We-la 27

1Ba vɔrɔwɔ ŋɔ yá kpɔ nee ta kaa Itali harɛ bɛla Room Koojen aa soga la. Anomanta ba kpɔ Pɔɔl ne nɛra bane baa do ba ge dea ja o nɛɛ la tɛ Room Koojen soojanomoa bɛl baa dɛ yerɔ Juleɔs la. 2Stiimae bɛl le Adramitiam ba, asɛ ya jo o ta dɛɛ kaa. Dɛ o dɛ kaa Eesia harɛ mpo nyoa bwɛɛre ta. Dɛ baa bɛl baa dɛ yerɔ Aristakus ja ya nɛ. Makidoonia harɛ bwɛɛ bɛl baa dɛ yerɔ Tɛsalonika la taa o le. 3Tɔ aa pera laanee ya jo Sidon. Juleɔs kpoŋe Pɔɔl kɛrɛdɛ, dɛ tɛo ŋwɛnɛ ó ka na o daamanar ásɛ ba tɛo kwaa aa chɛ kɛ o dɔ o ŋwɛnɛ la ta. 4Ya chegɛ bela dɛɛ kaa, asɛ peu ka ta dɛɛ cheme yaa. Anomanta ya berɔ kaa Saepros waa ɛ ekwi la baŋ bobɛl peu la aa wola bela te ta la dɛ kaa. 5Ya kpɔ mpo ta gɛ dɛɛ la dɛ ka fɛrɛ Silisia ne Pamfiilia jwɛh, dɛ ka chuge Maera waa lɔ Lisia harɛ ta la. 6Belaa sooja nomoa la na Alɛksandrea tena stiimae bɛl waa dɛ kaa Itali harɛ, dɛ kpɔ yaa do o ta. 7Ya kaalɔ tama tama ken tɔpera anɛ, mɔɔ dɛ ta ba tel Kenaedes, dɛkalkɛ dɛ peu aa yaa ŋwɛnɛ tɛ. Peu la aa wola ŋwɛnɛ tɛ la, ya pa sie Kret ne Salmon a bwa aa ɛ ekwie la baah ta dɛ fɛrɛ Kret baŋ bela peu la aa wola bela te ta la dɛɛ kaa. 8Yaa fɛrɛ Kret harɛ baŋ pera bela kaa la, a no yaa kɛrɛdɛ, asɛ ya ba le legbɔɔ bɛl o ne Lasea aa wola jaŋɛ baa yerɛ bela Legbɔdɛɛge la. 9Yaa bigri ŋwɛnɛ ta kohona la nomanta, ya ne Legbɔdɛɛge tela dɛ ya Juda tena tɔpejen yaa dɛ vɔwɛ nyoa o ta la garɔ. Gɛ tɔpere nɔ ge garaa, dɛ gɛ mpo la ta vala aa were. Anomanta Pɔɔl ja ba ŋɔ, 10"Bwɛɛla, n nao kɛ le bonɔ dɛɛ la la, ya ŋwɛnɛ nɔ aa werii do tɛ yaa. Ya dɛ la naa, yaa ka na siswɛmee, asɛ ya ne ya stiimae nɔ ne ya bone nɔ ka nee ta." 11Pɔɔl aa bol gɛ la, sooja nomoa la ta o be noɛ. O teŋɛ nɛn waa dɛ valɛ stiimae la ne la ne stiimae te la nyoa wobol ta. 12Legbɔdɛɛge legbɔɔ bela aa were ne stiimae la chega peujena la saŋ. Ba ŋɔ stiimae legbɔdɛɛge lɔ Kret harɛ bwɛɛ bɛl baa dɛ yerɔ Finiks la ta, anomanta ba kɛrɛdɛ ŋɔ bá takapɔ so stiimae la bini tama tama dɛɛ la bela dɛ ka so bela, ásɛ peujena la saŋ kaa mɔɔ. Dɛ Finiks legbɔɔ la chɔɔ kɛ korobifale guri aa do gɛ la, asɛ o harɛ la nyoa bɛl sie chagɛ wee cholibɔr dig pera, asɛ bɛl ge chagɛ wee cholibɔr gal pera. 13A ta bigre dɛ peujega bɛl tao le wekaŋle harɛ bɔr dɛɛ ba, asɛ ba lii kɛ baa wonoo kaa gɛ ba fe aa liira wubwa la. Ba laa ba stiimae la buni baa kpɔa do nee bini dɛ gel stiimae la ɛɛ che la kpɔ dɛ fɛrɛ Kret harɛ dɛɛ kaa. 14A ta bigre bɛlbwa asɛ bela peuchɔge bɛl o yon le wee leebɔr gal pera dɛɛ ba la ir kpegri nɛ, dɛ le Kret harɛ dɛ ta dɛɛ ba mpo ta. 15Peu la aa taa dɛ ba lɔ yaa la, ya lawɛ ya stiimae la nyoa kahonɛ. Dɛ stiimae la aa wone dɛɛ kaa sie kpa, dɛ den dɛɛ kaa bela peu la aa taa chagɛ la. 16Ya baa tel ekwi bɛl baa dɛ yerɔ Kaoda la wekaŋle harɛ bɔr, asɛ o tɔ yaa bɔr peu la be tama, kɛ dɛ o ta dɛ vuugi yaa te. Ya bwara nyɛgɔ mɔɔ ba ta won gɔɔ gberjega waa pɛl ya stiimae la dɛ do ya stiimae la bini, dɛ kwaa stiimae la vɔrɔwɛ kɛrɛdɛ. Ba chweeh stiimae la ŋwɛɛra aa lɔ o keŋkeŋni la, asɛ a hamɛ kiŋkiŋ. Dɛ kechɛ bɛl lɔ bela baa yerɔ Siritis, asɛ baa ɔmɛ kɛŋɔ peu la ɛɛ tag baa kaa bela asɛ ba ka bela. Anomanta ba ba stiimae la yajen la aa lɔ o doa la ne harɛ, asɛ peu la tag ba dɛɛ kaa. 18Tɔ aa pera la, dɛ peu la ta dɛ ta kohona. Anomanta ba pa stiimae la bini bone ane vigri ásɛ o fɛgre. 19Tɔ aa pera ja la, ba gbagba pa stiimae la laala ane ta. 20Tɔpera aŋwɛnɛ bwa dɛ yaa wee na, yaa weweela ge na, asɛ peu la ge na dɛɛ ta kpegri nɛɛ gɛ. Ate dɛ yaa ya nyuune te waa lii kɛŋɔ yaa ɛ nɛraa kpa. 21Baa lɔ gbera la bini bigri baa wola kondikwaa dii la, Pɔɔl iro che dɛ ŋɔ ba be ŋɔ, "Yabala, maa ŋɔa ya bɛ Kret le la, a chɛ kɛ he fe no n kon ta. Laala aa chɔga ne anɔ la haa paa ta nɔ, a fe ta gɛ balɛ. 22Kɛ he bɛ ɔmɛ. He bɛlbwa aa sewa ba. Stiimae nɔ gboo dɛɛ ba chɔga. 23Wee la aa gela n ŋɔ gɛ laanee kɛ, dɛ jwaana ne la, Korowii waa dɔɔ mɛ dɛ gel mɛɛ ɛ o toma la, o torome ba n be, 24dɛ ba ŋɔ n be ŋɔ, 'Pɔɔl, bɛ ɔmɛ! Hɛɛ la Koojen Siisa bee. Nɛra la bwa he ne baa dɛ valɛ nɔ, Korowii noɔ tɛɛ. Wɛɛ lɛɛ baa.' " 25Pɔɔl aa bol gɛ la, o ŋɔ ba be ŋɔ, "Anomanta he bɛ ɔmɛ, dɛkalkɛ n dɛ yarada Korowii. N jemɔ kɛŋɔ gɛ waa bola la, gɛɛ aa ba ɛɛ. 26Kɛ peu nɔ ɛɛ tagɛ yaa ka ta ekwi harɛ bɛl ta." 27Tɔpere waa teŋa fi dɛ anaarɛ la harambaŋa ne la, dɛ peu la ta dɛ tagɛ yaa gɛ. Dɛ ya lɔ mpo la baa dɛ yerɔ Mɛdetɛreenia la ta. Dɛ stiimae la tom-ɛɛra la liire ɛɛ ba kɛŋɔ ya ken dɛ tel harɛ bɛl ta. 28Anomanta ba magɛ nee la dɛ na kɛŋɔ o luŋri tel nagale fifraanaarɛ. Aa ɛ tama la, ba berɔ magɛ na ja, dɛ na kɛŋɔ o luŋri tel nagale fifraatoro. 29Dɛ ba dɛ ɔmɛ kɛŋɔ ya stiimae la ɛɛ chuge bwea anee dɛ pegri, dɛ koh a waa gɔɔ o bune anaarɛ bwa do nee ta stiimae la mun ta. Dɛ ba dɛ soŋe Korowii ŋɔ bɔ́r chaah warane. 30Ate dɛ stiimae tom-ɛɛra la fe dɛ nyin bɔr dɛ le o bini dɛ chwa. Ba pur o gberjega la do nee ta, dɛ teŋe nyosone ŋɔ ba fe dɛ la ka kpɔ stiimae la sie dɛ́ ka tɛr o bune ŋwɛɛra ane do nee ta. 31Belaa Pɔɔl ŋɔ soojanomoa la ne soojare la be ŋɔ, "Dɛ stiimae tom-ɛɛra nɔ ta o bini sogaa, he bɛlbwa aa he nyuu dɔ." 32Asɛ soojare la chaa ŋwɛɛra aa vɔwɛ gberjega la pɛl stiimae la, dɛ gel o kaa. 33Tomun aa ba dɛ kpɔ la, Pɔɔl soŋ ba ŋɔ bá bwa di kwa, dɛ ŋɔ, "He tɔpera fi dɛ anaarɛɛ nɔ he tea bini aa chɔga he so dɛɛ kpa waa aa dɛ ba chiga, haa wola kwaa dii. 34N poo heya, hé di kwaa tama, dɛ́ won yo lɛ he nyuune. Haa waa nɔ nyoa kae ba. Wobɛlbwa aa he bɛlbwa ɛɛ ba." 35Waa ŋɔ gɛ la, o kpɔ paanoo dɛ jam Korowii ba bwa siwi ta, dɛ mɔn dɛ di. 36Waa ɛ gɛ la, ba bambile ba harɛ, asɛ ba dɔ gbemba dɛ won di kwa. 37Dɛ ya bwa lɔ nɛra lafraanɛ fifraanuanɛ dɛ nɛra banumɛl. 38Yaa di kwaa vagre gɛ yaa dɛ nyin la, ba gɔɔ kwaa baa kpɔa dɛɛ ɛ paanoo la ta nee ta, ásɛ stiimae la do fɛgre. 39Tɔ aa pera la, stiimae tom-ɛɛra ta wone jemɛ harɛ la yiso baa tel o ta. Ba na legbɔjen bɛl, dɛ na o nyoa bwea ne hɛŋle, dɛ ɛ ba liire kɛŋɔ dɛ aa magroo waa, baa kpɔ stiimae laanee chagɛ legbɔɔ la ta. 40Ba chaa stiimae la bune la do nee bini. Dɛ ba fa vɔwɛ stiimae la ŋwandaa ge dɛɛ pɛlo, kɛ ba pur o ge dɛ pagri stiimae la sie yatɔg waa sagɛ nyundua la, asɛ peu tagɛ stiimae la dɛɛ la bela o sie aa chaga la, dɛ tagɔ ka chuge. 41Stiimae la kaa chuge hɛŋle ane ta asɛ o sie la karɛ che a ta dɛ kaa kahonɛ. Waa chegɛ bobeŋkpoŋ gɛ la, dɛ nehaŋma dɛ lɔ o habɔɔ la kohona. Nehaŋma la pagre o habɔɔ la bwa. 42Soojare la fe vɔrɔwɔ ŋɔ baa kpoo nɛra baa do ba dea dɛɛ kaa ba ne laanee, dɛ ŋɔ a waa laa aa, baa wa nee le dɛ chwa kaa. 43Dɛ ba nomoa la aa Pɔɔl kpoe nyin dɛ koh o waa ŋɔ bá gel ba. O gelɔ nɛra baa jemɛ nee la tɔ sie le nee dɛ wa kaa baŋ, 44asɛ ba kar la dawɛ dapɛgre ne stiimae la pugrere ta dɛ wa le. Kenii ya bwa ɛ dɛ le.

will be added

X\