We-la 3

1Awola bɛl Pita ne Jɔn la Korowii Dea wekee saŋ. A gɛ saŋ nɔɔ nɛra la bwa cheme dɛɛ soŋe Korowii webaŋa. 2Baa kaa tel dea la doonyoa la baa dɛ yerɔ Doonyodɛɛge la ta la, dɛ baa bɛl soge bela. Dɛ a gɛ baa la soge boobi o bechale saŋ bwa. Asɛ tɔpere bwa ba yon cheo ka so a gɛ doonyoa bela o kaa soŋe suuga nɛra baa dɛ jo Korowii Dea bela la be. 3Pita ne Jɔn aa dɛ ba dea bela joe la, o soŋ ba ŋɔ bá tɛo komɛl. 4Belaa ba pa sie o be, asɛ Pita ŋɔ, "Nyiŋi yaa!" 5Anee o nyiŋ ba dɛɛ lii kɛŋɔ baa tɛo komɛlee. 6Belaa Pita ŋɔ, "N ta suuga dɔe dɛ́ tɛɛ, kɛ mɛɛ tɛɛ kon n ge aa dɔa laanee. Yeesu Kristo waa le Nasarɛt la sɔn ta, ir dɛ valɛ!" 7Asɛ Pita lawɛ boobi la nɔndig dɛ gɔɔro ir. Bug la ta dɛ baa la nakpale ne o nalurumi denɔ do kpegri, 8o chugri ir che o naa anɛ la ta dɛɛ valɛ, asɛ o ne ba jo Korowii Dea bela. O kpɔ silɛɛ dɛɛ valɛ dɛɛ sa, dɛɛ kpɛɛ Korowii. 9Nɛra baa lɔ bela la bwa nao kɛŋɔ waa dɛ valɛ dɛɛ kpɛɛ Korowii. 10Baa naa kɛŋɔ boobi la o faa dɛ soŋe kwaa Doonyodɛɛge la ta laanee dɛɛ valɛ la, ba nyoa kpoo ba chara jegre kɛŋɔ waa bera won ir che dɛɛ valɛ la. 11Baa la toɔh pɛl Pita ne Jɔn, asɛ ba ne o ka tel Korowii Dea la bobɛl baa dɛ yerɛ bela Solomɔn Pato la, asɛ nɛra la aa nao la, ba nyoa kpoo, asɛ ba bwa chwa biribiri ken dɛ ba Pita ne Jɔn ne baa la be bela. 12Pita aa na nɛra la la, o bɔɔ ba ŋɔ, "Yabala Israel tena, ɛrɛɛ waa nɔ kpo he nyoa hɛɛ nyiŋi yaa gɛ nɔɔ? He dɛ lii ŋɔ ya gbagba kpegri ta kɛɛ ya nɛndɛɛga ɛɛ kohona waa baa nɔ won ir che dɛɛ valɛ nɔ kɛɛ? 13Gɛ laa. Korowii la ya naanar faa dɛ tomɛ la, Abraham ne Aesek ne Jekɔbwa Korowii la, on tɛ o bonɔɔ Yeesu sɔn gɛ la. Onee he kpɔ tɛ nomonome ŋɔ bá bol o waa dɛ kpoo la. Harɛ nomoa Paelet aa ŋɔa ó tao la, he ta ŋɔe ŋɔ haa sɛah? 14Wechɔga bɛlbwa toole o nɛ, wedɛɛga gboo o ɛ. Kɛ he ŋɔ haa on nyin, dɛ ŋɔ nɛn waa dɛ kpo nɛra laanee hɛɛ nyin kɛŋɔ Paelet foo ta dɛ gelo. 15Korowii nɛn nɛwɛnyini aa che o nɛɛ dɛ dɔ mkpa la, onee he kpo la, asɛ Korowii lawɔ ir seo ta. Ya na a gɛ waa nɔ. A danseɛ yaa di la. 16O sɔnee ya yerɛ asɛ baa nɔ gbaŋre la. Yarada yaa dɛ yarada Yeesu la, a taa a che waa nɔ haa naa nɔ won ɛ la. O waa la yaa dɛ yarada la, a gbosoroo chah baa nɔ he bwa aa jemɔ nɔ la. He bwa gee naa kɛŋɔ o gbaŋrɔ. 17"Yabala, n jemɔ kɛŋɔ bɛ jemaa gela he ne he nomonome ɛ Yeesu waa haa ɛo la. 18Korowii tɔ sie gel o keamere la bwa bagle ŋɔ o Kristo la waa bagɛ nyoa ŋɔ wɛɛ tomɔɔ ásɛ o ba lɛ yaa la dɛ ba waa nae. A gɛ waa la, kenii Korowii chega a ba ɛ. 19Anomanta hé charɛ he liire le he wechɔga ta dɛ kpɔ he te tɛ Korowii ásɛ o kpɔ he wechɔga kɛ heya, dɛɛ tɛ heyaa bambisɔɔhna, dɛɛ do heyaa gbemba. 20Wɛɛ berɔɔ tomɛ Yeesu waa ɛ Kristo la he be. Onee o le ŋɔ ó ba lɛ heyaa la. 21A chɛ kɛŋɔ Yeesu do nyundua dɛ ka tel tɔɔ la wee Korowii aa ɛ wobɛlbwa kɛrɛdɛ ken, gɛ waa gela o keamedɛɛga la bagle la. 22Mosis baglɔ ŋɔ, 'N Naa Korowii ɛɛ tomɛ o keamee ó ba bol o waa dɛɛ tɛ heyaa gɛ waa tom mɛ la. He gbagba dwee binii wɛɛ ba o lee. A chɛ kɛŋɔ he cheg deŋne dɛ no o wobol, dɛ ɛ gɛ bwa waa dɛ bagle. 23Nomɛlbwa waa wola o wobol noɛ la, baa pero le Korowii nɛra binii dɛ kpoo!' 24Korowii keamere baa dɛ bagle Korowii waa la, le Samoɛl bere saŋ ne banɔ la baa teŋɛ o nɛɛ bwa, ba bwaa bagle waa aa dɛ ɛ fini nɔ wa. 25Korowii nyoa la waa baga dɛ gel o keamere bol la, heyaa o bagɛ tɛ. Fɔo la Korowii ne he naanar aa fɔwa la laworomɛɛ hɛɛ di la. O ŋɔ Abraham be ŋɔ, 'He naanar nɛɛ aa ba chega n ɛ wedɛɛga tɛ harɛ ta nɛra bwa.' 26A waa Korowii le o torome la dɛ tɔ sie tomɔ he be ásɛ o ba ɛ heyaa wedɛɛga dɛ gel bɛlbwa charɛ o liire dɛ le o wechɔga ta la."

will be added

X\