We-la 23

1Waa baa che nomonome la bwa sie la, o nyiŋ ba, dɛ ŋɔ, "Yabala, n bambile bwa nee n tomɛ Korowii le saŋ la bwa ba le fini. N liire ta men ɛɛ kɛ n ɛ wechɔga bwa." 2Asɛ Ananias waa ɛ Sɔfore Nomoa la ŋɔ nɛ́ra baa chegɛ Pɔɔl jwɛɛh la kpaa o nyoa ta. 3Belaa Pɔɔl ŋɔ, "Korowii ɛɛ lɔe bɔ kem, nɛra sie ta gboo he ɛ nɛndɛɛge kɛŋɔ dekɔɔh baa lɔɔ fula. Haa chema nɔ, gɛ Mmara aa chagla laa hɛɛ ba nyiŋa dɛ bol n wa aa? Aah dɛ haa ŋɔa bá lɔɔ mɛ nɔ, dɛ Mmara tɛ ŋwɛnɛ gɛ naa?" 4Anee nɛra baa chegɛ Pɔɔl jwɛɛh la ŋɔ, "Sɔfore Nomoaa hɛɛ chɛgre naa?" 5Asɛ Pɔɔl ŋɔ, "Yabala, n ta jemɛ kɛ Sɔfore Nomoaa on. Korowii Tɔn baglɔ kɛŋɔ ŋwɛnɛ toole kɛ nomɛlbwa chɛgɛ nomoa waa dɛ nyiŋi o bwɛɛ tena nɛ." 6Pɔɔl nyiŋi nɛra baa cheme bela la dɛ na kɛŋɔ bane ɛ Saduki tena, asɛ bane ge ɛ Farisii tena. Belaa o kpɔ takpeg ŋɔ, "Yabala, Farisii tee men noo! Farisii tena biee men. N dɛ hwɛgɛ kɛ nɛra ɛɛ ir seo taa. Gɛ hwɛga nɔ maa dɔa nɔ waa ba ba n ne ŋɔ hé bol n waa dɛ pa bole la!" 7Waa dena ŋɔ gɛ la, wetɔŋla chole Saduki tena la ne Farisii tena la baah. Ba nyoa ta berɛ pɛ kpa, 8dɛkalkɛ dɛ Farisii tena la te ŋɔ nɛra bwa ɛɛ ba ir seo taa, dɛ ŋɔ lala ge lole, dɛ ŋɔ nyundua toroma ge lole. Kɛ dɛ Saduki tena la te aa gɛ waa nɔ bɛlbwa yarada. 9Ba nyɛga la nyoa baa do kpegri, asɛ Farisii tena Tɔn Jerema la ir che dɛ ŋɔ, "Ya ta wechɔga bɛlbwa baa nɔ nɛɛ nae. Bɛl lole komɛl kɛɛ nyundua torome bɛlee bol waa o be!" 10Ba wetɔŋla la nyoa baa do kpegri kohona, asɛ ɔmee berɛ lawɛ soojanomonjen la, asɛ wɛɛ lii kɛ baa tɛgre Pɔɔlee kpo. Anomanta o gelɔ o bechale jo nɛra la baah ta dɛ lɛ Pɔɔl ba nɔn ta dɛ kpɔɔ kaa soojare dejen baa doo o bini la ta. 11Awola jwaana ne la, ya Dɔɔ Yeesu baa che Pɔɔl jwɛh dɛ ŋɔ o be ŋɔ, "Bɛ ɔmɛ. Hɛɛ di danseɛ tɛ mɛ Room gɛ haa dia tɛ mɛ Jerusalam nɔ." 12Tɔ aa pera la, Juda tena la bane chemo dɛ vɔrɔwe waane. Ba ŋwɛɛ ntam ŋɔ dɛ ba ta Pɔɔl kpoe yaa, ba bɛlbwa bɛ kwaa di, o bɛ nee nyɔ. Ba ŋɔ nomɛlbwa waa to ntam la la, Kórowii kpoo. 13Ba nɛra ba nyoa aa pɛa ba vɔrɔwe gɛ waa nɔ la gwaa nɛra fifraanaarɛ. 14Ba la Sɔfonomonome ne bwɛɛ nomonome be dɛ ka ŋɔ ba be ŋɔ, "Ya ŋwɛɛ ntam ŋɔ dɛ ya ta Pɔɔl kpoe yaa, yaa kwaa di. 15Anomanta hé ne Juda tena nomonome baa dɛ bol waa la tomɛ nɛn soojanomonjen la be ŋɔ ó le Pɔɔl tɛ heya, á do kɛŋɔ haa dɛ nyin he kwaa nyiŋi o waa bini kɛrɛdɛ la. Dɛ ba dɛ ba o ne naa, waa bonɔɔ tel ya te kpoo." 16Jaah Pɔɔl nimambie bɛl bibaa no gɛ waa la. Anomanta o la soojare dejen baa kpɔ Pɔɔl ka do o bini la ta dɛ ka ŋɔ o be. 17Belaa Pɔɔl yerɛ soojanomonome la bɛl dɛ ŋɔ o be ŋɔ, "La bonɔɔ nɔ ne he nomonjen la be. O dɔ waane dɛ́ bol o be." 18Sooja la la o ne ba nomoa la be dɛ ka ŋɔ o be ŋɔ, "Pɔɔl la baa doo dea laanee yer mɛ dɛ ŋɔ n be ŋɔ ń ba bonɔɔ nɔ ne he be. O dɔ waane dɛ́ bol he be." 19Belaa nomoa la lawɛ bonɔɔ la nɔn dɛ le o ne bokɛre dɛ pɛɛro ŋɔ, "Bɔkwa waa he dɔ dɛɛ nyin he bol n be nɔ?" 20Anee bonɔɔ la ŋɔ, "Juda tena vɔrɔwɔ ŋɔ baa ba soŋee asɛ hé kere kpɔ Pɔɔl tɛɛ ba bá la o ne ba nomonome baa dɛ bol waa la sie, á do kɛŋɔ baa dɛ nyin ba ka kwaa nyiŋi o waa bini kɛrɛdɛ la. 21Kɛ bɛ Pɔɔl kpɔ tɛɛ ba, dɛkalkɛ ba nɛra dɛ gwaa fifraanaarɛ sɔh ŋwɛnɛ ta dɛ́ kpoo. Gɛ nɛra la ŋwɛɛ ntam ŋɔ ba ta Pɔɔl kpoe yaa, baa kwaa di, baa nee gee nyɔ. Ba ɛ wobɛlbwa tonɛ. He siwi taa baa nyiŋi." 22Belaa nomoa la ŋɔ o be ŋɔ, "Bɛ gel nomɛlbwa no kɛŋɔ he bol gɛ waa nɔ n be." O ta bonɔɔ la ŋwɛnɛ o kaa. 23Soojanomonjen la yerɛ o soojanomonome la banɛ dɛ ŋɔ ba be ŋɔ, "Hé nyin soojare lafraanɛ, dɛ nyin soojare baa soge jagre ta dɛɛ yo la ge fifraanuanɛ, ne soojare baa dɛ yo lampea ne la lafraanɛ ásɛ ba la Sisaaria fini jwaana dɔŋ anuanaarɛ saŋ. 24Nyin konteehna tɛ Pɔɔl ásɛ o so bɛl ta, dɛ la o ne sɔnɔnɔɔ ka tɛ harɛ nomoa Fɛlekse." 25Nomoa la chwerɛ tɔn tɛɛ ba ŋɔ bá kpɔ ka tɛ harɛ nomoa la. Kenii o chwerɔ: 26Men Klɔdeɔs Lisiasii chwerɛ tɔn nɔ dɛɛ tɛ n nomoa Fɛlekse. He le aa? 27Juda tenaa lawɛ baa nɔ dɛ fe ɛɛ nyin o kpoe, asɛ n ka le ba nɛ, dɛ no kɛ o ɛ Room te, dɛ kpɔ soojare ka lɛo. 28Maa lɛo dɛɛ nyin n jemɛ wee la waa baa dɛ nyin o kpoe la, n kpɔɔ la Juda tena nomonome baa dɛ bol waa dɛɛ pa bole la sie. 29Belaa n na kɛŋɔ ba kii waa ba lawɔ. Waa baa kpɔa dawɔ la ta chɛ kɛŋɔ ba kpoo. A ta chɛ kɛ ba doo dea gba. 30A habɔɔ la, n berɔ ba no kɛŋɔ ba vɔrɔwe o vɔrɔwa dɛɛ nyin o kpoe, asɛ n ŋɔ a chɛ kɛ n ba o ne he be bug ta. N ŋɔ nɛ́ra o ne baa dɔa la ge ba he be dɛ ba bagle waa la aa lɔ o ne ba baah ta. N jagɛ bonɔ. 31Gɛ nomoa la aa bagle soojare la la, gɛɛ ba ɛ. Ba kpɔ Pɔɔl le jwaana dɛ ka tel o ne bwɛɛ bɛl baa dɛ yerɔ Antepatres la. 32Asɛ tɔ aa pera la, ba bini banɔ la baa kpɔ naa ta la berɔ ba Jerusalam, dɛ gel konteehna tena la, asɛ ba ne Pɔɔl kaa. 33Baa kaa tel Sisaaria dɛ kpɔ tɔn la tɛ nomoa waa dɛ nyiŋi harɛ la ta la, ba kpɔ Pɔɔl ge do o nɔn ta. 34O kure tɔn la, dɛ pɛɛ Pɔɔl harɛ la ta waa lea. Pɔɔl aa ŋɔa Silisiaa o le la, 35nomoa la ŋɔ o be ŋɔ, "Nɛra he ne baa dɔa la balaa, mɛɛ bol he waa laanee dɛ pa bole." Dɛ o lɔ Hɛrɔd koodem bɛl ta. O ŋɔ bá kpɔ Pɔɔl do bela, dɛ ŋɔ bá nyiŋu kɛrɛdɛ.

will be added

X\