fesos 1

1Men Yeesu Kristo torome Pɔɔlee chwerɛ tɔn nɔ. Korowii tetooraa o tɛ mɛ toma nɔ. N chwerɔ dɛɛ tɛ he nɛra haa lɔ Ɛfesos dɛ ɛ Korowii nɛra dɛɛ teŋɛ Yeesu Kristo nɛɛ kasinteŋ ne la. 2Ń Naa Korowii ne ya Dɔɔ Yeesu Kristo cha heya, dɛ tɛ heyaa bosɔɔhna. 3Hé gel ya jam ya Dɔɔ Yeesu Kristo Mɛɛ Korowii, dɛkalkɛŋɔ o cha yaa wedɛɛga la bwa aa le o Domadɛɛge be la ta, asɛ yaa na som o be nyundua, pɛɛ ya ne Yeesu Kristo aa pɛa la nomanta. 4Korowii felo dɛ le yaa tɛ o te saŋ la o faa wola harɛ gba tae la, dɛ ŋɔ o dɛ ba gela ya ne Yeesu Kristo pɛ yá won do kaih dɛ bɛ doŋa bɛlbwa dɔ o be. 5O nyina waa dɛ nyin yaa waa o fel jemɛ ya waa cheg kɛŋɔ wɛɛ koh Yeesu Kristo waa dɛ kpɔ yaa ɛ o bii. O tetooraa o chega gɛ. 6O Binyini la waa o sune ya nɛɛ dɛ ta tea dɛ cha yaa gɛ ásɛ nɛra won kpɛɛro ya sum waa dɛ na kohona la wa. 7O Binyini laanee lɛ ya seo sewɛ. O chalee yawɛ yaa tɛ Korowii, asɛ o kpɔ ya wechɔga dɛɛ kɛ yaa. Anee dɛɛ bagle suna waa sune ya nɛɛ kohona dɛɛ cha yaa la. 8O ta dɛ cha yaa kɛrɛdɛ ya won dɔ wejema ne liire. 9Gɛ bwa Korowii aa ɛ Yeesu Kristo waa cheg o tetoora ta a fa sɔh yaa la, o berɔ pili a bwa bini tɛ yaa ya won jemɛ gɛ aa su o siwi o chega gɛ saŋ la, 10asɛ a ɛ gɛ saŋ la waa liira la. O chega kɛŋɔ wɛɛ geloo nyundua ne harɛ ta komɛlbwa ɛ beŋkpoŋ, asɛ Yeesu Kristo ɛ ba Dɔɔ. 11Ya ne Yeesu Kristo aa ba ɛ beŋkpoŋ la waa o le yaa tɛ o te. Korowii o yon dɛɛ cheg gɛ wobɛlbwa aa dɛ ba ɛɛ asɛ a yon ɛ gɛ waa dɛ nyin la, on fela le yaa tɛ o te 12ásɛ nɛra won nyiŋi ya banɔ la yaa fela dɔ hwɛga Yeesu Kristo waa ta la, dɛ kpɛɛro, dɛ tɛo jirima. 13Baa bagle heyaa kasinteŋ dɛ le Amanesoma la aa dɛ lɛ heyaa la ta la, he gba sɛoh dɛ ja beŋkpoŋri ya ne Yeesu Kristo aa ɛa la ta. Haa yarada Korowii dɛ kpɔ he te tɛo la, o kpɔ o Domadɛɛge tɛ heyaa gɛ waa bagɛ heyaa nyoa la. O Domadɛɛge la lɔ ya nɛɛ dɛ ɛ nso kɛŋɔ ya ɛ Korowii nɛra. 14O Domadɛɛge la taa a che ya jemɛ kɛŋɔ yaa dɔ kwaa Korowii aa bagɛ o nɛra nyoa laanee. Anee bagla kɛŋɔ Korowii ɛɛ lɛ o nɛra bwaa ta dɛ lɛ sɔn ne jirima tɛ o te. 15A waa gela maa no he yarada haa dɛ yarada ya Dɔɔ Yeesu Kristo dɛ kpɔ he te tɛo dɛɛ nyin Korowii nɛra la bwa la, 16n ta dɛ jam Korowii he waa saŋ bɛlbwa, dɛ soŋo dɛɛ tɛ heya. 17Ya Dɔɔ Yeesu Kristo Mɛɛ Korowii la waa dɔ jirima kɛrɛdɛ ga la, ó ja heyaa wejema, dɛ chaah he sie ásɛ he won dɛɛ jemɛ o waa saŋ bɛlbwa, 18dɛ pili he sie dɛ gel he won jemɛ hwɛga Korowii aa le heyaa he dɔ a do kan kohona la kɛrɛdɛ, dɛ jemɛ kɛŋɔ wedɛɛga waa bagɛ o nɛra nyoa ŋɔ baa dɔɔ la kan taeh, 19dɛ berɛ jemɛ kɛŋɔ kpegri Korowii aa dɔa dɛɛ cha ya banɔ la yaa yaradao la kan, a ta dɔŋ dɔe. Hé lii gɛ o faa cha Yeesu Kristo o kpegri ne la, dɛ jemɛ kɛŋɔ kpegri la tentenee ó kpɔ dɛɛ cha yaa. 20O iru seo ta dɛ kpɔɔ kaa o be ka so nomombɔr o be nyundua bela, 21o dɔ kpegri kɛrɛdɛ ga dɛ gwaa kpegri konchɔga aa bea yaa wola an na bwa soosiwi aa dɔa, dɛ dɔ sɔn gwaa komɛlbwa kɛɛ nomɛlbwa waa lole taraken ne nɛra baa dɛ ba bala tɔpere aa dɛ ba bala la ta. 22Korowii kpɔ komɛlbwa ne nomɛlbwa bil Yeesu Kristo sie o tire ba nɛ, dɛ berɛ gel o ɛ asɔre tena bwa nyu, 23asɛ ba ge ɛ o bwadabi. Onee kana ga dɛ won su harɛ nɔ bwa, kɛ asɔre tena laanee gela o di mu ka tonɛ.

will be added

X\