1 Ya le nee la baŋ, dɛ le ya siswɛm la nyoa mɔɔ dɛ ta no kɛŋɔ gɛ ekwi harɛ la sɔne Mɔlta. 2 Bela tena nyiŋi yaa kɛrɛdɛ. Yaa dena jo bela dɛ bwaala dɛ nɛ asɛ waa do le kohona, asɛ ba mar nii tɛ yaa ya ŋwee. 3 Pɔɔl nyin daa ane ŋɔ ó kpɔ ba do nii la ta. Jaah harɛkon lɔ daa la ta. Waa doa nii ta bɔwɔb lawɛ harɛkon la la, o leɔ dɛ chogo, dɛ ka sagɛ o nɔn ta. 4 Bela tena la aa na harɛkon la Pɔɔl nɔn ta saga la, dɛ ba dɛ bol dɔŋa be ŋɔ, "Baa nɔ magaa kpo nɛn! Na waa le seo nyoa mpo ta asɛ o wechɔga taa ti o luge gɛ!" 5 Pɔɔl mer harɛkon la ta nii la ta. O choga la ta on wobɛlbwa ɛɛ. 6 Dɛ bela tena la te sogo dɛɛ nyiŋi kɛŋɔ Pɔɔl nɔn la ɛɛ ɔrɔɔ, dɛ ŋɔ gɛ laa ge aa, wɛɛ choloo bug ta dɛ sewɛ. Baa soga dɛɛ nyiŋu kɛŋɔ wɛɛ sewɔɔ waa wola sewɛ wobɛlbwa aa wola on ɛɛ la, ba berɔ ŋɔ vog bɛlee ken berɛ nɛn ba ba be la. 7 Dɛ nomoa waa dɛ nyiŋi bela harɛ la ta sɔne Publius. Dɛ on dɔ harɛre aa lɔ ba jwɛɛh bela la te bwa. O lɛ yaa dɛ nyiŋi yaa kɛrɛdɛ tɔpera atoro. 8 Dɛ Publius mɛɛ bwara wɔrɔbɔ asɛ o chɔ. Dɛ o dɛ feege ge. Pɔɔl jo o be dea dɛ kpɔ nɔɔra dawɛ o nɛ, dɛ soŋe Korowii tɛo, asɛ o gbaŋre. 9 Gɛ waa nɔ aa ɛa la, bela tena ba bwara aa dɛ wee ba la ba Pɔɔl be, asɛ o soŋe Korowii tɛɛ ba ba gbaŋre. 10 Ba kɛ yaa kwaa pirim. Yaa dɛ ba stiimae ta joe dɛ kaa la, ba tɛ yaa laala aa chɛ kɛ ya dɔ mɔɔ dɛ le la bwa. 11 Ya di korobie atoro bela mɔɔ dɛ dɔ Alɛksandrea tena stiimae bɛl baa dɛ yerɔ Vogkpara la bini jo. Peujen saŋ aa tela la, stiimae la tena baa so Mɔlta ásɛ peujena tonɛ mɔɔ ba le. 12 Yaa lea la, ya kaa chog bwɛɛ bɛl baa dɛ yerɔ Serakius la, dɛ di tɔpera atoro. 13 Ya le bela dɛ la bwɛɛ bɛl baa dɛ yerɔ Rɛgeɔm la. Tɔ aa pera la, dɛ peu bɛl tao le wekaŋle harɛ bɔr dɛɛ ba. Tɔpera anɛɛ ya di ŋwɛnɛ ta dɛ tel bwɛɛ bɛl baa dɛ yerɔ Puteoli la. 14 Dɛ asɔre tena bane lɔ bela dɛ ŋɔ yá di yawanyoa ba be mɔɔ dɛ kaa. Belaa ya le dɛ ba Room. 15 Room asɔre tena aa no ya waa la, ba baa cheme yaa Apius Yawa ta ne bela baa dɛ yerɛ Deene Atoro la bɔr. Pɔɔl aa na ba la, o bambile ba harɛ, asɛ o jam Korowii. 16 Waa ba Room la, ba tɛo o gbo dea, dɛ gel sooja beŋkpoŋ ɛɛ daahno. 17 Pɔɔl aa di tɔpera atoro Room la, o yerɛ bela Juda tena nomonome bwa cheme dɛ ŋɔ ba be ŋɔ, "Yabala, n ta ya bwɛɛ tena wobɛlbwa ɛɛ, n ta ya naanar waa baa dɛ ɛ la bɛlbwa nɛɛ joɛ, asɛ ba lag mɛ Jerusalam dɛ kpɔ mɛ tɛ Room tena ba tɔ mɛ dea la. 18 Ba ge aa nyiŋi n waa bini la, dɛ ba fe dɛ nyin n tae, dɛkalkɛ dɛ wobɛlbwa ta chaglɛ kɛŋɔ bá kpo mɛ gɛ ya bwɛɛ tena aa chagla la. 19 Baa ŋɔa bá ta mɛ la, ya bwɛɛ tena ta sɛɛh kwaraa, asɛ n koh a waa ŋɔ amɔ te bá tel n ne Room Koojen Siisa sie ó ka nyiŋi a ta. Kasinteŋ, dɛ anɔ laa aa, n ne ya bwɛɛ tena ta wobɛlbwa dɔe. 20 A waa n ŋɔ a chɛ kɛ n na heya, asɛ dɛ kpɔ bil he sie, dɛkalkɛ nɛn Juda tena bwa aa dɛ hwɛgɛ o nɛɛ kɛŋɔ wɛɛ ba lɛ yaa la waa ba lag mɛ dɛ do kwaa n nɔɔra nɔ." 21 Anee Juda tena la ŋɔ, "Ya bwɛɛ Judia harɛ tena ta yaa tɔn bɛlbwa chwerɛ dɛ bagle he wobɛlbwa ya be. Yabala baa le ya bwɛɛ dɛɛ ba bonɔ nɔ ge bɛlbwa ta he wechɔge bɛlbwa bolɛ ya no. 22 Yaa no he nyoa wobolee, dɛkalkɛŋɔ ya jemɔ kɛŋɔ he ŋwɛnɛfale nɔ haa kpɔ o ta dɛɛ tomɛ Korowii nɔ te, baa o waa nyin bobɛlbwa." 23 Ba tɛo tɔpere baa kpɔ ba no o nyoa wobol. Tɔpere la aa tela la, ba ba o be pirim o dea bela. Pɔɔl le chɔɔ dɛ bag ba Korowii Kora waa ka tel jwaana. O bol Yeesu wa, dɛ lii ba waa Mosis ne Korowii keamere faa chwera Korowii Tɔn bini la bwa, dɛ fe ɛɛ nyin kɛ ba sɛh ŋɔ Yeesu waa ba faa chwerɛ la. 24 Nɛra la bane yarada o waa la, bane ge ta an yaradae. 25 Pɔɔl bol waa tonɛ asɛ baa ba pegra. Dɛ ba bwa liire ta beŋkpoŋ ɛɛ, baa tɔŋle dɔŋa. O berɔ bol webeŋkpoŋ ja, mɔɔ ba bwa pegre. O waa waa bola laanee kɛŋɔ, "Korowii Domadɛɛge chegɛ o keame Aesaya nɛɛ bol waa ya naanar be, dɛ kpelaa o ŋɔ. O bolɔ ŋɔ, 26 'Ka ŋɔ nɛra la be ŋɔ: Hɛɛ noo kohona, kɛ haa a mun noe ba. Hɛɛ nyiŋuu kohona, kɛ haa a jema ba. 27 Dɛkalkɛŋɔ nɛra nɔ bambile kpegri, ba kpɔ nɔɔra tɔɔge deŋna, dɛ tɔɔge ba sibie ge. Dɛ a waa laa aa, ba sie fe ɛɛ nao, asɛ ba deŋna no, asɛ ba jemɛ a mun, dɛ charɛ ba liire asɛ n lɛɛ ba.' " 28 Pɔɔl berɔ ŋɔ, "Anomanta, hé no. Korowii waa aa dɛ ba nɛwɛnyini lɛɛ la, o berɔ kpɔa tɛ nɛra baa wola Juda tena ɛɛ la, dɛkalkɛ ban dɛɛ ba o be noe." 29 Pɔɔl aa bol waa tonɛ la, ba leɔ dɛɛ kaa dɛɛ tɔŋle dɔŋa kohona. 30 Pɔɔl hane dea dɛ so o bini bene anɛ. Dɛ nɛra dɛ ba o be. O ta ba bɛlbwa berɛ. 31 Dɛ o dɛ bagle nɛra Korowii Kora wa, dɛ kpɔ bansua dɛɛ bagle ya Dɔɔ Yeesu wa. Nomɛlbwa ta on ŋwɛnɛ tɔe.
