We-la 26

1Anee Kooro Agrepa ŋɔ Pɔɔl be ŋɔ, "N tɛɛ ŋwɛnɛ, ir dɛ bol he kon." Waa ŋɔ gɛ la, Pɔɔl ir nɔn dɛ bagle kɛŋɔ o dɛ ba o kon bola bá no, dɛ ŋɔ, 2"Kooro Agrepa, n sie lɛo kohona kɛ maa dɛ ba n kon bola he siwi ta, dɛ bagle waa bwa Juda tena aa kpɔa dɛɛ dag mɛ nɔ. 3N sie lɛo kohona, dɛkalkɛ he jemɛ ya Juda tena nawee waa bwa. Anomanta n poori, lawɛ bambile dɛ no n kon. 4Juda tena bwa jemɛ gɛ maa doa n bechale saŋ bwa ba le fini. Gɛ saŋ maa lɔ n bwɛɛ ne Jerusalam la, waa n faa dɛ ɛ bwa, ba jemɛ a bwa. 5Dɛ ba sɛoh ŋɔ bá bol kasinteŋ aa, ba fe ɛɛ wonoo di danseɛ kɛŋɔ ya Juda tena Korowii toma ŋwɛnɛ o ta teŋa aa kpega kohona baa yerɛ o nɛra Farisii tena la, o taa n gee teŋɛ. 6Korowii bagɛ ya naanar nyoa bɛl. N dɛ hwɛgɛ gɛ nyobaga la ta. Gɛ hwɛga nɔ waa ba koh lag mɛ asɛ n che he sie hɛɛ ba n waa bola la. 7Ya Juda tena deene fi dɛ anɛ tena la bwaa dɛɛ yarada Korowii kɛŋɔ wɛɛ ɛ gɛ waa bagɛ yaa nyoa laanee, dɛ koh a waa dɛɛ tomɔ sibegra ne chɔɔ ne jwaana bwa. N Naa Kooro, webeŋkpoŋ nɔ ya bwa aa dɛ hwɛgɛ o ta nɔ, onee ba kpɔ dawɛ n nɛɛ ŋɔ n ɛ wechɔga la. Na nɔ! 8Ya waa yaa dɛ hwɛgɛ a ta laanee kɛŋɔ Korowii ɛɛ ir yaa seo taa. Bɔkwaa ɛa he nɛra haa lɔ bonɔ nɔ aa wola won yarada kɛŋɔ Korowii won nɛra seo ta ira ɔɔ? 9"N gba fa hah Yeesu waa le Nasarɛt la waa la. N fa liiro kɛŋɔ ŋwɛnɛ bɛlbwa maa dɔa la, a chɛ kɛ n kpɔ o ta dɛ chɔg o waa la. 10Maa lɔ Jerusalam la, dɛ gɛ toma nɔɔ mɛɛ ɛ. N soŋe Sɔfonomonome ba tɛ mɛ ŋwɛnɛ asɛ n larawe Korowii nɛra do deene pirim. Gɛ saŋ la, dɛ ba bol ba waa dɛ pa ba bolchɔge ŋɔ bá kpoo ba aa, gɛɛ n ge sɛh teŋɛ ba kpoora la ta. 11Dɛ n dɛ la cheremi deene bini saŋ bɛlbwa dɛ kaa ɛɛ ba hɔhɔrɔwa taeh, dɛ fe ɛɛ nyin kɛŋɔ ba bol Korowii nɛnhɛlwaa ásɛ n lag ba. Ba waa aa dɛ di n baah kohona nomanta, dɛ n ti ba dɛɛ la bwɛɛre aa wola Juda tena bwɛɛre ɛɛ kwaraa ta, dɛ kaa ɛɛ ba hɔhɔrɔwa. 12"Gɛ ŋwɛnɛ nɔ bɛlee n soŋe Sɔfonomonome be, asɛ ba tɛ mɛ kpegri ŋɔ ń la Damaskɔs. 13N Naa Kooro, yaa lɔ ŋwɛnɛ ta dɛɛ kaa la, gɛ saŋ wee aa chegɛ nyufala la, n ne nyiŋa dɛ nii le nyundua dɛ chaah bɔr gwaa wee, dɛ chaah bɔr bar n ne nɛra yaa dɛ valɛ la. 14Belaa ya bwa chogli harɛ, asɛ n no kɛŋɔ nomɛl aa kpɔ ya bwɛɛ wobol dɛɛ bol waa n be, dɛ ŋɔ, 'Oo, Sɔɔl! Ɛrɛɛ he che n nɛɛ gɛ nɔɔ? He gbagbaa hɛɛ ɛ la. He ne nao baa doo ŋwɛn dɛɛ tegɔ o ta naa dɛɛ yagre o dɔɔ daa bwa beŋkpoŋ.' 15Anee n ŋɔ, 'Henee umeo, n Dɔɔ?' Asɛ o ŋɔ, 'Menee Yeesu haa chegɛ n nɛɛ la. 16Ir che! N dɛ nyin n lee ásɛ he ɛ n bonɔɔ dɛ valɛ dɛɛ bol waa haa naa fini nɔ, ne anɔ la haa naa kerekere la nɛra be. A waa n kpɔ n te chagle la. 17Mɛɛ tomɛɛ Juda tena ne nɛra baa wola Juda tena ɛɛ bwa bee, dɛ kisi wechɔge ba be. 18Hen dɛ ka pili ba sie ásɛ ba le biro ta dɛ ba bochaah ta bela nii aa lole, dɛ le Bɔnsam nɔn ta dɛ ba Korowii be, ásɛ o kpɔ ba wechɔga kɛ ba, ásɛ ba ba ja nɛra baa yarada mɛ n sɔ ba doŋa bwa ta ba ɛ n bii la nɛ.' 19"N Naa Kooro, maa na gɛ waa nɔ la, n ta vɛɛh. Gɛ bwa Yeesu aa le nyundua ba ŋɔ n be la, n ɛo. 20N tɔ sie la Damaskɔs, dɛ la Jerusalam, dɛ gaage Judia harɛ la te bwa, dɛ la harɛre a nɛra aa wola Juda tena ɛɛ ge ta. Maa dɛ gaage la bwa, dɛ n dɛ ŋɔ ba be ŋɔ bá charɛ ba liire dɛ le ba wechɔga ta, dɛ ba Korowii be, asɛ dɛ gel ba we-ɛɛla chagle kɛ ba charɛ ba liire dɛ le ba wechɔga ta. 21Gɛ waa nɔ waa Juda tena lag mɛ gɛ saŋ maa lɔ Korowii Dea la, dɛ fe ɛɛ nyin n kpoe. 22Dɛ le gɛ saŋ nɔ bwa ba le fini nɔ, n dɛ lii kɛŋɔ Korowii alaworomɛɛ n ta do le dɛ won che he sie dɛɛ di waa nɔ danseɛ nomonjena ne bechale bwa be nɔ. Waa Korowii keamere ne Mosis faa dɛ bol ŋɔ aa ɛo laanee n gee bol. 23Anee kɛŋɔ a chɛ kɛ Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la na wahala, dɛ tɔ sie ir seo ta lala bwa nɛ, dɛ́ won che o seo ta ira la ta bagle Juda tena ne nɛra baa wola Juda tena ɛɛ la kɛŋɔ ya toole seo nɔn ta ne biro ta kpa, dɛkalkɛ nii chaah ya nɛ." 24Pɔɔl aa dɛ bol waa ken la, nomoa Fɛstos kɔro ŋɔ, "Pɔɔl, choglaa dɛɛ wee kɛɛ? He tɔn jema kohona laanee dɛɛ wee chogla la!" 25Anee Pɔɔl ŋɔ, "Nomoa, chogla laa mɛɛ we! Kasinteŋ torodoo mɛɛ bol la. 26N Naa Kooro Agrepa te jemɛ waa maa dɛ bol nɔ bwa. A waa maa wola waa bola o sie ɔmɛ la. N jemɔ kɛŋɔ a bɛlbwa ta o habɔɔ leɛ, dɛkalkɛŋɔ a bɛlbwa ta waa baa sɔah ɛ ɛɛ. 27N Naa Kooro, he yarada waa Korowii aa gela o keamere la bol la aa? N jemɔ kɛŋɔ he yaradaa." 28Belaa Kooro Agrepa ŋɔ, "He dɛ lii kɛ hɛɛ wonoo gel n berɛ asɔre te bug nɔ ta kɛɛ?" 29Anee Pɔɔl ŋɔ, "Dɛ bug nɔ taa yoo, dɛ kerekeree yoo, n te waa maa dɛ soŋe laanee kɛŋɔ he ne nɛra nɔ baa dɛ no n waa nɔ fini nɔ do kɛŋɔ maa doa nɔ. Kɛ maa soŋe kɛ ba do kwaa he nɔɔra kɛ baa do mɛ nɔ te." 30Belaa Kooro Agrepa ne Nomoa Fɛstos ne Bɛnes, ne nɛra baa lɔ bela la bwa ir, 31asɛ baa le bela la, baa ŋɔ dɔŋa be ŋɔ, "Baa nɔ wobɛlbwa ta baglɛ kɛ o chɛ kpoe, kɛɛ ba doo dea." 32Kooro Agrepa ŋɔ Nomoa Fɛstos be ŋɔ, "Dɛ ken laa o soŋe ŋɔ hé la o ne Room Koojen Siisa be ó ka bol o waa dɛ pa bole nɔ naa, n fe ɛɛ ŋɔɔ hé kpɔɔ ta wɛɛ la."

will be added

X\