Kolose 2

1N dɛ nyin he jemɛ gɛ n siwi aa swɛɛra mɛɛ koh n te he ne Laodisia tena ne nɛra baa wola men jemɛ la wa, 2dɛ́ do he bwa gbemba he won nyin dɔŋa dɛ ɛ beŋkpoŋ, dɛ won jemɛ Korowii wesɔɔhla waa pili a bini tɛ heyaa la kɛrɛdɛ, he bɛ aahna-aahna tamaa bɛlbwa ɛ, dɛ dɔ tɔnɔ le o waa la bini kɛrɛdɛ. O waa laanee Yeesu Kristo. 3Korowii wejema aa wola jaga dɔe la bwa lɔ Yeesu Kristo be. O nɛɛ ya che dɛ dɔ gɛ wejema nɔ. 4N dɛ bagle heyaa asɛ nomɛlbwa bɛ won kpɔ nyotor negre heya. 5N toole he be, kɛ n liire te lɔ he be. Anomanta a do n som kɛ he bwa aa pɛa, asɛ dɛ lawɛ yaradae haa dɛ yarada Yeesu Kristo la bini kpoŋe kiŋkiŋ la. 6Haa dɔa kpɔ he te tɛ Yeesu Kristo kɛ he Dɔɔ nɔ, hé ne o pɛ wobɛlbwa ta. 7A taa aa ba chega he won che kiŋkiŋ dɛ kpeg o waa la ta, dɛ won yarada o waa bwa kɛrɛdɛ gɛ baa bagle heyaa la, dɛɛ jam Korowii saŋ bɛlbwa. 8Webagla ane lole bane ɛɛ bagle dɛɛ yera wejema. Hé nyiŋa kɛrɛdɛ. A ɛ nyosone kɛɛ wepuu, ba kpɔ dɛɛ negre nɛra. Nɛwɛnyini nawee waa, ne koŋkwaa aa dɛ di kpegri harɛ nɔ ta wejema waa baa bagle la. Yeesu Kristo be laa a le. 9Yeesu Kristo ɛ Korowii gbagba. O ba harɛ nɔ ta dɛ ba berɛ nɛwɛnyini. 10He ne waa pɛa la, he dɔ komɛlbwa. Onee dɔ sɔn waa gwaa kwaa yaa wola an na bwa soosiwi sɔn. 11He ne Yeesu Kristo aa pɛa la, o teŋe he dobene la ta. O ge penteŋaa la. He te teŋa nɔ ta gɛ nɛwɛnyini aa dɛ teŋe la ɛɛ. 12Korowii nee ba faa sɔ heyaa la, anee bagla kɛ he ne Yeesu Kristo bwaa ba pɛ huge. Asɛ a berɛ che yarada haa dɛ yarada Korowii ne kpegri waa kpɔa ir Yeesu seo ta la ta he ne o bwa pɛ ir dɛ dɔ mkpa. 13He wechɔga ne he dobene Korowii faa wola teŋe ta la gelɔ he fa do kɛŋɔ he serewɔ. Kɛ he ne Yeesu Kristo aa pɛa la, Korowii kpɔ he bwa wechɔga kɛ heya, dɛ tɛ he bwa mkpafale. 14Teŋa haa ŋɔa ŋɔ hɛɛ teŋɛ o Mmara taa dɛ berɛ horɛ a bar heyaa la, a bwa taa o le heya. Waa a waa pɛɛ kpa. Korowii kpaa a bwa pɛl Yeesu dagagre la ta a tonɛ. 15Yeesu seo waa sewa la, o chɔg kwaa aa dɔ kpegri bwa kpegri, dɛ lɛ a kpegri dɔɔh. O ɛ gɛ dɛ gel sihiih kpoa nɛra bwa siwi ta, bá jemɛ kɛŋɔ o gelɔ koŋkpega la bwa kpegri ɛ pɛɛpɛɛ. 16Anomanta dɛ nomɛlbwa dɛ pwah heyaa kwaa ane haa dɛ di, ne kwaa haa dɛ nyɔ, ne he tɔpejena dii benanyoa ne korobie ne yawanyoa yawanyoa ta naa, he bɛ on dawɛ. 17A gɛ waa nɔ fa tɔ sie chig dɛɛ bagle waa aa dɛ ba ɛɛ kerekere la kɛŋɔ nɛn lileo aa tɔ o sie, waa wola o gbagba ɛɛ la. Yeesu Kristo waa la aa bala la, anee waa la tenten. 18Dɛ nomɛlbwa dɛ pwah heyaa ŋɔ haa gɛ waa teŋe nyosone ŋɔ pwɛraa wɛɛ pwɛr o te dɛɛ tomɛ nyundua toroma la ta teŋaa, he bɛ on dawɛ. Gɛ nɛn nɔ dɛ maŋkura o te kɛŋɔ o dɛ na waa deera ta, dɛɛ yerɛ o te nɛnjen, kɛ pɛɛpɛɛ. Nɛwɛnyini liire taa wɛɛ teŋɛ, 19dɛ vɛh o te kpɔe dɛ do Yeesu Kristo lɔga. Onee ya nyu, asɛ ya ɛ o bwadabii dɛɛ dɔ bokpega o be, bɛlbwa lawɛ o dɔŋ kpoŋe kɛrɛdɛ ya ne o ɛ beŋkpoŋ, dɛ che pɛɛ yaa pɛa la ta dɛ gel yaa kpeg gɛ Korowii aa dɛ nyin. 20He ne Yeesu Kristo pɛo dɛ sewɛ, anomanta he ne koŋkwaa aa dɛ di kpegri harɛ nɔ ta toole wobɛlbwa bini kpa. Aah bɔkwa waa he ta kpɔ he te dɛɛ do harɛ nɔ ta kii ta dɛ gel a vɔrɔwe heyaa ŋɔ, 21"He bɛ onɔ lawɛ, dɛ bɛ onɔ dagɛ, dɛ bɛ onɔ lege" nɔɔ? 22Gɛ kwaa nɔ ɛ kwaa dɛ he ɛa aa, dɛ a waa tonɔ. Nɛwɛnyini kii ne ba nawee waa a te. 23Kpela, nɛra ɛɛ dɛɛ duu nɛra baa dɛ teŋɛ gɛ waa nɔ ta la kɛ ba ɛ wejerema, dɛɛ lii kɛŋɔ ba Korowii toma aa swɛɛ ba siwi kohona waa baa pwɛr ba te dɛɛ ha ba bwadabii la. Kɛ a bwa ɛ pɛɛpɛɛ. Aa won gel nomɛlbwa lawɛ o te dɛ gel wechɔga ɛɛ.

will be added

X\