We-la 15

1Baala bane le Judia harɛ ba Anteɔk dɛ baa bagle nɛra baa yarada Yeesu waa la dɛɛ ŋɔ, "Dɛ he ta he pena teŋe gɛ Mosis Mmara la aa bagla la aa, haa Korowii mkpa dɔe ba." 2Pɔɔl ne Banabas ne gɛ nɛra la tɔŋle dɔŋa kɛrɛdɛ. Anomanta ba tomɛ o ne Banabas ne Anteɔk asɔre tena la bane Jerusalam ŋɔ bá ka na Yeesu toroma la ne asɔre tena nomonome la a gɛ waa la wa. 3Baa tom ba la, ba kaalɔ. Baa dɛ kaa la, ba kaa kpɔ harɛre ane baa dɛ yera Finiisia ne Samaria ta dɛɛ la, dɛɛ bol bela asɔre tena be gɛ nɛra baa wola Juda tena ɛɛ la aa bera dɛɛ yarada Yeesu dɛ kpɔ ba te tɛo. Ba ge aa no gɛ la, ba sie lɛo taeh. 4Baa tel Jerusalam la, Yeesu toroma la ne bela asɔre tena ne ba nomonome lɛɛ ba kɛrɛdɛ. Pɔɔlwa bagle toma Korowii aa chegɛ ba nɛɛ dɛ ɛ bwa. 5Dɛ asɔre tena la bane ɛ Farisii tena. Ba iro dɛ ŋɔ, "A chɛ kɛ nɛra baa wola Juda tena ɛɛ dɛ baa yarada Yeesu taraken la ɛɛ teŋe ba pena dɛɛ di Mosis Mmara ge ta." 6Belaa Yeesu toroma la ne asɔre tena nomonome la cheme dɛ nyiŋi waa la ta. 7Ba bol waa dɛ tɔŋle dɔŋa la sie, asɛ Pita ir che dɛ ŋɔ, "Yabala, he jemɔ kɛ Korowiirii fa lee mɛ he bini ŋɔ ń bol o Amanesoma la bagle banɔ la baa wola Juda tena ɛɛ la, ásɛ ba ge no o waa dɛ yarada. 8Korowiirii jemɛ nomɛlbwa nyu bini, dɛ tɛɛ ba o Domadɛɛge gɛ waa tɛ yaa la, dɛ bagle kɛ o nɛraa ba ge. 9O ta baglɛ kɛŋɔ ba korɔ ya korɛ. Baa yarada Yeesu waa la waa Korowii laa ba wechɔga kpɔ ba nɛ. 10Aah dɛ ɛrɛ waa hɛɛ nyin kɛ he daah Korowii dɛ́ na nɔɔ? Dɛ bontɔga ya ne ya naanar bwa faa wola wone che la laa hɛɛ nyin he kpɔ chog ba nɔ naa? 11Aa magre! Yarada yaa yarada ya Dɔɔ Yeesu la waa o na ya sum dɛ cha yaa, dɛ lɛ yaa. Gɛ tentenee ba ge yaradao o lɛɛ ba." 12Nɛra baa cheme bela la bɛlbwa ta berɛ tɔŋle kpa, dɛ tɔ nyoa dɛɛ no Pɔɔl ne Banabas be. Pɔɔl ne Banabas bagle nyokpowaa ne wekpega Korowii aa kpɔ ba ɛ nɛra baa wola Juda tena ɛɛ la bini. 13Baa bol waa tonɛ la, Jems ge bol waa ŋɔ, "Yabala, hé no n be! 14Seemɔn Pita bagle gɛ Korowii aa tɔ sie ɛ dɛ bagle kɛ o dɛ nyin nɛra baa wola Juda tena ɛɛ la taeh. O baglɔ ŋɔ Korowii le ba bini bane ŋɔ ba ɛ o nɛra. 15Korowii keamere la bwaa fa bol a gɛ waa nɔ dɛ chwerɛ Korowii Tɔn bini ŋɔ, 16'A habɔɔ la, mɛɛ berɔɔ ba nyiŋi Devid kora waa gua kɛŋɔ dea waa kua chole la ta. Mɛɛ berɔɔ ir ba kora la kɛŋɔ dea waa chola ba kwaa mao la, dɛ tɛ ba naa bɛl kpegri ásɛ o di kora ja, 17ásɛ harɛ ta nɛra baa kaa baa wola Juda tena ɛɛ la bwa ba nyin n bɔr dɛ tom mɛ. Men lee ba ŋɔ ba ɛ n nɛra. N Naa Korowiirii ŋɔ gɛ. 18A saŋ la bwaa o gel nɛra na gɛ waa nɔ.' 19Gɛ n te aa naa laanee kɛ, ya bɛ Mosis Mmara nɔ kpɔ dɛɛ ha nɛra baa wola Juda tena ɛɛ dɛ charɛ ba liire dɛɛ teŋɛ Korowii ŋwɛnɛ ta la, 20kɛ yá chwer ba tɔn ŋɔ ba bɛ voga kwaa dɛɛ di, dɛ laa ba te kpɔ jwamane waa ta, dɛ bɛ kon baa wola o baŋa teŋe o sewɛ la dɛɛ di, dɛ bɛ chal dɛɛ di, 21dɛkalkɛŋɔ Mosis Mmara nɔ yaa bagle a waa nɔ, bwɛɛre bɛlbwa taa nɛra baa dɛ bagla la do. Ona Tɔpere te bɛlbwa taa baa kure Mosis Mmara waa nɔ cheremi deene ta dɛ le saŋ la bwa ba le fini." 22Belaa Yeesu toroma la ne asɔre tena la ne ba nomonome bwa ɛ ba liire kɛŋɔ baa le ba bini banee asɛ dɛ tomɛ ba ne Pɔɔl ne Banabas Anteɔk. Judas baa bera dɛɛ yerɔ Baasabas la ne Silasee ba le. Dɛ a gɛ nɛra nɔ ɛ asɔre tena la nomonome baa dɛ tɔ ba sie la bane. 23Asɛ ba chwerɛ tɔn tɛɛ ba ŋɔ bá kpɔ kaa. Waa baa chwera laanee nɔ: "Yabala haa lɔ Anteɔk ne Siiria harɛ ne Silisia harɛ haa wola Juda tena ɛɛ la, Yeesu toroma la ne ya asɔre tena ne ya nomonome yaa ɛ he bala Jerusalam la bwa dɛ na heya. 24"Ya noɔ kɛ ya bini bane ba dɛ bagle heyaa waane, asɛ he liire ɛ heyaa sakaa ken. Ya laa tom ba. 25Anomanta ya chemo ya nyoa pɛ, asɛ ya ŋɔ yaa tomɛ nɛraa ásɛ ba ne Banabas ne Pɔɔl ba wa aa too ya tea kohona la la he be. 26Bambile bwa nee Pɔɔl ne Banabas ɛɛ ɛ ya Dɔɔ Yeesu Kristo toma nɔ. Dɛ baa dɔ sewee toma nɔ ɛɛ ta noo, ba waane laa. 27Ya ŋɔ Júdas ne Silas ge ja ba nɛɛ dɛ ɛ dɛ bol tɔn nɔ bini waa tenten hé no. 28Waa ya ne Korowii Domadɛɛge la aa naa laanee kɛ aa were kɛ ya gel hɛɛ ki komɛlbwa ka ja anɔ aa dɛ ba wona cha heyaa nɔ nɛ. 29Anee kɛ he bɛ voga kwaa dɛɛ di, he bɛ chal dɛɛ di, he bɛ ol baa wola o baŋa teŋe o sewɛ dɛɛ di, hé laa he te kpɔ jwamane waa ta. Dɛ he wono dɛɛ ki anɔ bwa naa, he wobɛlbwa ɛɛ magroo tɛ heya. Kórowii cha heya." 30Ba kpɔ tɔn la do Pɔɔl ne Banabaswa nɔn ta dɛ ta ba ŋwɛnɛ, asɛ ba kaa Anteɔk. Ba kaa yerɛ bela asɔre tena bwa cheme, dɛ kpɔ tɔn la tɛɛ ba. 31Baa kure tɔn la la, ba sie lɛo, dɛkalkɛŋɔ tɔn la do ba gbemba. 32Dɛ Korowii keameree Judas ne Silas. Ba bol waa taeh dɛ kpɔ do ba gbemba, dɛ ja ba. 33Ba soge Anteɔk tama, asɛ ba bala la ŋɔ bá berɛ la nɛra baa tom ba la be, dɛ ŋɔ Kórowii la ba ne sɔnɔnɔɔ. 35Pɔɔl ne Banabas te soge Anteɔk tama, asɛ ba ne ba bala bane ɛɛ bol Amanesoma la dɛɛ bagle ya Dɔɔ Yeesu waa nɛra be. 36A habɔɔ la, Pɔɔl ŋɔ Banabas be ŋɔ ó gel ba berɛ la bwɛɛre baa bagle nɛra Yeesu waa a ta la bwa ta dɛ ka na gɛ ba bala baa bag ba Yeesu waa la aa doa. 37Dɛ Banabas dɛ nyin kɛ Jɔn Maak ja ba nɛɛ dɛ la. 38Dɛ Pɔɔl ge be naa, a ta magrɛ kɛ Jɔn Maak la bɛl, dɛkalkɛŋɔ o fa teŋɛ ba nɛɛ toma la ta dɛ ka tel baah ta dɛ chwa gel ba Pamfiilia. 39Pɔɔl ne Banabas begre wa, dɛ a nyoa kpegri, asɛ ba pegri. Banabas kpɔ Jɔn Maak ja o nɛɛ ba jo gbera ta kaa Saepros, 40asɛ Pɔɔl ge kpɔ Silas. Baa dɛ ba kaala la, asɔre tena la kpɔ ba do Korowii nɔn ta ŋɔ wɛ́ɛ nyiŋi ba nɛ. 41Baa dɛ kaa la, ba kpɔ Siiria ne Silisia harɛ ta dɛɛ ja bela asɔre tena, dɛɛ do ba gbemba.

will be added

X\