fesos 2

1He fa do kɛŋɔ he sewɔ Korowii be. He wechɔgaa gela he begre gɛ. 2He fa dɔ harɛ nɔ ta liire dɛɛ teŋɛ wechɔga ta, dɛɛ teŋɛ konchɔga bwa yaa wola an na la dɔɔ la nɛ. O tentenee dɛɛ ɛ toma deŋnekpeg tena bambili bini. 3Gɛɛ ya bwa faa ɛ, dɛɛ ɛ waa ya nɛwɛnyini mar wechɔga aa suu nɔ aa dɛ nyin, asɛ dɛɛ teŋɛ ya bwadabii pɛla ne ya liichɔga ta. Ya ne nɛra baa dɔ harɛ nɔ ta liire bwa nɛɛ Korowii baah faa di. 4Kɛ Korowii nyina waa dɛ nyin yaa kohona, ne suna o yon dɛɛ sune ya nɛɛ kɛrɛdɛ la nomanta, 5o ir yaa seo la ya wechɔga nomanta yaa sewa la ta, dɛ berɛ koh pɛɛ ya ne Yeesu Kristo aa pɛa la waa dɛ tɛ yaa mkpafale. Korowii suna waa sune he nɛɛ la taa a che o lɛ heya. 6Korowiirii ir ya ne Yeesu Kristo bwa seo ta, asɛ pɛɛ ya ne waa pɛa la nomanta, o berɛ tɛ ya bwa soŋnibɔra o be nyundua. 7O ɛ gɛ dɛ́ kpɔ bagle nɛra baa wola toole dɛ taa ba bala asɛ ba na gɛ waa gara sune ya nɛɛ kohona dɛ cha yaa kɛrɛdɛ, gɛ waa chegɛ Yeesu Kristo nɛɛ dɛ ta tea ɛ yaa waa nɔ bwa la. O nɛn nɛɛ suna kan kɛrɛdɛ. A ta dɔŋ dɔe. 8Korowii aa lɛ heyaa ta la, o nɛn nɛɛ suna ne he yarada waa o ɛ gɛ. He gbagba be laa a le, pɛɛpɛɛ o lɛ heyaa ta dɛ tɛ heyaa mkpa. 9Ya wedɛɛga ta laa a che o lɛ yaa, nomɛlbwa bɛ kpɔ dɛɛ maŋkura o te. 10Korowiirii ta ya bwa. Waa ta yaa la, wedɛɛga ɛɛ waa o ta yaa ásɛ ya che Yeesu Kristo kpegri ta dɛɛ ɛa. O tɔ sie cheg yaa kɛ ya baa ɛ wedɛɛga. 11Anomanta hɛ́ɛ lii gɛ he faa doa la. He ta Juda tena ɛɛ, asɛ Juda tena baa dɛ maŋkura penteŋ waa koh kɛ haa he pena teŋe dɛɛ nyiŋi he nyu baah. A ɛ nɛwɛnyini bwadabii we-ɛɛla. 12He faa Kristo Korowii aa bagɛ nyoa ŋɔ wɛɛ tomɔɔ ó ba lɛ yaa la waa jemɛ. He fa ta Juda tena Korowii aa lee ba dɛ gel ba ɛ o nɛra la nɛɛ jae. He faa nyoo Korowii aa baga dɛ kwaa o ne o nɛra fɔo dɔe la waa jemɛ. He fa ta hwɛga bɛlbwa dɔe. He faa Korowii jemɛ ó won cha heya. 13Kɛ taraken he banɔ la he ne Korowii baah faa jaŋa la, Korowii koh Yeesu Kristo seo waa sewa asɛ he ne o won pɛ la waa dɛ kpɔ heyaa ba o be. 14On gela nyopɛo ba, dɛ gel ya banɔ la ya faa hah dɔŋa la ɛ beŋkpoŋ. Haeh ya Juda tena ne he banɔ la haa wola Juda tena ɛɛ nɔ faa hah dɔŋa la do kɛ danjwɛɛ dɛ teŋe yaa baah ta. Onee pagre a gɛ danjwɛɛ la. 15O gbagba bwadabii o kpɔ ɛ gɛ dɛ sewɛ dɛ laa Mosis Mmara la laa kpɔ ya nɛ, asɛ banɔ la baa dɛ teŋɛ a ta la bɛ ba te pere le banɔ la baa wola a ta teŋɛ la nɛ. Onee wona kpɔ ya bwa pɛ dɛ begre yaa ya ɛ nɛmbeŋkpoŋ, dɛkalkɛŋɔ ya bwa ne onee pɛa. Gɛɛ o ɛ dɛ gel ya dɔ nyopɛo. 16Waa la bwa a faa vɔrɔwe yaa ya hah dɔŋa la, o chɔg a bwa ta dagagre la ta dɛ gel ya bwa ɛ beŋkpoŋ, dɛ berɛ lawɛ ya ne Korowii pɛ. 17O baa bagle he nɛra haa wola Juda tena ɛɛ he ne Korowii baah faa jaŋa la ne Juda tena ba ne Korowii baah aa wola jaŋɛ la bwa amanesoma kɛŋɔ nyopɛo balɔ. 18Onee gela ya bwa dɔ Korowii Domadɛɛge la, dɛ che o nɛɛ dɛ won dɛɛ tel o Mɛɛ be. 19Anomanta he ta hɔɔhra ɛɛ kpa. He ɛ bwɛɛlembii dɛ ja o nɛra la nɛ, dɛ ɛ o gbagba lola, 20dɛ ja Yeesu toroma ne o keamere la nɛ. Jae haa ja ba nɛɛ do kɛŋɔ baa dɛ ma dea la. O gelɔ he do kɛŋɔ dea danjwɛ. O toroma ne o keamere laanee dea la sollogle, asɛ o gbagba gee bwedɛɛge la baa kpɔa pa dea la mun la. 21Onee lawɛ banɔ la bwa ba ne waa pɛa la kpoŋe, asɛ dea la ɛɛ kpeg dɛ ɛ Korowii Dea, o nomanta. 22Pɛɛ he ne waa pɛa la nomanta, he gba ja dea la Korowii aa dɛ ma o ɛ o dobɔr la ta. O Domadɛɛge la aa soge he nɛɛ la nomanta, he ɛ o dobɔr.

will be added

X\