fesos 3

1Gɛɛ a do men Pɔɔl baa koh kɛ n dɛ teŋɛ Yeesu Kristo nɛɛ dɛ bol o waa la dɛɛ bagle he banɔ la haa wola Juda tena ɛɛ dɛ do mɛ dea la, n dɛ soŋe Korowii dɛɛ tɛ heya. 2He ken no gɛ Korowii aa sune n nɛɛ dɛ cha mɛ kɛrɛdɛ n won dɛɛ cha heyaa la. 3O gbagbaa pili o wesɔɔhla waa bini bag mɛ. N fa chwerɛ gɛ waa nɔ tama dɛ tɛ heya. 4Dɛ he kure gɛ n faa chwera la aa, hɛɛ wonoo jemɛ kɛŋɔ n jemɛ Yeesu Kristo wesɔɔhla la bini. 5Korowii fa ta o wesɔɔhla bini pile bagle saŋ la tena. Kɛ taraken o Domadɛɛge bagla o nɛra baa ɛ o toromedɛɛga ne o keamedɛɛga la be, 6dɛ gel ba jemɛ kɛŋɔ pɛɛ banɔ la baa wola Juda tena ɛɛ la ne Yeesu aa pɛa la ne Amanesoma la baa noa la nomanta, ba ja Juda tena nɛɛ dɛ ɛ Korowii kwa, dɛ bwa ja Yeesu Kristo bwadabii ta, dɛ bwa pɛ dɛɛ di Korowii nyobaga la ge tɔnɔ. 7Amanesoma toma nɔɔ Korowii kpɔ tɛ mɛ. Sunaa o sune n nɛɛ kohona dɛ cha mɛ o kpegri ne, n won dɛɛ ɛ toma nɔ. 8N ɛ bechala o nɛra bwa bini n fe aa wola chɛɛ, kɛ menee o le ŋɔ ń bol o Amanesoma la bagle nɛra baa wola Juda tena ɛɛ ásɛ ba ge jemɛ wedɛɛga aa wola jaga dɔe dɛ le Yeesu Kristo waa bini. 9Korowii aa ta komɛlbwa ba le fini, o kpɔ waa nɔ ne gɛ a ŋwɛnɛre aa doa sɔh nɛwɛnyini. Kɛ taraken o pili a bini bag mɛ ń bol bagle nɛra bwa ba jemɛ. 10O ɛ gɛ ásɛ nyundua toroma ne kwaa aa dɔ kpegri bwa dɛ do Korowii be nyundua bwa pese asɔre tena waa dɛ jemɛ gɛ bwa Korowii wejema aa kana ne gɛ waa dɛ ɛ o toma. 11Gɛ waa chega wubwa la, ya Dɔɔ Yeesu Kristo aa bala la, a wono ɛ gɛ. 12Yaa dɛ yarada Yeesu ya ne o pɛ nɔ, yaa wonoo ba Korowii be yaa wola ɔmɛ. 13Anomanta waa maa dɛ soŋe heyaa laanee kɛ he bɛ gel he bwara hwah wahala maa koh he waa dɛɛ na nɔ ta. Hé jemɛ kɛŋɔ he dɛ dɔ sɔn n wahala nɔ ta. 14Anomanta n dɛ guŋi N Naa Korowii harɛ. 15Onee komɛlbwa waa lɔ nyundua ne harɛ bwa Mɛɛ. O bee ba mɛɛnanar lɛ ba sɔn ne ba kpegri dɛɛ di. 16N dɛ soŋo kɛ, chae waa dɛ cha yaa kohona a dɔ jirima nɔ nomanta, ó gel o Domadɛɛge tɛ heyaa kpegri ásɛ he won lawɛ o waa bini kiŋkiŋ he bambile bwa ne, 17dɛ won dɔ yarada kɛrɛdɛ, ásɛ he won lawɛ Yeesu Kristo he ne o pɛ. N dɛ soŋo he bambile won do o nɛɛ dɛ lawɔ kɛrɛdɛ, 18ásɛ he ne Korowii nɛra la bwa won jemɛ gɛ Yeesu Kristo nyina aa kana dɛ do luŋri, aa wola jaga dɔe bwa. 19O nyina waa dɛ nyin yaa la gwaa ya liire. Kɛ n dɛ soŋe Korowii he won jema, dɛ won dɔ o gbagba da kɛrɛdɛ ga dɛ ka tonɛ. 20Hɛ́ɛ tɛ Korowii sɔn! Onee chegɛ o kpegri waa kpɔa dɛɛ ɛ toma ya bini la ta dɛ won ɛ waa aa gwaa gɛ ya fe aa liira dɛɛ soŋo la. 21Hé gel o dɔ jirima Yeesu Kristo ne asɔre tena waa bini saŋ bɛlbwa! Aamen.

will be added

X\