɛ haahna ɛɛ no ba jaranar waa wobɛlbwa ta kɛŋɔ asɔre tena aa dɛ no Yeesu Kristo waa la. 25Baala, hɛ́ɛ nyin he haahna kɛrɛdɛ kɛŋɔ gɛ Yeesu Kristo aa dɛ nyin asɔre tena dɛ koh ba waa sewɛ la. 26O sewɔ tɛɛ ba dɛ́ gel ba won ɛ o nɛra asɛ ba doŋa bwa won le ba nɛ, o waa baa noa ne Korowii nee baa sɔ ba nomanta. 27O ɛ gɛ dɛ́ won kpɔ asɔre tena berɛ o handɛɛge, doŋa bɛlbwa aa wola toole o nɛ, waa wola kirihiah bɛlbwa dii, o bobɛlbwa aa wola jweremɛ, dɛ do wer ka tonɛ. 28Gɛɛ chɛ kɛ baala gee nyin ba haahna kɛŋɔ gɛ baa dɛ nyin ba gbabir bwadabii la. Baa bɛlbwa waa dɔ haah dɛɛ nyinu gɛ la, o gbabirii wɛɛ nyin la. 29Umee dɛ hah o gbabir ɔ? Nomɛlbwa dɛ nyiŋi o te kɛrɛdɛ dɛɛ nyiŋi o nyu gɛ Yeesu Kristo aa dɛ nyiŋi asɔre tena la. 30Ya bwa ɛ o bwadabii la pera. 31Ba chwerɔ ŋɔ, "Gɛ nomanta baa lɛɛ gel o nya ne o mɛɛ, asɛ o ne o haah ka pɛ, ba nɛra banɛ la ɛ nɛmbeŋkpoŋ." 32A gɛ waa nɔ bini luŋri. N te be te, Yeesu Kristo ne asɔre tena waa ba bagle gɛ la. 33Anomanta hé bɛlbwa takapɔ dɛ nyin o haah kɛŋɔ o gbagba, háah ge kpɔ duure dɛɛ tɛ o jaa.

will be added

X\