We-la 17

1Baa dɛ kaa la, ba kaa kpɔ bwɛɛre ane baa dɛ yera Amfepɔles ne Apoloonia la ta dɛ ka le Tɛsalonika. Dɛ Tɛsalonika Juda tena dɔ cheremi dea bela. 2Pɔɔl la cheremi dea bela gɛ o yon dɛɛ ɛ bwɛɛre bwa ta la. Waa lɔ bela la, o yawanyoa atoro bwa dɛ o ne Juda tena la dɛ bol waa dɛɛ tɔŋle dɔŋa Korowii waa baa chwera la ta. 3Dɛ o dɛ bag ba Kristo la Korowii aa bagɛ nyoa ŋɔ wɛɛ tomɔɔ ó ba lɛ nɛwɛnyina la waa Korowii Tɔn bini, ásɛ ba jemɛ kɛ Korowii keamere fa baglɔ kɛŋɔ Kristo la ɛɛ na wahalaa, dɛ sewɛ, dɛ ir seo ta. Gɛ baa chwera la chɛ kɛ a ɛ. Waa bol gɛ tonɛ la, o ŋɔ ba be ŋɔ, "Yeesu nɔ n yon dɛɛ bol o waa nɔ, onee Kristo la." 4Bane yarada Pɔɔl waa la, dɛ ba ja o ne Silas nɛ. Bela haahna baa ɛ nɛnjena la galga ne bela Grik tena baa dɛ tomɛ Korowii la galga ge baa ja ba nɛ. 5Nɛra baa yarada Pɔɔlwa waa la dɛ baa ja asɔre tena la nɛɛ la aa dɛ warɛ la, dɛ aa somɛ Juda tena la be, asɛ ba ka nyin nɛŋkasale baa wola toma dɔe dɛ yon do dem baah dɛɛ gaage gbo la, dɛ ir ba bwaawee asɛ ba ne ba valɛ dɛɛ do gbɔga bwɛɛ la bwa. Ba la Jasen dem ŋɔ bá fe ka lawɛ Pɔɔl ne Silas ba tɛ bwɛɛla la. 6Baa wola ban dɔe lawɛ la, ba tɛgre Jasen ne asɔre tena la bane ka tɛ bwɛɛ la nomonome, dɛ nyɛg dɛɛ ŋɔ, "Nɛra nɔ, ban chɔg nɛra liire bobɛlbwa dɛɛ valɛ dɛ gel bobɛlbwa ɛɛ ɛ yeŋyeŋ la. Taraken ba ba ya bwɛɛ nɔ ta, 7asɛ Jasen ge lɛɛ ba do o dem. Waa ya Koojen Siisa aa wola nyin laanee baa ɛ. Ba ŋɔ Koojen bɛl ge berɔ do le ja ya Koojen nɔ nɛ. Dɛ́ o sɔne Yeesu." 8Bwɛɛ la tena ne ba nomonome aa no waa nɔ la, a gelɔ ba liire ɛ sakaa. 9Nomonome la gelɔ Jasen ne asɔre tena la kpɔ suuga cheg ajinamuu kɛŋɔ baa wobɛlbwaa ɛ kpa. Jasenwa waa baa ɛa laanee ba nyiŋi dɛ lɛɛ ba suuga dɛ ta ba. 10Bɔr aa baa jo la, asɔre tena la kpɔ Pɔɔl ne Silas kaa Beria. Baa la bela la, ba kaa jo bela cheremi dea bini. 11Dɛ bela Juda tena la waa do kɛrɛdɛ gwaa Tɛsalonika Juda tena, dɛkalkɛŋɔ ba lɛ Yeesu waa la silɛɛ ne, dɛ won dɛɛ nyiŋi Korowii Tɔn bini tɔpere bɛlbwa dɛ́ɛ na, dɛ́ jemɛ kɛ waa Pɔɔl aa dɛ bol la, kpelaa kɛɛ nyosonee yɔ. 12Nɛra la kɛrɛdɛ yarada Yeesu dɛ kpɔ ba te tɛo. Grik haahna baa ɛ nɛnjena la kɛrɛdɛ ne ba baala bwa yarada Yeesu. 13Juda tena baa lɔ Tɛsalonika aa noa kɛŋɔ Pɔɔl kaa bol Korowii Waa Beria ge la, ba ba bela dɛ ba do ba, asɛ ba bwaawee ir Pɔɔlwa nɛ. 14Belaa asɔre tena la gel Pɔɔl kaa mpo nyoa bug ta, asɛ Silas ne Timoti te so Beria. 15Nɛra la baa tɔ Pɔɔl sie dɛɛ la o ne la la o ne ka tel Atens, dɛ berɛ kaa Beria. Baa dɛ kaa la, Pɔɔl ŋɔ ba be ŋɔ bá ka ŋɔ Silas ne Timoti be ásɛ ba ba o be warane. 16Pɔɔl aa soge Atens bela dɛɛ kpa Silas ne Timoti la, o nao kɛ voga su bwɛɛ la bwa. Waa na gɛ la, o tea bini chɔgɔ. 17Anomanta dɛ o dɛ la bela cheremi dea o ne Juda tena ne Grik tena baa dɛ tomɛ Korowii gɛ Juda tena aa dɛ tomɔ la kaa nyiŋi Korowii waa la bini. Dɛ tɔpere bɛlbwaa wɛɛ so bwɛɛ la fɔgbaah, asɛ dɛɛ bol waa nɛra baa dɛ ba bela la be, asɛ o ne baa nyiŋi Korowii waa la bini. 18Dɛ nɛra bane hweli bela wejema baa dɛ yera Epikuria ne Stoik la, dɛ ge ɛ gɛ wejema la chachagla bela. Dɛ a gɛ nɛra nɔ ge dɛ tɔŋlo dɛɛ ŋɔ, "Ɛrɛɛ wobobala te nɔ gee bol nɔɔ?" Asɛ bane ge ŋɔ, "Jamɔ harɛ bɛl voga waa wɛɛ bol nɔ." Pɔɔl aa dɛ bol Yeesu ne seo ta ira waa ba lii gɛ la. 19Anomanta ba kpɔ Pɔɔl kaa bela nomonome baa dɛ yer ba Areɔpagos tena la, dɛ ka ŋɔ o be ŋɔ, "Bagle he wefala haa kpoŋa dɛɛ gaage la bini yá no. 20Ya ta he waa nɔ te dɔŋa noɛ bwa, anomanta ya dɛ nyin kɛ he bagle yaa a mun." 21Dɛ Atens tena ne ba hɔɔhra tomaa wefala bola ne wefala pɛɛra dɛ́ no. 22Pɔɔl aa chegɛ nomonome la sie la, o ŋɔ ba be ŋɔ, "N nao kɛŋɔ he Atens tena dɛ tomɛ voga kɛrɛdɛ, 23dɛkalkɛŋɔ maa dɛ gaage he bwɛɛ nɔ ta dɛ na bɔra haa kpoo kwaa dɛɛ kwaa he koŋkwaare la, n nao kɛŋɔ baa chwerɛ bobɛl ŋɔ, 'Ya dɛ tomɔ, kɛ yaa on jemɛ.' Kon haa wola on jemɛ dɛ gee tomɔ la, o waa mɛɛ bol he be la. O sɔne Korowii. 24"Korowiirii ta harɛ ne kwaa aa lɔ o ta bwa. On dɔ nyundua ne harɛ bwa. O waane laa chɔɔbɔra nɛwɛnyini aa maa tɛo la wa. 25Nɛwɛnyini kondikwaa waa laa o do le, waa nɛwɛnyini komɛlbwa nyin, dɛkalkɛŋɔ on dɛɛ tɛ yaa bokpega ne hweera ne komɛlbwa. 26Nɛmbeŋkpoŋii o ta, asɛ a gɛ nɛn la lolɛ harɛ bɛlbwa nɛra, asɛ ba ya perɛ harɛ bwa. Waa ta nɛwɛnyini la, o do bɛlbwa tɔpera ne ya dobɔra. 27On saahna ɛa gɛ, ásɛ nɛwɛnyini ɛɛ lagre dɛɛ nyin o bɔr kɛ nyoŋa ken, asɛ o bɔr nyina bini la, bá nao. Kɛ kasinteŋ, Korowii toole bojaŋ. O ne ya bɛlbwa baah naa jaŋɛ. 28Nomɛl te kompɛɛ: 'Korowii alaworomɛɛ ya bwa do le, dɛɛ hwee, dɛɛ ɛ ya tomare.' He nɛra baa dɛ chwerɛ wobobeela la gba di gɛ waa nɔ danseɛ dɛ ŋɔ, 'O biirii ya gbabir.' 29"Korowii biirii yan, anomanta ya bɛ on kpɔ magɛ suugaswɛm ne suugapoŋ ne bwea koŋkwaare nɛwɛnyini gbagba aa kpɔ ba liire maa la. 30Saŋ la nɛwɛnyini faa wola Korowii ŋwɛnɛ jemɛ kɛrɛdɛ la, o laa sie kpɔ ba wechɔga ta. Kɛ taraken te, o ŋɔ hárɛ ta bobɛlbwa nɛra charɛ ba liire dɛ le ba wechɔga ta, 31dɛkalkɛŋɔ o do tɔpere waa dɛ ba nɛwɛnyini bwa waa bola kasinteŋ ne la. O le nɛn wɛɛ ba waa la bola. O ir naate seo ta ásɛ nɛra jemɛ kɛŋɔ kpelaa o waa la." 32Pɔɔl aa bol seo ta ira waa la, dɛ ba dɛ mamɔ, asɛ bane ge ŋɔ, "Ya dɛ nyin kɛ he bol he waa la yá no ja." 33Belaa o le ba bini, dɛ kaa. 34Nɛra la bane te yarada Yeesu waa la dɛ ba ja o nɛ. Nɛra baa yaradaa la bini bɛl sɔne Daneseɔs. Dɛ Areɔpagos nomonome la bɛlee on. Haah bɛl baa dɛ yerɔ Damaris ne nɛra bane yarada Yeesu waa la.

will be added

X\