We-la 8

1Baa kpo Steeven la, Sɔɔl sɛoh ŋɔ o chɛ kpoe. Awola tɔpere la ba fiigi asɔre tena baa lɔ Jerusalam la, asɛ ba chwa pegre Judia harɛ ne Samaria harɛ bwɛɛre la ta. Yeesu toroma la gboo wola chwae. 2Nɛra baa dɛ ɔmɛ Korowiirii kaa huge Steeven dɛ wiu kɛrɛdɛ. 3Sɔɔl ge ɛ wobɛlbwa waa won dɛ́ chɔg asɔre tena la waa bwa, dɛ jo bela deremi bwa ta dɛ tɛgre ba bini baala ne haahna bwa kaa do dea. 4Bobɛlbwa asɔre tena la aa pegra dɛ la la, ba bol Amanesoma la dɛɛ gaage. 5Felep iro la Samaria harɛ bwɛɛ bɛl ta, dɛ ka bol Kristo la Korowii aa ŋɔa ŋɔ wɛɛ tomɔɔ ó ba lɛ yaa la waa bela tena be, dɛ ka bag ba ŋɔ Yeesuu Kristo la. 6Nɛnlaa la aa na nyokpowaa waa dɛ ɛ, dɛ no o wobol la, ba cheg deŋne no o be, 7dɛkalkɛŋɔ o wono doŋi kwaa aa dɛ ir nɛra la kɛrɛdɛ nɛɛ ta. Aa dɛ le la, dɛ a dɛ dooge lɔŋɔre. Felep chah nɛra ba bobɛla aa serewa ne boobie ge ja, 8asɛ bwɛɛ la tena sie lɛ kɛrɛdɛ. 9Dɛ baa bɛl lɔ bwɛɛ la ta dɛ ɛ o te bebee bɛl baa yerɔ Seemɔn. O bebeewaa la kpo Samaria tena bwa nyoa. Dɛ o dɛ maŋkura o te dɛɛ yerɛ o te nɛnjen bɛl. 10Anomanta bela bechale ne ba nomonjena bwaa cheg deŋne dɛ yon dɛɛ no o be, dɛ ta kane so dɛɛ nyiŋi o we-ɛɛla. Ba nyoa kpo o waa dɛ ŋɔ, "Jamɔ Korowii kpegnɛn baa dɛ yerɔ Kpegri Tenten Dɔɔ laanee nɔ?" 11Seemɔn soge bela bigri. O bela soga la saŋ bebeewaa waa ɛa la ta wekokori ɛɛ, anomanta ba ta kane so dɛ cheg deŋne no o be kɛrɛdɛ. 12Baa bera ba no Amanesoma waa Felep aa dɛ bol dɛɛ bagle Korowii Kora ne Yeesu Kristo waa la, ba yaradao. Dɛ ba ne ba haahna bwa dɛ ba baa sɔ ba Korowii ne. 13Seemɔn Bebee la gba berɔ ba yarada Korowii waa la, asɛ ba sɔɔ a ne. Baa sɔɔ nee la, o kpɔ o te pɛl Felep. Bobɛlbwa Felep aa dɛ la la, o ne onee dɛɛ la. Seemɔn aa na nyokpoa tomkpega Felep aa dɛ ɛ la, a ɛo anebɛlbwa. 14Yeesu toroma baa lɔ Jerusalam aa noa kɛŋɔ Samaria tena yarada Korowii waa la la, 15ba tomɛ Pita ne Jɔn ba be. Baa la bela la, ba kaa soŋe Korowii tɛɛ ba, asɛ Korowii tɛɛ ba o Domadɛɛge la. 16Dɛ Korowii ta gelɛ o Domadɛɛge la so ba bɛlbwa nɛɛ mɔɔ. Dɛ nee gboo ba sɔ ba báa teŋɛ ya Dɔɔ Yeesu nɛ. 17Pita ne Jɔn kpɔ ba nɔɔra darawe ba nɛ, asɛ Korowii gel o Domadɛɛge la ba so ba nɛ. 18Seemɔn aa naa kɛŋɔ darawa Pita ne Jɔn aa kpɔ nɔɔra darawe nɛra la nɛɛ laanee gela Korowii Domadɛɛge la ba so ba nɛɛ la, o kpɔ suuga ba ba be, 19dɛ ŋɔ ba be ŋɔ, "Hé lɛ dɛ tɛ n ge a gɛ kpegri nɔ bɛl ásɛ nomɛlbwa maa kpɔ nɔɔra dawɛ o nɛɛ la, Korowii Domadɛɛge la ɛɛ so o nɛ." 20Belaa Pita ŋɔ o be ŋɔ, "He ne he suuga bwa ɛɛ pɔɔh! Ɛrɛɛ he ɛ na kɛŋɔ hɛɛ wonoo yawɛ Korowii Domadɛɛge waa kpɔa kɛ o nɛra nɔɔ? 21He ta ya toma nɔ ta jae, he ta dibɔr ge dɔe a ta, dɛkalkɛŋɔ he bambile ta chaahnɛ Korowii be. 22Charɛ he liire dɛ le he wechɔga nɔ haa dɛ lii nɔ ta, dɛ soŋe Korowii asɛ dɛ aa magroo waa, ó kpɔ he wechɔga haa liira nɔ kɛɛ. 23He bɔweela gɛne kohona, he wechɔga ge kan kohona to." 24Anee Seemɔn ŋɔ Pita ne Jɔn be ŋɔ, "N poo heya, hé soŋe Korowii tɛ mɛ asɛ waa haa dɛ bol nɔ bɛlbwa bɛ men ɛ." 25Pita ne Jɔn babagle waa Korowii aa ɛa bwa, dɛ bol Korowii Waa bwɛɛ la tena be. Baa tona dɛ berɛ dɛɛ kaa Jerusalam la, ba chegɛ Samaria harɛ bwɛɛre la kɛrɛdɛ ta dɛ bol Amanesoma la ba be. 26Belaa nyundua torome bɛl ŋɔ Felep be ŋɔ, "Ir kaa wekaŋle harɛ bɔr le, bela ŋwɛnɛ bɛl aa le Jerusalam kaa Gasa la." Pua waa ɛ hɛŋle gboo a gɛ bɔr nɔ. 27Felep iro chig ŋwɛnɛ ta dɛɛ la, dɛ ka na Itiopia harɛ haŋkooro Kandase nomoa waa dɛ cheg o suuga dɛɛ nyiŋi o kondɔɔh bwa la. Dɛ ba fɔgɛ a gɛ baa nɔ lur. 28O la Jerusalam ka tomɛ Korowii dɛ berɛ dɛɛ kaa o bwɛ. Dɛ o soge kwaa ba yon vɔwɛ pɛl jagre dɛ so a bini aa tɛgra la bɛl ta dɛɛ kure Korowii keame Aesaya tɔn bobɛl. 29Belaa Korowii Domadɛɛge ŋɔ Felep be ŋɔ, "La jagre kon la jwɛh." 30Asɛ Felep chwa la o be dɛ ka no kɛŋɔ waa dɛ kure Korowii keame Aesaya tɔn bobɛl. O bɔɔro ŋɔ, "He dɛ no waa haa dɛ kure nɔ mun aa?" 31Anee nomoa la ŋɔ, "Dɛ nomɛl ta men a mun baglaa, mɛɛ wonoo no a mun aa?" Belaa o ŋɔ Felep be ŋɔ ó teeh ba so o be jagre kon la ta. 32Dɛ Korowii Tɔn waa nomoa la aa dɛ kure laanee la: "O helɔ kɛŋɔ baa lawɛ pee kaa kpobɔr o yon hel la. O tɔ nyoa kɛŋɔ baa dɛ fonɛ pebie pona o yon tɔ nyoa la. O ta nyoa pile bol wobɛlbwa sese. 33Ba doo sihiih dɛ vɛh o waa bola dɛ tɛo a ŋwɛnɛ ta, dɛ kpoo. Waa dɔa sewɛ la, umee dɛ won bagle o naanar waa kpa ɔ?" 34Belaa nomoa la ŋɔ Felep be ŋɔ, "Bag mɛ nɛn la nɛnsoo Korowii keame nɔ aa dɛ bol o waa nɔ. O gbagba waa wɛɛ bol, kɛɛ nomɛl waa wɛɛ bol ɔ?" 35Asɛ Felep le a gɛ waa la baa la aa kura Korowii Tɔn ta la ta dɛ bagle Yeesu bwara waa aa ɛ Amanesoma la. 36Baa kpɔ ŋwɛnɛ la ta dɛɛ kaa la, ba kaa le nee bɛl ta, anee nomoa la ŋɔ Felep be ŋɔ, "Nee la. Den sɔ mɛ Korowii ne. Kɛ waane lole ja?" 37(Asɛ Felep ŋɔ, "Dɛ he yarada Yeesu Kristo waa bambile bwa ne naa, mɛɛ sɔe a nee." Anee nomoa la ŋɔ, "N yaradao. N yaradao kɛŋɔ Korowii Biee Yeesu Kristo.") 38Belaa o gel o jagre kon la che, asɛ ba nɛra banɛ la bwa tu dɛ jo nee la ta, asɛ Felep sɔɔ Korowii ne. 39Baa le nee la ta la, Korowii Domadɛɛge baa kpɔ Felep kaa bug la ta. Nomoa la ta on nae kpa, dɛ chig ŋwɛnɛ ta kaa silɛɛ ne. 40Felep ne nyiŋa dɛ o lɔ Asotas. O le bela bol Amanesoma la baah bela bwɛɛre la bwa ta ka tel Sisaaria.

will be added

X\